បន្ទប់ស្ថានការណ៍បោះឆ្នោត ជាទីតាំងបញ្ជាឲ្យមាន«បដិវត្តន៍ពណ៌»។ នេះជាការលើកឡើង របស់លោក ហ៊ុន សែន នាយករដ្ឋមន្ត្រី - ប្រធានគណបក្សប្រជាជនកម្ពុជា ដែលជាប្រតិកម្មខ្លាំងៗ ប្រឆាំងនឹងស្ថាប័នមួយនេះ ដែលកើតចេញពីអង្គការសមាគមជាច្រើន ដើម្បីឃ្លាំមើលការបោះឆ្នោតនៅកម្ពុជា។ លោក ហ៊ុន សែន បានបញ្ជាផ្ទាល់មាត់ ទៅកាន់លោក ស ខេង រដ្ឋមន្រ្តី​​ក្រសួង​មហាផ្ទៃ  - អនុប្រធានគណបក្សប្រជាជនកម្ពុជា ឲ្យពិនិត្យផ្លូវច្បាប់ ដើម្បីចាត់វិធានការ ប្រឆាំងបន្ទប់ស្ថានការណ៍នេះ។

ថ្លែងនៅចំពោះសមាជិក និងអ្នកគាំទ្ររាប់ពាន់នាក់ ក្នុងពិធី រំលឹកខួប៦៦ឆ្នាំ នៃការបង្កើតគណបក្សប្រជាជនកម្ពុជា នៅមជ្ឈមណ្ឌល​កោះពេជ្រ ក្នុងថ្ងៃ​ទី២៨ ខែមិថុនានេះ លោក ហ៊ុន សែន បានចោទប្រកាន់បន្ទប់ស្ថានការណ៍ថា កំពុងធ្វើខ្លួនស្ថិតនៅ «ក្រៅសំណាញ់ច្បាប់»​។

បុរសខ្លាំងកម្ពុជា ដែលនៅកាន់អំណាច តាំងពីជាង៣ទសវត្សន៍មកនោះ បានថ្លែងឡើងថា៖ ​​«យើងបានដឹងហើយថា អង្គការក្រៅរដ្ឋាភិបាលមួយៗ បានចុះឈ្មោះ ប៉ុន្តែរបស់​ដែល​ហៅថាបន្ទប់ស្ថានការណ៍ ដែលជាអ្នកខោកក្បាល ទៅលើគណៈកម្មាធិការជាតិរៀបចំការ​បោះឆ្នោត (...) តើពួកគេមានសិទ្ធិបង្កើត នូវទីតាំងបែបនេះ ឬក៏ទីតាំងបែបនោះ ជាមូលដ្ឋានបញ្ជា នៃគោលការណ៍បដិវត្តន៍ព័ណ៌?ប្រសិនបើយ៉ាងដូច្នោះ ក្រសួងមហាផ្ទៃត្រូវចាត់ការបន្ទាន់ នូវអ្វី​ដែល​ពួកគេបាននិងកំពុងធ្វើក្រោមលេស តាមពិនិត្យមើលការបោះឆ្នោត។»។

ក្នុងការ​បោះឆ្នោត​ក្រុមប្រឹក្សា ឃុំ-សង្កាត់ កាលពីថ្ងៃទី៤​ ខែមិថុនាកន្លងមកនេះ ដោយមានការអនុញ្ញាតយល់ព្រម ពីគណៈកម្មាធិការជាតិរៀបចំការបោះ​ឆ្នោត បន្ទប់ស្ថានការណ៍ខាងលើ បានដាក់អ្នកសង្កេតការណ៍ ប្រហែលមួយម៉ឺននាក់ ដើម្បីឃ្លាំមើលការបោះឆ្នោត និងការរាប់សន្លឹកឆ្នោត សឹងតែនៅគ្រប់ទិសទីទាំងអស់ នៃការិយាល័យបោះឆ្នោត ក្នុងប្រទេសកម្ពុជា។ ស្ថាប័ននេះ បានធ្វើការផ្សាយបន្តផ្ទាល់ ពីស្ថានការណ៍ក្នុងពេលបោះឆ្នោត និងលទ្ធផល នៃការរាប់សន្លឹកឆ្នោតនោះផង។

នៅប៉ុន្មានថ្ងៃមុននេះ បន្ទប់ស្ថានការណ៍មួយនេះ បានធ្វើការវាយតម្លៃ​ការបោះឆ្នោត ថ្ងៃទី៤ ខែមិថុនានេះ ថាបានធ្វើឡើង ដោយមិនសេរីទាំងស្រុង តែបានប្រព្រឹត្តិទៅ ដោយសន្តិវិធី និងមានសភាពល្អ ជាងការបោះឆ្នោតមុនៗ។

លោក ស ខេង បានថ្លែង​ប្រាប់​ក្រុមអ្នកយកព័ត៌មាន នៅ​ក្រោយ​ពេល​បញ្ចប់​ពិធីរំលឹកខួបនោះ​ថា លោក​នឹង​ឲ្យ​ក្រុម​អ្នកច្បាប់​ពិនិត្យ​មើល​ករណី​នេះ តាមបញ្ជាលោក ហ៊ុន សែន។ ប៉ុន្តែរដ្ឋមន្ត្រីមហាផ្ទៃរូបនេះ ​មិនធ្វើ​អធិប្បាយលំអិតបន្ថែម​ថា តើ​អាជ្ញាធរនឹង​ចាត់​វិធានការ​បែប​ណា ទៅលើបន្ទប់ស្ថានការណ៍ ឬទៅលើអង្គការសមាគម ដែលជាសមាជិករបស់ស្ថាប័នមួយនេះទេ។

បញ្ជាក្នុងថ្ងៃនេះ របស់លោក ហ៊ុន សែន បានធ្វើឡើង ក្រោយការព្រមានរបស់លោក កាល​ពី​ថ្ងៃ​ទី២៦ ខែមិថុនា ទៅកាន់បន្ទប់​ស្ថានការណ៍ ដោយប្រាប់ស្ថាប័នេះ «ឲ្យល្មមៗបានហើយ»។ នៅពេលនោះ លោកនាយករដ្ឋមន្ត្រីបានថ្លែងឡើងថា៖ «សុំ​បន្ទប់​ស្ថានការណ៍​ហ្នឹង​ល្មមៗ បាន​ហើយ​អស់​លោក។ ខ្ញុំ​ក៏​ដឹង​ដែរ អស់​លោក​រៀបចំ​យ៉ាង​ម៉េច​អី យ៉ាង​ម៉េច​នោះ ហើយ​រៀបចំ​ផែនការ​អាក្រក់​ណាស់ បាន​ជា​ខ្ញុំ​ថ្កោលទោស​អ្នក​ជ្រៀតជ្រែក​កិច្ចការ ផ្ទៃក្នុង​កម្ពុជា។»៕