បុរសខ្លាំងកម្ពុជា បានគ្រោង​ត្រៀមផ្ទុះអាវុធ បង្កើតសង្គ្រាម នៅពេលលោក សម រង្ស៊ី វិលត្រឡប់​ចូល​ប្រទេស​វិញ។ នេះ បើតាមអត្ថបទខ្លីមួយ ដែលត្រូវ​បាន​បង្ហោះ នៅលើទំព័រហ្វេសប៊ុក របស់លោក សម រង្ស៊ី អតីត​ប្រធាន​គណបក្ស​សង្គ្រោះជាតិ នៅមុននេះបន្តិច។ អត្ថបទខ្លីនោះ ត្រូវបានទំព័រ​ហ្វេសប៊ុក​របស់លោក សម រង្ស៊ី ហៅថា​ជា​​«បទ​បញ្ជា​សម្ងាត់» ដែលលោក ហ៊ុន សែន សរសេរទៅកាន់មេបញ្ជាការ កងកម្លាំងប្រដាប់អាវុធ សម្រាប់​«អនុវត្តន៍​លើរូប សម រង្ស៊ី»។

ដោយ​ភ្ជាប់​​មកជាមួយ នូវរូបថត«ScreenShoot» នៃសារអេឡិចត្រូនិក ដែលមានប្រភព ចេញពីអស័យដ្ឋាន ឈ្មោះ «PM Hun Sen» នោះផង ទំព័រ​ហ្វេសប៊ុក​របស់មេដឹកនាំប្រឆាំង បានសរសេរឡើងវិញ ពី​សេចក្ដី​នៅ​ក្នុង​សារនោះថា៖ «ជូនថ្នាក់ដឹកនាំគ្រប់ថ្នាក់ ពិសេសមេបញ្ជាការ​កងកម្លាំង​ប្រដាប់​អាវុធ។ ថ្ងៃនេះ ខ្ញុំបញ្ជា​​ឲ្យលុប​ចោល ស.ជ.ណ. ដែលហាមឃាត់ មិនឲ្យក្រុមហ៊ុនយន្តហោះដឹក សម រង្ស៊ី ចូលមកកម្ពុជា ដែល ស.ជ.ណ. មួយ​នេះ យើងមានបំណងល្អ ដើម្បីជៀសវាង ការបង្ហូរឈាមណាមួយ ពិសេសការស្លាប់របស់ សម រង្ស៊ី តែបំណង​ល្អ​នេះ ត្រូវបាន សម រង្ស៊ី ប្រើជាលេស ថាយើងរារាំង មិនឲ្យវាចូលមកប្រទេសកម្ពុជាវិញ»។

សារអេឡិចត្រូនិក ដែលបង្ហាញថា ត្រូវបានសរសេរ​នៅថ្ងៃទី១៤ ខែមិថុនា វេលាម៉ោង ២ និង៣៥នាទីរសៀល បានបន្តសេចក្ដីដើមទៀតថា៖ «នេះ​គ្រាន់តែ​លុបចោល​បំរាម នៃការធ្វើដំណើរ តាមយន្តហោះប៉ុណ្ណោះ មិន​មែន​ជាការ​លើកលែងទោសឲ្យ សម រង្ស៊ី ទេ។ សម រង្ស៊ី នៅតែជាអ្នកមានទោស ដែលកម្លាំងអនុវត្តច្បាប់ ត្រូវ​តែ​អនុវត្ត តាមសាលដីកាតុលាការ ចាប់វាញាត់គុក ឲ្យខាងតែបាន ទោះ​ដោយ​តម្លៃ​ណា​​ក៏ដោយ មិនអាចឲ្យ​អា​មួយ​​នេះ រួចខ្លួនបានឡើយ។»។

សារនោះ បានរៀបចំជាបទបញ្ជារដូច្នេះថា៖ «ការចាប់ សម រង្ស៊ី ត្រូវធ្វើនៅលើយន្តហោះតែម្តង ដោយឲ្យ​យន្តហោះ ទៅចតនៅព្រលានយោធា ប្រសិន​នៅភ្នំពេញ។ ករណី នៅសៀមរាប ឬខេត្តព្រះសីហនុ ត្រូវ​រក​ទីតាំង​ណាសមស្របក្រៅពីចំណតអ្នកដំណើរ។ បណ្តាអង្គភាពនៃកងទ័ពស្រួច ត្រូវត្រៀម​អន្តរាគមន៍​កម្ទេច​ចោល នូវកម្លាំងណាក៏ដោយ ដែលរារាំងការអនុវត្តន៍ច្បាប់។ បទបញ្ជានេះ អនុវត្តដោយស្ងាត់ស្ងៀម ពេល​សភាព​ការណ៍​កើតឡើង ត្រូវ​ពង្រីក​មុខ​សញ្ញា ទៅកាន់កន្លែងផ្សេងទៀត តាមការចាំបាច់ និងត្រូវ​រង់ចាំ​បទ​បញ្ជា។»។

ក្នុងពេលភ្លាមៗ និងដោយសារវេលានេះ ជាវេលាអាធ្រាតយប់ជ្រៅ នៅក្នុងប្រទេសកម្ពុជា ទស្សនាវដ្ដី​មនោរម្យ.​អាំងហ្វូ មិនអាចស្វែងរកប្រតិកម្មណាមួយ ពីរដ្ឋាភិបាល និងពីខាងគណបក្សប្រជាជនកម្ពុជា ដែល​កាន់​អំណាច​តាំង​ពីជិត​៤០ឆ្នាំ មកហើយនោះបានទេ។

ទំព័រហ្វេសប៊ុករបស់លោក សម រង្ស៊ី នៅ​បានពន្យល់បន្ថែម ពីលើ«សារ»នេះថា៖ «បទបញ្ជានេះ បង្ហាញ​ឲ្យ​ឃើញ​ថា ហ៊ុន សែន រៀបចំបង្កសង្គ្រាម និង​សម្លាប់​ប្រជាព​លរដ្ឋ ពេល សម រង្ស៊ី វិលត្រឡប់ មកប្រទេស​កម្ពុជា​វិញ។ នេះក៏ជាលេសមួយទៀត ដើម្បីរំលាយ​គណបក្សសង្គ្រោះជាតិ។»។

កាលពីម្សិលម៉ិញ អនុប្រធានគណបក្សសង្គ្រោះជាតិ លោក អេង ឆៃអ៊ាង បានបង្ហើបពីពាក្យប៉ុន្មានម៉ាត់ដែរ ទាក់​ទង​នឹងការប៉ុនប៉ង ជាយថាហេតុណាមួយ ដើម្បីរំលាយ​គណបក្សសង្គ្រោះជាតិ។ លោកបាន​រៀបរាប់ថា រឿង​លោក សម រង្ស៊ី ក្លាហាន ឬកំសាក ក្នុងការវិលត្រឡប់ចូលស្រុក​ខ្មែរវិញនោះ មិនសំខាន់ សម្រាប់​គណបក្ស​សង្គ្រោះ​ជាតិ​ទេ។

លោក អេង ឆៃអ៊ាង បានសរសេរដូច្នេះ នៅលើបណ្ដាញសង្គមថា៖ «រឿងដែលសំខាន់ បើ​លោក​ប្រធាន សម រង្សុី ចូលមក នាំឲ្យ​គណបក្ស​សង្គ្រោះជាតិ ទទួលជោគជ័យ ក្នុងការបោះឆ្នោត ឆ្នាំ២០១៨ នោះ​លោក​ប្រធាន ដាច់​ខាតត្រូវតែចូល ទោះជាប់គុក ឬបាត់បង់ជីវិតក៏ដោយ។ តែបើ[លោក សម រង្ស៊ី] ចូល ឬមិនទាន់ចូល នាំ​ឲ្យ​គេ​​យក​លេស លើក[ពេល]​ការបោះឆ្នោតជាតិ ឬរំលាយគណបក្សសង្គ្រោះជាតិ នោះ​ដាច់ខាត​ មិនត្រូវ​ចូល​ឡើយ។»៕