ខឹម វាសនា រង​បណ្ដឹង​ទៅ​តុលាការ​និង​ទៅ​ព្រះ​មហាក្សត្រ ​ពី​បទ​ជេរ​ប្រមាថ​​មើល​ងាយ​​ពូជ​សាសន៍​​ខ្មែរ​

ប្រធាន​គណបក្ស​សម្ព័ន្ធ​​ដើម្បី​​ប្រជាធិបតេយ្យ លោក ​ខឹម វាសនា ត្រូវបាន​ប្រជាពលរដ្ឋ​ រស់​នៅក្នុង​រាជធានី​​ភ្នំពេញ ប្ដឹង​ពីបទ​ជេរ​ប្រមាថ ជាសាធារណៈ និងមើលងាយពូជសាសន៍ខ្មែរ។ ពាក្យបណ្ដឹងរបស់​ពលរដ្ឋ​រូប​នោះ ត្រូវបានដាក់​ចូល ទៅកាន់​​ស្ថាប័ន​​ព្រះមហាក្សត្រ និង​តុលាការ នៅ​ព្រឹក​ថ្ងៃទី​១២ ខែមិថុនា ឆ្នាំ​២០១៧ ដើម្បី​​ស្នើឲ្យ​ចាត់វិធានការ​ តាមផ្លូវ​ច្បាប់។
ខឹម វាសនា រង​បណ្ដឹង​ទៅ​តុលាការ​និង​ទៅ​ព្រះ​មហាក្សត្រ ​ពី​បទ​ជេរ​ប្រមាថ​​មើល​ងាយ​​ពូជ​សាសន៍​​ខ្មែរ​
លោក ​ខឹម វាសនា ប្រធាន​គណបក្ស​សម្ព័ន្ធ​​ដើម្បី​​ប្រជាធិបតេយ្យ ហៅ«បក្សជួង»។ (រូបថតលើហ្វេសប៊ុក)
Loading...
  • ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី១៣ មិថុនា ២០១៧
  • កែប្រែចុងក្រោយ: June 13, 2017
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

ប្រជាពលរដ្ឋ​មួយរូប រស់នៅ​សង្កាត់​ដង្កោ ខណ្ឌដង្កោ លោក​ សុច សឿង បានដាក់​ពាក្យ​បណ្ដឹង នៅថ្ងៃទី១២ ខែមិថុនានេះ ប្តឹង​ប្រធានគណបក្សសម្ព័ន្ធ​ដើម្បី​ប្រជាធិបតេយ្យ លោក​ ខឹម វាសនា ទៅ​កាន់​តុលាការ និង​ខុទ្ទកាល័យ​ព្រះមហាក្សត្រ ពីបទ​ជេរប្រមាថ​ជា​សាធារណៈ (​ជេរ​ខ្មែរ​) ដើម្បី​សុំ​អន្តរាគមន៍​ពីអាជ្ញាធរ​​រដ្ឋាភិបាល​ ឲ្យទប់ស្កាត់​នូវសកម្មភាព​ របស់អ្នកនយោបាយរូបនេះ​។​

​ពាក្យបណ្តឹង ដែល​ដាក់​ទូលថ្វាយ​ព្រះមហាក្សត្រ និងដែលបានមក​ដល់ដៃ​អ្នកសារព័ត៌មាននៅថ្ងៃនេះ បាន​សរសេរថា៖ «​បុគ្គល ខឹម វាសនា នេះ​​ ជាច្រើន​លើក​ច្រើនសា​ ​នៅ​ស្ទើរ​គ្រប់​វេទិកា​ជួបជុំ​​របស់​ពួកគេ ​បុគ្គល​រូប​នេះ តែងតែ​ប្រើពាក្យ​ជេរប្រមាថ​ ពាសវាល​ពាសកាល​ ទៅលើ​ប្រជាជាតិ​ខ្មែរ ព្រះសង្ឃ រួមទាំង​​​ព្រះមហាក្សត្រ ជាក់​ស្តែង​ កាលពី​ថ្ងៃទី​១២ ខែកុម្ភៈ ឆ្នាំ​២០១៧ គេ​បាន​ជេរប្រមាថ​ជាតិខ្មែរ​ យ៉ាង​អសុរោះជាទីបំផុត»។

ជាមួយនឹងក្ដីសង្ឃឹម ដែលថានឹងទទួលចំណាត់ការ លើពាក្យបណ្ដឹងរបស់ខ្លួន លោក សុច សឿង បាន​សរសេរ​បន្ត​ថា៖ «​មិន​ត្រឹមតែ​ប៉ុណ្ណោះ គេ​បាន​អំពាវនាវ​បំបែក​ប្រទេសជាតិ រួមទាំង​ប្រើ​ភាសា​មិន​គប្បី​ ទៅលើ​ស្ថាប័ន​ព្រះ​មហា​ក្សត្រ ជាទីគោរព​សក្ការៈ ដែលជា​ការរំលោភបំពាន​រដ្ឋធម្មនុញ្ញ ហើយ​មិន​ត្រឹមតែ​ប៉ុណ្ណោះ ​បុគ្គល​រូប​នេះ​បាន​​ទ្រុស្ត​​នឹង​ព្រះសង្ឃក្នុង​ព្រះពុទ្ធសាសនា រួម​ទាំង​​បញ្ចូល​មនោគមន៍វិជ្ជា​ ដ៏​អាក្រក់ៗ ដែល​មិន​ឲ្យ​កូន​ស្គាល់​ឪពុក ម្តាយ ជាដើម​។​ល​។ ដែល​សកម្មភាព​ទាំងអស់នេះ វា​ជះឥទ្ធិពល​អវិជ្ជមាន​យ៉ាងខ្លាំង ​ដល់​​សង្គម​ជាតិ​​ទាំង​មូល និង​ប្រាសចាក​​ដល​ល់​ប្រពៃណី ទំនៀម​ទម្លាប់​ដ៏​ល្អ​ផូរផង់ ​របស់​ជាតិខ្មែរ​។»។​​

នៅមុននេះបន្តិច លោក​ខឹម វាសនា បានយកការចេញផ្សាយ របស់សារព័ត៌មានក្នុងស្រុកមួយ មកបង្ហោះ​នៅ​លើ​​គណនេយ្យហ្វេសប៊ុក របស់លោក តែមិន​ឃើញលោក មានប្រតិកម្មអ្វី ទាក់ទងនឹងពាក្យបណ្ដឹង​ទាំង​នេះ​ទេ។ ប៉ុន្តែក្នុងពេល​កន្លងមក ប្រធានគណបក្ស​សម្ព័ន ធ្លាប់បានលើកឡើង ពីជំហានដើរ ​ប្រកបដោយ​គ្រោះថ្នាក់ នៅក្នុងជម្រើសធ្វើនយោបាយ​របស់លោក ដែលអាចឈាន​ទៅដល់ គ្រោះថ្នាក់ដល់ជីវិត និងជាប់ពន្ធនាគារ។

ប្រធានបក្ស​«ជួង» បានពន្យល់ នៅក្រោយការបោះឆ្នោតឃុំសង្កាត់ ដែលគណបក្សលោកមិនទទួលបាន មួយ​ឃុំសង្កាត់ណាសោះ ដូច្នេះថា៖ «ការធ្វើ​នយោបាយ​ប៉ុន្មានឆ្នាំនេះ​ ខ្ញុំត្រូវបានជនរងគ្រោះ (?)​ប្រមាថច្រើន​ហួស​ពេកហើយ​ចុងក្រោយនេះខ្ញុំអាចនឹងស្លាប់ ឬជាប់គុកទៀតផង។​ (...) ខ្ញុំសួរខ្លួនឯង​ជាញឹកញាប់ថា​ តើខ្ញុំ​លះ​បង់​បែប​នេះ​ ដើម្បីមនុស្ស ដែលសម​នឹងលះបង់ឲ្យ​ ឬគ្រាន់តែមានចិត្តជាប់ជំពាក់ នឹងពាក្យថា ជនជាតិខ្លួនឯង តែ​ជា​មនុស្ស​គ្មាន​តំលៃ គួរឲ្យសង្គ្រោះសោះនោះ?​»។

រីឯពាក្យ​បណ្ដឹងដោយឡែក ​ដែល​ដាក់​ជូន​ ព្រះរាជអាជ្ញា​អម​សាលាដំបូង​ រាជធានី​ភ្នំពេញ​ លោក សុច សឿង បាន​សង្កត់ធ្ងន់បន្ថែមថា៖ «​កាលពី​ថ្ងៃ​ទី​១២ ខែកុម្ភៈ ឆ្នាំ​២០១៧ នៅ​ក្នុង​វេទិកា​ជួបជុំ​មួយ ​របស់​លោក ខឹម វាសនា បាន​ជេរប្រមាថ មើលងាយ​ពូជ​សាសន៍​ខ្មែរ ដែល​ក្នុង​នោះ​រួមមាន ខ្ញុំបាទ​ ក៏​ជា​ខ្មែរ​មួយ​រូប​ផង​ដែរ ដោយ​បាន​​ហៅថា "​ពូជខ្មែរ ជា​ពួក​ថោកទាប និង​ជា​ឆ្កែ​។​ល​។" រួម​ទាំង​ប្រើ​ពាក្យ​សម្តី​អសុរស​ ជាច្រើន​ទៀត ដែល​ធ្វើ​ឲ្យ​​ប៉ះ​ពាល់​​កិត្តិយស និង​សេចក្តីថ្លៃថ្នូរ របស់​ខ្ញុំបាទ ក៏ដូចជា​ប្រទេស​ជាតិខ្មែរ​​ទាំងមូល​»។

​សម្រាប់ក្រុមសមាជិក និងអ្នកគាំទ្រ របស់គណបក្សសម្ព័ន្ធដើម្បីប្រជាធិបតេយ្យវិញ បានបបួលគ្នាបរិហារ លើ​ពាក្យ​បណ្ដឹងនេះយ៉ាងគគ្រឹកគគ្រេង។ អ្នកគាំទ្រខ្លះ បានចាត់ទុក​ម្ចាស់បណ្ដឹង កំពុងខ្ចីដៃព្រះមហាក្សត្រ ដើម្បី​ចាត់ការ​លើ«ប្រមុខ»របស់ខ្លួន ខណៈអ្នកគាំទ្រខ្លះទៀត បានហៅការប្ដឹងផ្ដល់ ទៅកាន់តុលាការ​កម្ពុជា ដែល​រង​ការ​រិះគន់​ពី​ភាព​លំអៀង​នោះ ថាជា«ផ្នែកមួយ» នៃសកម្មភាពរបស់«យួនបង្កប់»។

អ្នកគាំទ្រម្នាក់ ដាក់ឈ្មោះ «HengHeng Chheav» បានសរសេរថា៖ «បណ្តាញអាយួនវាបង្កប់ ប្រើគ្រប់វិធី ដើម្បី​ចាត់ការ LDP ព្រោះវាដឹងថា ពួកនេះជាគ្រោះធំបំផុត ក្នុងកាត់ផ្តាច់នឹមត្រួតត្រា របស់អាយួនេះ​។​ ​លោកខ្មែរ​ចាញ់​បោក​តែពពួក​យួនហ្នឹង!​ យួនរកវិធីបំភ័ន្ដខ្មែរ [ឲ្យ]​គ្មានមូលដ្ឋាន​ក្នុងយល់​ការពិត (​ស្តាប់ គិត ពិចារណា) ឲ្យខាំ​ខ្មែរ​គ្នាឯង​។​»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...