ផ្ទុយពីការប្រកាស ស្ដីពីលទ្ធផលបឋម នៃការបោះឆ្នោត​ជ្រើសរើស ក្រុមប្រឹក្សាឃុំសង្កាត់ នៅតាមកញ្ចក់​ទូរទស្សន៍​ជាតិ និង​នៅតាម​គេហទំព័រផ្លូវការរបស់ខ្លួន គណៈកម្មាធិការ​ជាតិ​រៀបចំ​ការបោះឆ្នោត (គ.ជ.ប) បាន​ចេញ​លិខិត​កែតម្រូវ​មួយ នៅរសៀលថ្ងៃព្រហស្បត្តិ៍នេះ ទទួលស្គាល់ជ័យជំនះរបស់គណបក្សសង្គ្រោះជាតិ ពី​លើ​គណបក្សប្រជាជនកម្ពុជា នៅឃុំព្រៃផ្ដៅ ក្នុងខេត្តតាកែវ។

សេចក្ដីកែតម្រូវ លេខ ១៤៤ គ.ជ.ប/អគ្គ./ប្រ.ក.ព របស់ គ.ជ.ឞ បានប្រកាសកែតម្រូវ លទ្ធផលបឋម ដែល​បាន​ផ្សាយក្នុងពេលមុខថា គណបក្សប្រជាជនកម្ពុជា ទទួលបាន ២៥៧៩សម្លេង និងគណបក្សសង្គ្រោះជាតិ ទទួល​បាន​២៥៤៨សម្លេង មកជាគណបក្សប្រជាជនកម្ពុជា ទទួលបាន ២៥៣៨សម្លេង និងគណបក្ស​សង្គ្រោះ​ជាតិ ទទួល​បាន​២៦២២សម្លេងវិញ។ បើតាមតួលេខចុងក្រោយនេះ គណបក្សសង្គ្រោះជាតិ មាន៨៤សម្លេង ឈ្នះ​គណបក្ស​ប្រជាជន​កម្ពុជា។

ប៉ុន្តែការប្រកាសកែតម្រូវនេះ មិនទទួលបានការស្វាគមន៍ ពីសំណាក់ពលរដ្ឋទូទៅទេ ដោយពួកគេមួយចំនួន បាន​បរិហាររឿងរ៉ាវនេះ ថាជាការខ្វះចន្លោះដ៏ធំ សម្រាប់​ស្ថាប័ន​ធម្មនុញ្ញមួយ ដែលមានភារៈ​ទទួលខុសត្រូវ លើ​រាល់​​ការ​​បោះ​ឆ្នោតនៅកម្ពុជា និងធានា​ពីភាពសេរី និងយុត្តិធម៌ នៃការបោះឆ្នោត​ទាំងនោះ។

ប្រិយមិត្តម្នាក់ឈ្មោះ «តាស្វិត ចិត្តស្មោះ អត់ខ្វល់» ដែលទំនងជាតាមដានរឿងនេះ យ៉ាងជាប់លាប់នោះ បាន​សរសេរ​នៅលើទំព័រហ្វេសប៊ុក របស់អ្នកនាំពាក្យ គ.ជ.ប ថា៖ «បើអស់លោកធ្វើការ តែរបៀបនេះ ឲ្យប្រជា​ពលរដ្ឋ ដែល​ជា​ម្ចាស់សន្លឹកឆ្មោត ទុកចិត្តម្ដេចកើត? នេះកុំតែបានប្រជាពលរដ្ឋក្លាហាន និង(...)ហ្វេសប៊ុក ម៉្លេះ​ប្រហែល​ជា​មិន​កែតម្រូវ​ទេដឹង? អាងអីបញ្ហាបច្ចេកទេស ខ្ញុំចង់សួរថា ពេលពួកលោកឯងធ្វើការ [តើ]មាន​យក​ចិត្ត​ទុក​ដាក់[ឬ]ទេ ហើយមានបទពិសោធន៍[ឬ]អត់ ឬមួយក៏មានចេតនា ធ្វើអ្វីតាមតែអ្នកមាន​អំណាច​បង្គាប់? បើ​មិន​បាន​ជួយ​រាស្រ្ដ សូមមេត្តាកុំយកឆន្ទៈរាស្រ្ដ មកបំរើប្រយោជន៍ខ្លួន និង​បក្សពួក។»៕

» សេចក្ដីកែតម្រូវរបស់ គ.ជ.ប ទាំងស្រុង៖