គណបក្សប្រឆាំងធំជាងគេ នៅក្នុងប្រទេសកម្ពុជា បានចេញសេចក្ដីអំពាវនាវមួយច្បាប់ នៅថ្ងៃនេះ ជូនទៅដល់បណ្ដាកម្មករ-និយោជិត ឲ្យចេញទៅបោះឆ្នោត ក្នុងថ្ងៃបោះឆ្នោតក្រុមប្រឹក្សាឃុំសង្កាត់ ដែលនឹងប្រព្រឹត្តិទៅថ្ងៃអាទិត្យ ទី៤ ខែមិថុនា ប៉ុន្មានថ្ងៃខាងមុខនេះ។

នៅក្នុងលិខិត ដែលបាបធ្លាក់ មកដល់ដៃអ្នកសារព័ត៌មាន នៅប៉ុន្មាននាទីមុននេះ គណបក្សសង្គ្រោះជាតិ បានសរសេរផ្ដល់ក្ដីសង្ឃឹម លើការបោះបង់«ពេលវេលា ថវិកា និងស្មារតីរបស់បងប្អូន កម្មករ កម្មការិនី នយោជិតទាំងអស់ ក្នុងការជន្នះទៅបោះឆ្នោត នៅតាមទីកន្លែង ដែលបងប្អូនបានទៅចុះឈ្មោះបោះឆ្នោត ក្នុងពេលកន្លងមក ទោះនៅឆ្ងាយក្ដី ជិតក្ដី» និងទោះជានយោជក «មិនអនុញ្ញាតច្បាប់​​ឈប់សម្រាក​គ្រប់គ្រាន់ សម្រាប់បងប្អូន ទៅបោះឆ្នោតក៏ដោយ»។

សេចក្ដីអំពាវនាវ ដែលមានចុះហត្ថលេខា ដោយលោក កឹម សុខា ប្រធានគណបក្ស បានហៅការបោះឆ្នោត ក្រុមប្រឹក្សាឃុំសង្កាត់ អាណត្តិទី៤នេះ ថាមានសារៈសំខាន់បំផុត សម្រាប់ពលរដ្ឋខ្មែរ និងកម្មករនយោជិតទាំងអស់ ក្នុងការជ្រើសរើសតំណាង នៅតាមមូលដ្ឋានរបស់ខ្លួន និង«ជាជំហានឆ្ពោះទៅរកការផ្លាស់ប្ដូរជាវិជ្ជមាន នៅក្នុងការបោះឆ្នោតជាតិ អាណត្តិទី៦ ឆ្នាំ២០១៨»។

កាលពីម្សិលម៉ិញ លោក សម រង្ស៊ី អតីតប្រធានគណបក្សសង្គ្រោះជាតិ ក៏បានចេញវីដេអូឃ្លីបមួយ ធ្វើការវអំពាវនាវដូចគ្នាដែរ។ លោក​ ​សម រង្ស៊ី​ បានមានប្រសាសន៍ថា៖​​«មាន​តែ​ការ​បោះឆ្នោត​ទេ ដែល​អាច​ធ្វើ​ឱ្យ​យើង​ សម្រេច​បាន​នូវ​គោលដៅ​របស់​យើង​ ដែល​ចង់​ឱ្យ​មាន​ការ​ផ្លាស់ប្តូរ​ បណ្តើរៗ​ ពីភាពអយុត្តិធម៌​ ទៅ​ភាពយុត្តិធម៌​ និង​ពី​ភាព​ក្រ​តោកយ៉ាក​ ទៅ​ភាព​សម្បូរ​សប្បាយ។​ ទាល់​តែ​គណបក្ស​សង្គ្រោះ​ជាតិ​ និង​ប្រជារាស្រ្ត​ខ្មែរ​ទាំង​មូល​ ទទួល​បាន​ជោគជ័យ​ ​ក្នុង​ការ​បោះឆ្នោត​២០១៧​នេះ​ជា​មុន​សិន​ ទើប​យើង​នឹង​ទទួល​បាន​ជោគជ័យ​ យ៉ាង​ត្រចះ​ត្រចង់ ក្នុង​ការ​បោះឆ្នោត​ជាតិ ​នៅ​ឆ្នាំ​២០១៨។»។​

ដោយឡែក សហភាពការងារកម្ពុជា បានចេញសេចក្ដីប្រកាសព័ត៌មានមួយ កាលពីថ្ងៃទី២៩ ខែឧសភា សម្រេចអនុញ្ញាត ឲ្យកម្មករនិយោជិករបស់ខ្លួន ឈប់សម្រាក រយៈពេល៣ថ្ងៃ ដើម្បីបានទៅបោះឆ្នោត។ បើតាមសេចក្ដីប្រកាសនោះ សហភាពការងារកម្ពុជា ដែលមានលោក អាត់​ ធន់ ជាប្រធាន បានអនុញ្ញាតឲ្យកម្មករនិយោជិករបស់ខ្លួន ឈប់សម្រាកដោយមានប្រាក់ខែ រយៈពេល៣ថ្ងៃ ចាប់ពីថ្ងៃទី៣ ដល់ថ្ងៃទី៥ មិថុនា ឆ្នាំ២០១៧។

ប៉ុន្តែការឈប់សម្រាកនេះ នៅតែមានភាពប្រទាំងប្រទើស ជាមួយក្រសួងការងារ ដោយបានអះអាង កាលពីប៉ុន្មានថ្ងៃមុនថា ក្រសួងមិនមានអំណាច ក្នុងការផ្តល់ថ្ងៃឈប់សម្រាក សម្រាប់កម្មករនិយោជិតទូទៅ នៅទូទាំងប្រទេសឡើយ ហើយ​បានរុញ​ករណីនេះ ទៅ​គណៈកម្មាធិការជាតិ​រៀបចំ​ការ​បោះឆ្នោត​វិញ៕