ហ៊ុន សែន គម្រាមកំចាត់មន្ត្រីបក្សប្រឆាំង ១០០-២០០នាក់ចោល
- ដោយ: ដារា រិទ្ធ ([email protected]) - ភ្នំពេញ ថ្ងៃទី២៥ ឧសភា ២០១៧
- កែប្រែចុងក្រោយ: May 25, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
កំចាត់មនុស្ស ១០០-២០០នាក់ចោល ដើម្បីសង្គ្រោះមនុស្ស រាប់លាននាក់ផ្សេងទៀត។ តែមនុស្ស១០០-២០០នាក់នេះ មិនមែនជាឧក្រិដ្ឋជន លក់គ្រឿងញៀន កាប់ព្រៃឈើ ជួញដូរមនុស្ស ឬជាចោរប្លន់នោះទេ តែជាមន្ត្រីគណបក្សប្រឆាំង ដែលនាយករដ្ឋមន្ត្រី-ប្រធានគណបក្សកាន់អំណាច លោក ហ៊ុន សែន គិតថាពួកគេមានបំណង ចង់ធ្វើបដិវត្តន៍ពណ៌ ដើម្បីរំលាយរដ្ឋាភិបាលស្របច្បាប់។ បុរសខ្លាំងកម្ពុជា បានប្រកាសថា នឹងកំចាត់ពួកគេទាំងនោះចោល ដូចដែលគេធ្លាប់ឃើញ នៅក្នុងអតីតកាលកន្លងមក។
លោក ហ៊ុន សែន បានថ្លែងយ៉ាងដូច្នេះ ចំពោះគ្រីស្ទបរិស័ទរាប់សិបនាក់ នៅថ្ងៃព្រហស្បត្តិ៍ ទី២៥ ខែឧសភានេះ ក្នុងពិធីមួយ ដែលត្រូវបានរៀបចំធ្វើ នៅសាលមហោស្រពកោះពេជ្រ កណ្ដាលរាជធានីភ្នំពេញ។ លោកថា៖ «ទង្វើណាក៏ដោយ ដែលនាំទៅដល់ការផ្តួលរំលំ គឺជាទង្វើ ដែលត្រូវតែបង្រ្កាបដាច់ខាតតែម្តង។ គ្មានការអត់ឱនទេ ដើម្បីធានាជីវិតមនុស្សរាប់លាននាក់ យើងសុខចិត្តកំចាត់ចោល ១០០-២០០នាក់ ព្រោះយើងធ្លាប់បានឃើញ នៅអតីតកាល។»។
នាយករដ្ឋមន្ត្រី-ប្រធានគណបក្សប្រជាជនកម្ពុជា នៅបានលើកឡើងសារជាថ្មី ទៅកាន់លោក កឹម សុខា ប្រធានគណបក្សសង្គ្រោះជាតិថា បើប្រធានគណបក្សប្រឆាំង ហ៊ានធ្វើសកម្មភាពណាមួយ ដើម្បីទម្លាក់នាយករដ្ឋមន្ត្រីសព្វថ្ងៃចេញពីអំណាច នោះថ្ងៃនេះគឺជាថ្ងៃធ្វើ«បុណ្យខ្មោច» របស់ប្រធានគណបក្សប្រឆាំងហើយ។
លោក ហ៊ុន សែន បានថ្លែងឡើងថា៖ «ខ្ញុំបាននិយាយ ជាមួយលោក[កឹម សុខា]ច្បាស់។ ខ្ញុំចាប់ដៃលោកក្នុងរដ្ឋសភា ខ្ញុំថាម៉េចឯកឧត្តម? មានវីដេអូឃ្លីបមួយ ឯកឧត្តមនិយាយថា ឥឡូវឡើងទៅចឹង។ ចុះឬមិនចុះ? បើមិនចុះទេ អង្រួនឲ្យចុះ។ ខ្ញុំបានព្រមានត្រង់ៗថា បើពេលនោះឯកឧត្តមធ្វើ ថ្ងៃនេះគឺជាថ្ងៃបុណ្យខ្មោច របស់ឯកឧត្តម! ខ្ញុំមិនខ្លាចនឹងធ្វើ ជាមួយការបំផ្លាញណាមួយ [ដែល]ចាប់បង្ខំ ឲ្យរដ្ឋាភិបាលស្របច្បាប់ត្រូវរំលាយនោះទេ។»។
ប៉ុន្តែការលើកឡើងខាងលើ របស់លោកនាយករដ្ឋមន្ត្រី មិនបានធ្វើឲ្យក្រុមមន្ត្រី របស់គណបក្សសង្គ្រោះជាតិចាប់អារម្មណ៍នោះទេ។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានថ្លែងថា លោក ហ៊ុន សែន កំពុងបង្វែរអារម្មណ៍ពលរដ្ឋ ឲ្យចេញពីការបោះឆ្នោតក្រុមប្រឹក្សាឃុំ-សង្កាត់ ហើយលោកនៅតែអំពាវនាវ ឲ្យពលរដ្ឋចេញទៅបោះឆ្នោត នៅថ្ងៃទី៤ ខែមិថុនា ខាងមុខ។
«បដិវត្តន៍ពណ៌=លេស?»
លោក ព្រហ្ម គិត អ្នកវិភាគនយោបាយ និងជាអតីតមន្ត្រីច្បាប់មួយរូប ពីប្រទេសកម្ពុជា បានថ្លែងថា លោក ហ៊ុន សែន ភ្លេចគិតថាមន្ត្រីបក្សប្រឆាំង ទាំង១០០-២០០នាក់នោះ ក៏មានការគាំទ្រ ពីពលរដ្ឋម្ចាស់ឆ្នោត ចំនួនកន្លះប្រទេសដែរ។ អ្នកវិភាគ បានថ្លែងឡើងថា លោក ហ៊ុន សែន អាចកំទេចក្រុមប្រឆាំងបាន ដូចការធ្វើរដ្ឋប្រហារ ខែកក្កដា ឆ្នាំ១៩៩៧ ដែលកាលនោះ ក្រុមអ្នកស្និតនឹងព្រះអង្គម្ចាស់ នរោត្ដម រណឬទ្ធិ ច្រើនរយនាក់ ត្រូវបានសម្លាប់នៅក្រៅប្រព័ន្ធច្បាប់។ ប៉ុន្តែពេលនេះ លោក ហ៊ុន សែន គ្មានលេសដើម្បីធ្វើការផ្ទុះអាវុធទេ ដោយសារតែក្រុមគណបក្សប្រឆាំងគ្មានអាវុធ។ លោកថា ដូច្នេះលេសតែមួយគត់ ដែលគណបក្សកាន់អំណាចអាចធ្វើបាន គឺ«បដិវត្តន៍ពណ៌»។
ការលើកឡើងផ្ទួនៗ ពី«បដិវត្តន៍ពណ៌» ពីសំណាក់មន្ត្រីរដ្ឋាភិបាល រដ្ឋសភា និងមន្ត្រីកងកម្លាំងប្រដាប់អាវុធ បានកើតឡើងព្រោងព្រាត នៅក្នុងរយៈពេលចុងក្រោយនេះ ដោយពន្យល់ពី«បដិវត្តន៍ពណ៌» ថាមានន័យស្មើរនឹងចលនាមហាជនមួយ ដើម្បីរំលំរដ្ឋាភិបាលស្របច្បាប់។
សុខចិត្តឲ្យផ្ទុះសង្គ្រាម ដើម្បីរក្សាសណ្ដាប់ធ្នាប់សាធារណៈ...
កាលពីប៉ុន្មានសប្ដាហ៍មុន លោក ហ៊ុន សែន បានព្រមានថា លោកសុខចិត្តឲ្យ «ផ្ទុះសង្គ្រាម ក៏ផ្ទុះទៅចុះ» តែលោកត្រូវបង្ក្រាបឲ្យបាន ទោះក្នុងតម្លៃណាក៏ដោយ ប្រឆាំងនឹងចលនាណាក៏ដោយ ដែលធ្វើឲ្យខូច ដល់សណ្ដាប់ធ្នាប់សាធារណៈ។ បន្ទាប់មកទៀត លោក ទៀ បាញ់ រដ្ឋមន្ត្រីការពារជាតិ ថែមទាំងបានព្រមាន ថានឹង«វ៉ៃបែកធ្មេញ» ប្រឆាំងជនណា ឬក្រុមណា ដែលហ៊ានងើបឡើងតវ៉ា ប្រឆាំងនឹងលទ្ធផល នៃការបោះឆ្នោត។
ជ្រៅជ្រះជាងគេ គឺសមាជិកសភា និងជាអ្នកនាំពាក្យរដ្ឋសភា មកពីគណបក្សប្រជាជនកម្ពុជា លោក ឈាង វុន ដែលបានចោទប្រកាន់សហរដ្ឋអាមេរិក ថាជាអ្នកនៅពីក្រោយ ចលនា«បដិវត្តន៍ពណ៌»នេះផងទៀត។ លោកបានសំអាងហេតុផលថា នោះ គឺដោយសារតែប្រទេសមហាអំណាចធំជាងគេ ចង់យកប្រទេសកម្ពុជា ធ្វើជា«ខ្ញុំបម្រើ»នយោបាយតំបន់ ហើយបានផ្ដល់ថវិកា និងភ្នាក់ងាររបស់ខ្លួន ចូលមកផ្គត់ផ្គង់ចលនាប្រឆាំងនៅកម្ពុជា តាមរយៈអង្គការធំៗមួយចំនួន។
លោក ព្រហ្ម គិត ចាត់ទុកបរិបទនយោបាយចុងក្រោយទាំងនេះ ថាជាការៀបចំជើងព្រួលមួយ ពីសំណាក់លោក ហ៊ុន សែន និងបក្ខពួករបស់លោក ដើម្បីឈានទៅដណ្ដើមអំណាច ដោយចុងកាណុង ដូចក្នុងឆ្នាំ ១៩៩៧នោះ ជាថ្មីទៀត ហើយលោក ហ៊ុន សែន បានព្រមានជាមុនដូច្នេះឲ្យហើយ ដើម្បីឲ្យពលរដ្ឋ ដែលមានបំណងចង់បោះឆ្នោតប្ដូរការដឹកនាំ មិនមានទឹកចិត្តចង់ចេញទៅបោះឆ្នោត។ អ្នកវិភាគបានពន្យល់បន្តថា តែនៅឆ្នាំ២០១៧នេះ មិនដូចឆ្នាំ១៩៩៧នោះទេ។
លោកថា៖ «២០ឆ្នាំកន្លងទៅហើយ ការដឹកនាំដែលបង្ហាញតែពីសម្បកក្រៅ មិនបានអន្ទងចិត្តពលរដ្ឋគ្រប់គ្នានោះទេ ជាពិសេសពលរដ្ឋដែលរងគ្រោះ ពលរដ្ឋដែលយល់ដឹង និងពលរដ្ឋដែលធុញទ្រាន់ នឹងការគម្រាមដដែលៗ ជាពិសេសការគម្រាម ដែលកើតឡើង សឹងតែគ្រប់ពេល ដូចនេះ»៕