បន្ទាប់ពី​ចាកចេញពីតំណែង ជាប្រធានគណបក្សសង្គ្រោះជាតិ តើលោក សម រង្ស៊ី បានធ្លាក់ខ្លួន មកលក់ទឹកកកឈូសឬ? ធ្លាក់ខ្លួនឬយ៉ាងណានោះ លោក សម រង្ស៊ី បានធ្វើកាយវិការ«ជានិមិត្តរូប»នេះ កាលពីថ្ងៃអាទិត្យម្សិលម៉ិញ នៅក្នុងពិធីបុណ្យជួបជុំមួយ ក្នុងបរិវេណវត្តវ៉ាំងសែន (ភាគអាគ្នេយ៍ជាប់រដ្ឋធានីប៉ារីស) រៀបចំឡើងដោយសមាគមសាមគ្គីកូនខ្មែរ នៅប្រទេសបារាំង។

ភ្ជាប់ជាមួយនឹងវីដេអូមួយ ដែលលោកបានបង្ហោះ នៅលើទំព័រហ្វេសប៊ុករបស់លោក អតីតប្រធានគណបក្សប្រឆាំង បានសរសេរថា៖ «រូបភាពបុណ្យសាមគ្គី ថ្ងៃអាទិត្យនេះ នៅទីក្រុងប៉ារីស ដើម្បីរៃអង្គាសថវិកា ជួយយុវជនសង្គ្រោះជាតិ ដែលឈរឈ្មោះ ក្នុងការបោះឆ្នោតឃុំ-សង្កាត់ ថ្ងៃ ០៤ មិថុនា ២០១៧។»។

មិនត្រឹមតែរវៃ ម៉ាស៊ីនឈូកទឹកកក ដើម្បីបានទឹកកកឈូស យកមកលក់ប៉ុណ្ណោះទេ តែលោក សម រង្ស៊ី នៅបានធ្វើកាយវិការ ដើម្បីលក់ទឹកអំពៅនោះផងទៀត។ ក្នុងរូបថតដែលលោកបង្ហោះ នៅពេលបន្តិចក្រោយមក ទំព័រហ្វេសប៊ុកដដែល បានសរសេរថា៖ «លក់ទឹកអំពៅ ថ្ងៃអាទិត្យនេះ នៅទីក្រុងប៉ារីស ដើម្បីរៃអង្គាសថវិកា ជួយយុវជនសង្គ្រោះជាតិ ដែលឈរឈ្មោះ ក្នុងការបោះឆ្នោតឃុំ-សង្កាត់ ថ្ងៃ ០៤ មិថុនា ២០១៧»។