«ក្រុមគ្រួសារលោក ហ៊ុន សែន និងមន្ត្រីជាន់ខ្ពស់ គណបក្សប្រជាជនកម្ពុជា កំពុងតែត្រៀមខ្លួន ទៅរស់នៅឯបរទេស ពីព្រោះពួកគេដឹងថា លោក ហ៊ុន សែន ជិតបាត់បង់អំណាចហើយ» នេះ ជាការលើកឡើង របស់មេដឹកនាំប្រឆាំង លោក សម រង្ស៊ី នៅលើទំព័រហ្វេសប៊ុក កាលពីម្សិលម៉ិញ មុននឹងយកសារដដែលនេះ មកបង្ហោះជាថ្មីទៀត នៅថ្ងៃនេះ នៅលើទំព័រទ្វីសធើររបស់លោក ដោយសរសេរ ជាភាសាអង់គ្លេស។

គេមិនដឹងថា អតីតប្រធានគណបក្សសង្គ្រោះជាតិ មានអំណះអំណាង​បែបណា នៅក្នុងការថ្លែង​របស់លោកទេ តែនៅក្នុងសំណេរទាំងនោះ លោក សម រង្ស៊ី បានចោទលោក នេត សាវឿន អគ្គស្នងការនគរបាលជាតិ ថាបាន​ទិញ​សញ្ជាតិ​ ពី​ប្រទេស​មួយ​ចំនួន​ សម្រាប់រូបលោក និងក្រុមគ្រួសារ មានអ្នកស្រី ហ៊ុន គឹមឡេង និងកូនស្រីទាំងបីនាក់​របស់លោក។

លោក រង្ស៊ី បានសរសេរថា៖ «ឧទាហរណ៍ គឺលោក នេត សាវឿន ដែលជាក្មួយប្រសារលោក ហ៊ុន សែន និងជាអគ្គស្នងការនគរបាលជាតិ ដែល បានចាយលុយយ៉ាងសន្ធឹកសន្ធាប់ ដើម្បីទិញសញ្ជាតិឲ្យក្រុមគ្រួសារគាត់ទាំងមូល ពីប្រទេសក្រៅមួយចំនួន ដូចជាប្រទេស Cyprus នៅទ្វីបអឺរ៉ុបខាងត្បូង និងប្រទេស "Saint Christopher and Nevis" នៅទ្វីបអាមេរិកកណ្តាល (តំបន់ Caribbean)»។

1. More and more of Hun Sen’s relatives and high-ranking CPP officials are preparing to leave #Cambodia to settle abroad as they know Hun Sen will soon have to step down. A prominent example is Neth Savoeu. pic.twitter.com/tLHmuVwM3r

— Rainsy Sam (@RainsySam) 30 janvier 2018

ឆ្លើយតប ទៅនឹងការលើកឡើងទាំងនេះ អ្នកនាំពាក្យគណបក្សប្រជាជនកម្ពុជា លោក សួស យ៉ារ៉ា ​បាន​ហៅ​លោក សម រង្ស៊ី ថាជា​មនុស្ស​វិកលចរិត​។ ស្រង់សំដី ដោយសារព័ត៌មានភ្នំពេញប៉ុស្ដ៍ អ្នកនាំពាក្យបានឲ្យដឹងថា៖ «​លោក សម រង្ស៊ី ទី​ ១ ជា​ទណ្ឌិត ទី​ ២ ​គាត់​កំពុង​វិកលចរិត ទី​ ៣ គាត់​កំពុង​លក់​ជាតិ​ឯង​ ឲ្យ​វិនាស​ហើយ​។ ដូច្នេះ​អ្វី​ ដែល​ជា​សម្តី​របស់ សម រង្ស៊ី មិន​យក​ជា​ការ​ទេ។​»​។

អមទៅនឹងសំណេរទាំងនោះ លោក សម រង្ស៊ី បានបង្ហោះរូបភាពជាច្រើនសន្លឹក ដែលបញ្ជាក់ពីអត្តសញ្ញាណ លិខិតឆ្លងដែន និងពីឯកសារបញ្ជាក់ការដាក់ទុនវិនិយោគ ដែលសុទ្ធតែមានឈ្មោះរបស់លោក នេត សាវឿន និងក្រុមគ្រួសាររបស់លោក។ ឯកសារទាំងនេះ ដូចគ្នាទៅនឹងឯកសារមួយចំនួន ពីក្នុងចំណោមឯកសារជាច្រើន ដែលត្រូវបានបែកធ្លាយ តាំងពីឧសភាកន្លងទៅ។ ទំព័រហ្វេសប៊ុកមួយ ដែលដាក់ឈ្មោះ «ធ្លាយហើយ» បានទម្លាយឯកសារទាំងនោះ ដោយសរសេរព្រលយ ឲ្យដឹងបន្ថែមថា៖ «សូមរង់ចាំវគ្គបន្តទៀតមាន: លោក ខៀវ កាញារីទ្ធ, ហេង សំរិន, ហ៊ុន ម៉ានិត, ផៃ ស៊ីផាន, ហ៊ុន តូ សាកទាយទៅមើល៍ តើពួកគាត់មានសញ្ជាតិអ្វីខ្លះ?»។

ឯកសារបែកធ្លាយទាំងនោះខ្លះ ថែមទាំងបង្ហាញថាឈ្មោះ ហ៊ុន គឹមឡេង មានប្រាក់នៅក្នុងគណនីធនាគារ ជាង២៧លានដុល្លារ ខណៈឈ្មោះ នេត ធីតាវិច្ឆុណា ដែលគេស្គាល់ជាឈ្មោះ​កូនស្រីច្បង របស់លោក នេត សាវឿន មានប្រាក់នៅក្នុងធនាគារ មិនតិចជាង៧លានដុល្លារឡើយ។ ឯកសារមួយនោះ គេឃើញមូលប្បទានប័ត្រ របស់ឈ្មោះ ហ៊ុន គឹមឡេង បានផ្ដល់ទឹកប្រាក់ ទៅឲ្យឈ្មោះ នេត ធីតាវិច្ឆុណា ចំនួន៣លានដុល្លារ។

យ៉ាងណា ក៏ឯកសារទាំងអស់នោះ មិនអាចសុំការបញ្ជាក់បានទេ ថាជាឯកសារពិត ឬក្លែងក្លាយ ខណៈលោក សម រង្ស៊ី ខ្លួនលោក ក៏មិនបានអះអាងដែរថា លោកបានឯកសារទាំងអស់ខាងលើ ពីប្រភពណាមក៕