សម រង្ស៊ី ជូនពរ ហ៊ុន សែន ឲ្យឆាប់ជាសះស្បើយ
- ដោយ: សេក មនោរកុមារ ([email protected]) - ប៉ារីស ថ្ងៃទី០៥ ឧសភា ២០១៧
- កែប្រែចុងក្រោយ: May 05, 2017
- ប្រធានបទ: នយោបាយ
- អត្ថបទ: មានបញ្ហា?
- មតិ-យោបល់
-
ទោះជាអវត្តមាន ពីឆាកនយោបាយខ្មែរ ក៏លោក សម រង្ស៊ី អតីតប្រធានគណបក្សសង្គ្រោះជាតិ នៅតែផ្ដល់សម្លេង និងរូបភាពម្ដងម្កាល នៅតាមបណ្ដាញសង្គម សម្រាប់ជូនទៅពលរដ្ឋ និងជាពិសេសអ្នកគាំទ្ររបស់លោក។ លើកនេះ លោកបានសរសេរសារជូនពរមួយឃ្លា ជាភាសាអង់គ្លេស សម្រាប់លោក ហ៊ុន សែន នាយករដ្ឋមន្ត្រីកម្ពុជា ដែលទើបប្រកាសថា បានធ្លាក់ខ្លួនមានជំងឺ ចាំបាច់ត្រូវព្យាបាល ជាបន្ទាន់។
នៅលើទំព័រទ្វីសធើរ (Twitter) របស់លោក មេដឹកនាំប្រឆាំងរូបនេះ បានភ្ជាប់រូបថត របស់លោក ហ៊ុន សែន ដែលថតជាមួយកូនចៅ នៅក្នុងមន្ទីរពេទ្យ ក្នុងប្រទេសសិង្ហបូរី ជាមួយនឹងឃ្លានោះ ដូច្នេះថា៖ «ខ្ញុំសូមជូនពរ សូមឲ្យលោកនាយករដ្ឋមន្ត្រី ហ៊ុន សែន ឆាប់ជាសះស្បើយ និងត្រឡប់មកមានសុខភាពបរិបូរណ៍វិញ»។
My best wishes for a full and speedy recovery to Prime Minister Mr. Hun Sen. #SamRainsy #Cambodia pic.twitter.com/ecYJ8qvaYy
— Rainsy Sam (@RainsySam) 5 mai 2017
នាយករដ្ឋមន្ត្រីបីទសវត្សន៍ជាង របស់កម្ពុជា បានប្រកាសកាលពីម្សិលម៉ិញ ថាលោកបានធ្លាក់ខ្លួន មានជំងឺ តាំងពីរសៀលថ្ងៃទី៣ ខែឧសភានេះមក ដែលចាំបាច់ត្រូវទៅពិនិត្យ និងព្យាបាលអការៈរោគនេះ នៅឯមន្ទីរពេទ្យ និងតម្រូវឲ្យលុបចោល នូវជំនួបជាច្រើន រហូតដល់ថ្ងៃទី ៧ ខែឧសភា (ថ្ងៃដែលលោកនាយករដ្ឋមន្ត្រី គ្រោងត្រឡប់មកកម្ពុជាវិញ)។ លោក ហ៊ុន សែន មិនបានបញ្ជាក់ថា លោកមានអាការៈរោគអ្វីទេ តែលោកគ្រាន់តែសរសេរឲ្យដឹងថា៖ «ដោយការហត់នឿយខ្លាំងពេក ខ្ញុំធ្លាក់ខ្លួនមានជម្ងឺ ដែលចាំបាច់ ត្រូវមកពេទ្យបន្ទាន់ ដើម្បីពិនិត្យនិងព្យាបាល។»។
ក្នុងរយៈពេលចុងក្រោយបំផុតនេះ គេមិនសូវជាឃើញលោក ហ៊ុន សែន ថ្លែងសារនយោបាយដោយផ្ទាល់ ទាក់ទងនឹងលោក សម រង្ស៊ី គូប្រជែងនយោបាយដ៏ធំរបស់លោក ដែលត្រូវអាជ្ញាធរកម្ពុជា បង្ខំឲ្យនិរទេសខ្លួន ទៅរស់នៅក្រៅប្រទេសនោះទេ។ ផ្ទុយទៅវិញ លោក សម រង្ស៊ី តែងបង្ហោះសារនយោបាយខ្លីៗ និងឯកសារជាច្រើន ដែលនិយាយ ពីប្រវត្តិសាស្ត្រកម្ពុជាទំនើប ដើម្បីអ្វីមួយ ដែលមេដឹកនាំគណបក្សប្រឆាំងរូបនេះ អះអាងថា ជាការបំភ្លឺរឿងរ៉ាវ ដែលរដ្ឋាភិបាលកម្ពុជាបច្ចុប្បន្ន និងគណបក្សប្រជាជនកម្ពុជា ព្យាយាមបិតបាំង៕