ហ៊ុន សែន ស្នើឲ្យឈប់ហៅ CPP ជាគណបក្សលេខ៤
- ដោយ: ដារា រិទ្ធ ([email protected]) - ភ្នំពេញ ថ្ងៃទី២៦ មិនា ២០១៧
- កែប្រែចុងក្រោយ: March 27, 2017
- ប្រធានបទ: ការបោះឆ្នោត
- អត្ថបទ: មានបញ្ហា?
- មតិ-យោបល់
-
គេមិនគួរហៅគណបក្សប្រជាជនកម្ពុជា ថាជាគណបក្សលេខបួននោះទេ ដោយសារតែលេខរៀងគណបក្ស នៅក្នុងការបោះឆ្នោតនីមួយៗ ត្រូវបានកំណត់ឡើង ដោយការចាប់ឆ្នោត ហើយគេមិនអាចកំណត់ ជាមុននោះបានទេ។ នេះ ជាការលើកឡើង របស់លោក ហ៊ុន សែន នាយករដ្ឋមន្ត្រី - ប្រធានគណបក្សប្រជាជនកម្ពុជា នៅព្រឹកថ្ងៃចន្ទ ទី២៧ ខែមីនា ឆ្នាំ២០១៧នេះ។
លោកនាយករដ្ឋមន្ត្រី បានយកឱកាស នៃពិធីសម្ពោធ ដាក់ឲ្យប្រើប្រាស់ នូវអាគារសិក្សាមួយខ្នង នៅក្នុងក្រុងក្រចេះ ខេត្តក្រចេះ ដើម្បីផ្សាយ«ពាណិជ្ជកម្ម» ឲ្យគណបក្សរបស់លោក ទាក់ទងនឹងលេខរៀង នៅក្នុងសន្លឹកឆ្នោត ដែលលោកគិតថា លេខរៀងលេខបួន មិនមែនជាលេខរៀងផ្ដាច់មុខ របស់គណបក្សប្រជាជនកម្ពុជានោះទេ។ លោក ហ៊ុន សែន បានពន្យល់ថា កាលពីការបោះឆ្នោត ឆ្នាំ២០០៨ និងឆ្នាំ២០១៣ គណបក្សប្រជាជនកម្ពុជា ទទួលបានលេខរៀង លេខ៤នេះ ប៉ុន្តែក្នុងការបោះឆ្នោត ជ្រើសរើសក្រុមប្រឹក្សាឃុំ-សង្កាត់ ក្នុងឆ្នាំ២០១៧នេះ អតីតគណបក្សកុម្មុយនីសមួយនេះ ទទួលបានលេខរៀងជាច្រើនខុសៗគ្នា ទៅតាមមណ្ឌលបោះឆ្នោតនីមួយៗ។
ការអំពាវនាវរបស់លោក ហ៊ុន សែន បានធ្វើឡើងនៅពីរថ្ងៃ បន្ទាប់ពីការថ្លែង និងការសរសេរ លើកឡើងប្រហាក់ប្រហែលគ្នានេះ របស់លោក កឹម សុខា ប្រធានគណបក្សសង្គ្រោះជាតិ ដែលស្នើឲ្យឈប់ហៅ គណបក្សរបស់លោក ថាជាគណបក្សលេខរៀងទី៧។ កាលពីថ្ងៃទី២៥ ខែមីនាកន្លងទៅនេះ លោក កឹម សុខា បានថ្លែងដូច្នេះ នៅក្នុងវេទិកាមួយ ក្នុងខេត្តកំពង់ធំ និងបានសរសេរបញ្ជាក់ ជាថ្មីទៀត នៅលើទំព័រហ្វេសប៊ុករបស់លោក ក្នុងមូលហេតុមួយ ដែលលោកនិយាយថា ដើម្បីបញ្ជៀស«ការយល់ច្រឡំ»។
លោក កឹម សុខា បានពន្យល់ប្រហាក់ប្រហែល នឹងលោក ហ៊ុន សែន ថា លេខរៀងរបស់គណបក្សសង្គ្រោះជាតិ នៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ ក្នុងពេលខាងមុខនេះ គឺមិនមែនសុទ្ធតែលេខ៧ ដូចការបោះឆ្នោតតំណាងរាស្ត្រ កាលពីឆ្នាំ២០១៣ នោះទេ៕