ជីជី ប៊ូហ្វុង «Troll» ហ្សីហ្សូ គ្មានមេត្តា!
- ដោយ: ជ័យវិបុល ([email protected]) - ប៉ារីស ថ្ងៃទី២៤ មិនា ២០១៧
- កែប្រែចុងក្រោយ: March 24, 2017
- ប្រធានបទ: បាល់ទាត់
- អត្ថបទ: មានបញ្ហា?
- មតិ-យោបល់
-
ហ្គីលីជី ប៊ូហ្វុង (Gianluigi Buffon) ឬហៅខ្លី ប៊ូហ្វុង (Buffon) កីឡាករចាំទី របស់ក្រុមអ៊ីតាលី នឹងក្លាយជាកីឡាករព្រឹទ្ធាចារ្យ ដែលបានប្រកួត ១០០០ដង នៅក្នុងអាជីពជាកីឡាករបាល់ទាត់របស់ខ្លួន បន្ទាប់ពីក្រុមជម្រើសជាតិអ៊ីតាលី នឹងត្រូវជួបជាមួយក្រុម អាល់បានី ក្នុងយប់ថ្ងៃសុក្រនេះ។ ហើយវាដូចសមល្មមហើយ ដែលកីឡាករវ័យ ៣៩ឆ្នាំរូបនេះ ត្រូវត្រិះរិះពិចារណា ជុំវិញការចូលនិវត្តន៍ ពីអាជីពជាកីឡាករបាល់ទាត់ របស់ខ្លួន។ ប៉ុន្តែបញ្ហានៅត្រង់ថា តើនឹងជ្រើសរើសពេលវេលាបែបណា ដើម្បីធ្វើឲ្យការចូលនិវត្តន៍នេះ មាន«រសជាតិ»ទ្វេឡើង?
ដើម្បីឆ្លើយទៅនឹងសំនួរនេះ កីឡាករ ប៊ូហ្វុង បាននឹកឃើញ ទៅដល់អនុស្សាវរីយ៍ ដ៏ពិសេសមួយ ដែលមិត្តរួមអាជីព ដ៏ចាស់វស្សាមួយរូប បានបន្សល់ទុក នៅមុនពេលកីឡាកររូបនោះចូលនិវត្តន៍។ មិត្តរួមអាជីពនោះ គឺអតីតកីឡាករម្ចាស់បាល់មាស ហ្សីណាឌីន ហ្សីដាន (Zinedine Zidane) ហៅ ហ្សីហ្សូ (Zizou) ដែលបានប្រើក្បាល ឱនទៅបុកទ្រូង របស់កីឡាករ «Marco Materazzi» ខ្សែការពាររបស់ក្រុមអ៊ីតាលី នៅក្នុងការប្រកួតចុងក្រោយ (សម្រាប់ការចូលនិវត្តន៍ របស់កីឡាករ ហ្សីដាន) ដើម្បីដណ្ដើមលេខមួយ នៅក្នុងការប្រកួតផ្ដាច់ព្រ័ត្រ នៃបាល់ទាត់ពិភពលោក ឆ្នាំ២០០៦។
កីឡាករចាំទី ជាតិអ៊ីតាលីរូបនេះ បានឆ្លើយទៅនឹង សំនួរអ្នកសារព័ត៌មាន របស់ទូរទស្សន៍ «Sky» នៅថ្ងៃសុក្រនេះដូច្នេះថា៖ «ខ្ញុំនៅមានពេលច្រើនបន្តិចទៀត មុននឹងគិតដល់រឿងនេះ (រឿងចូលនិវត្តន៍)។ ខ្ញុំត្រូវត្រិះរិះ និងគិតពីជម្រៅចិត្តរបស់ខ្ញុំ នូវអ្វីដែលអាចទៅរួច ឬមិនអាចទៅរួច។ (...) ខ្ញុំប្រហែលជាអាចបញ្ចប់អាជីព ជាកីឡាកររបស់ខ្ញុំ ដូច ហ្សីដាន ដែរ ដោយប្រើក្បាល ឱនទៅបុកនរណាម្នាក់ នៅលើទីលានប្រកួត។»។
បើដូច្នេះមែន គេនឹងរង់ចាំមើល ថាតើកីឡាករណាទៅ នឹងត្រូវក្លាយជាជនរងគ្រោះ ពី«ការប្រើក្បាលបុក» របស់កីឡាករ ជីជី ប៊ូហ្វុង ?
