នៅមួយថ្ងៃក្រោយភេរវកម្ម ជិតអាគាររដ្ឋសភា នៅរាជធានីឡុងដ៍ ចក្រភពអង់គ្លេស អង្គការភេរវនិយម ក្រុម​រដ្ឋ​អ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) បានចេញមុខមកប្រកាសទទួលស្គាល់ ថាទង្វើនេះ ជាស្នាដៃមួយ នៃយុទ្ធជនស្ម័គ្រប្រយុទ្ធរបស់ខ្លួន។ គឺទីភ្នាក់ងារ «Amaq» ដែលគេស្គាល់ថា ជាភ្នាក់ងារឃោសនា ឲ្យអង្គការភេរវនិយមមួយនេះ ជាអ្នកអះអាងដូច្នេះ នៅលើបណ្ដាញអ៊ិនធើណែត កាលពីប៉ុន្មានម៉ោងមុននេះ។

ដោយស្រង់ប្រភពមួយរបស់ក្រុមខ្លួន ទីភ្នាក់ងារឃោសនាបានសរសេរថា៖ «អ្នកវាយប្រហារ នៅមុខរដ្ឋសភាអង់គ្លេស កណ្ដាលរាជធានីឡុង គឺជាយុទ្ធជនដ៏អង់អាច របស់ក្រុមរដ្ឋអ៊ីស្លាម ហើយប្រតិបត្តិការនេះ ត្រូវបានដឹកនាំធ្វើ ដើម្បីឆ្លើយតបទៅនឹងការអំពាវនាវ ឲ្យធ្វើការសងសឹក ទៅលើក្រុមប្រទេសសម្ព័ន្ធមិត្ត (Editor's Note: ដែលបានធ្វើប្រតិបត្តិការយោធា ប្រឆាំងក្រុមរដ្ឋអ៊ីស្លាម នៅក្នុងប្រទេសស៊ីរី និងអៀរ៉ាក់)»។

ពីល្ងាចម្សិលម៉ិញ ជនបង្កដែលស្លៀកពាក់ពណ៌ខ្មៅ មានដុះពុកចង្កា និងពុកមាត់ បានបើក​រថយន្ដ​តូចមួយគ្រឿង ទៅ​បំបុក​អ្នក​ដំណើរ​ថ្មើរ​ជើង នៅលើស្ពាន «Westminster» នៅចំពីមុខ​នាឡិការ​សកល «Big Ben» បណ្ដាលឲ្យមនុស្សពីរនាក់ស្លាប់ និងច្រើននាក់ទៀត​រងរបួស។ បន្ទាប់​មក ជន​នេះ​បាន​កាន់​កាំបិត​ ចុះ​ចេញពីរថយន្ដ ទៅចាក់សម្លាប់​នគរបាលម្នាក់ទៀត នៅ​ខាង​មុខអា​គារ​រដ្ឋ​សភា​អង់គ្លេស មុន​នឹង​ព្យាយាម​​ចូល​​ទៅ​ក្នុង​​អាគារ​រដ្ឋសភា។ ប៉ុន្តែជនបង្ករូបនេះ ត្រូវបានកងកម្លាំងប្រចាំការ នៅទីនោះ បាញ់សម្លាប់។

នេះ ជាលើកទីមួយហើយ ដែលក្រុមរដ្ឋអ៊ីស្លាម បានចេញមុខប្រកាសទទួលស្គាល់ ការវាយប្រហាររបស់ក្រុមខ្លួន នៅលើទឹកដី​នៃ​ចក្រភព​អង់គ្លេស។ ជនបង្កភេរវកម្មខាងលើ ដែលត្រូវបានកង​កម្លាំងនគរបាលអង់គ្លេស បាញ់សម្លាប់នៅនឹងកន្លែង គឺជាអ្នកកាន់​សាសនា​អ៊ីស្លាម និយមជ្រុលម្នាក់ ធ្លាប់ត្រូវបានស្គាល់ ដោយចារកម្មអង់គ្លេសរួចហើយ។ នេះ បើតាមការប្រកាស របស់អ្នកស្រី ថេរីសា មេ (Theresa May) នាយករដ្ឋមន្ត្រីអង់គ្លេស កាលពីព្រឹកម៉ិញ៕