ហ៊ុន សែន ព្រមានចិនកុំឲ្យលូកដៃករណី គឹម សុខ
- ដោយ: ដារា រិទ្ធ ([email protected]) - ភ្នំពេញ ថ្ងៃទី១៣ កុម្ភៈ ២០១៧
- កែប្រែចុងក្រោយ: February 13, 2017
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
នាយករដ្ឋមន្ត្រីកម្ពុជា បានឆ្លៀតឱកាស នៃការដាក់បណ្ដឹងរបស់លោក ប្រឆាំងនិងអ្នកធ្វើអត្ថាធិប្បាយមួយរូប ទៅកាន់តុលាការ នៅព្រឹកថ្ងៃចន្ទនេះ ដើម្ប«ផ្លែផ្កា»ឲ្យសហរដ្ឋអាមេរិក និងព្រមានប្រទេសចិន ថាកុំឲ្យធ្វើអន្តរាគមន៍អ្វីទាំងអស់ នៅក្នុងករណីប្ដឹងផ្ដល់នេះ។
លោក ហ៊ុន សែន បានប្រើប្រាស់វេទិកា នៃពិធីសម្ពោធដាក់ឲ្យប្រើប្រាស់ នូវស្ពានបេតុង មិត្តភាព កម្ពុជា-ចិន កោះធំ ដើម្បីថ្លែងដូច្នេះ បន្ទាប់ពីលោកបានប្រកាសថា បានឲ្យមេធាវីរបស់លោក ដាក់ពាក្យបណ្ដឹងចូលទៅកាន់តុលាការ ដើម្បីប្ដឹងលោក គឹម សុខ ជុំវិញការធ្វើអត្ថាធិប្បាយមួយ របស់អ្នកវិភាគរូបនេះ ដែលធ្វើឲ្យលោក ហ៊ុន សែន និងគណបក្សប្រជាជនកម្ពុជារបស់លោក កើតទុក្ខមិនសុខចិត្ត។
មកដល់ចំណុចមួយ នាយករដ្ឋមន្ត្រីកម្ពុជា បាននិយាយរំលឹក ពីមនុស្សដែលលោក ប្ដឹងនោះ ថាមានអតីតកាល ស្និតនឹងគណបក្សហ្វុនស៊ីនប៉ិច ហើយធ្លាប់ទៅរៀន នៅក្នុងប្រទេសចិន កាលពីជំនាន់ហ្វុនស៊ីនប៉ិច នៅមានឥទ្ធិពលនៅឡើយ។ លោកបានថ្លែងឡើងថា៖ «ហើយម្នាក់ហ្នឹងរៀន នៅស្រុកចិនទៀតណា រៀននៅស្រុកចិន។ ហើយតិច ចិនមកចេញអន្តរាគមន៍។ កុំឲ្យសោះ។»។
ថ្លែងដោយងាកមុខ ទៅរកឯកអគ្គរដ្ឋទូតរបស់ប្រទេសចិន នៅខាងឆ្វេងដៃនោះ លោក ហ៊ុន សែន បានព្រមានថា៖ «តិច ឯកឧត្តមឯកអគ្គរដ្ឋទូត មកអន្តរាគមន៍ ឆឺយ! ហឹះ! កុំធ្វើដូចពួកអាមេរិក ! សុំប្រាប់មិត្តចិនឲ្យហើយ កុំធ្វើដូចពួកអាមេរិក។»។
គួរបញ្ជាក់ដែរថា ស្ពានដែលលោក ហ៊ុន សែន ទៅសម្ពោធនេះ ត្រូវបានសាងសង់ ដោយចំណាយថវិកាអស់ប្រមាណជា ១៩.៣៩លានដុល្លារអាមេរិក ដែលជាថវិកាកម្ចីឥណទាន ពីរដ្ឋាភិបាលចិន ខណៈថវិកាបដិភាគ របស់កម្ពុជា មានប្រមាណតែ ២.៨លានដុល្លារអាមេរិកប៉ុណ្ណោះ។ ស្ពានកោះធំនេះ តភ្ជាប់ពីផ្លូវជាតិលេខ២១ ត្រង់ចំណុចភូមិព្រែកធន់ ឃុំព្រែកថ្មី ស្រុកកោះធំ ត្រើយខាងលិចទន្លេបាសាក់ ឆ្លងទៅផ្លូវជាតិលេខ១១០ នៅប្របមាត់ទន្លេត្រើយខាងកើតទន្លេបាសាក់ ស្ថិតក្នុងភូមិព្រែកថ្មី ឃុំជ្រោយតាកែវ ស្រុកកោះធំ ខេត្តកណ្តាល៕