ដេវីដ បេកខាំ ឆ្លើយ​តប​រឿង​ប្រើ «Unicef» ដើម្បី​ប្រយោជន៍​ខ្លួន

នៅចំពោះរឿងអាស្រូវ ដែលអះអាងថា លោក ដេវីដ បេកខាំ (David Beckham) បាន​ប្រើប្រាស់​អង្គការ «Unicef» ដើម្បី​ប្រយោជន៍​ផ្ទាល់​ខ្លួន​នោះ អតីតកំពូលកីឡាកររូបនេះ បានសម្រេចចិត្ត​ងើបចេញ ពីភាព​ស្ងប់​ស្ងៀម ហើយ​បាន​ប្រតិកម្ម​តប​វិញ ថា​លោក​បាន​លះបង់​ច្រើនយ៉ាង ដើម្បីកិច្ចការ​មនុស្សធម៌ ជាពិសេសប្រាក់បៀវត្សន៍ ៥ខែ​ចុង​ក្រោយ​របស់លោក ដែលលោកបានលេង ជាមួយ​ក្រុម​បាល់ទាត់ នៃ​រដ្ឋធានីប៉ារីស ប្រទេស​បារាំង កាល​ពីឆ្នាំ​២០១៣។
ដេវីដ បេកខាំ ឆ្លើយ​តប​រឿង​ប្រើ «Unicef» ដើម្បី​ប្រយោជន៍​ខ្លួន
អតីតកីឡករ ដេវីដ បេកខាំ ពេលនៅទាត់ឲ្យក្រុមបាល់ទាត់ ប៉ារីសស៊ាំងហ្សែរម៉ាំង។ (រូបថត ក្រុមបាល់ទាត់)
Loading...
  • ដោយ: ជ័យវិបុល ([email protected]) - ប៉ារីស ថ្ងៃទី០៦ កុម្ភៈ ២០១៧
  • កែប្រែចុងក្រោយ: February 07, 2017
  • ប្រធានបទ: រឿងអាស្រូវបាល់ទាត់
  • អត្ថបទ: មានបញ្ហា?
  • មតិ-យោបល់

ឯកសារជាច្រើន ដែលធ្លាយចេញពី បណ្ដាញស៊ើបអង្កេតអ៊ឺរ៉ុបមួយ ហៅថា «Football Leaks» បាន​បង្ក​ភាព​ល្អក់​កករ ទៅដល់​រូបភាព​ដ៏ល្អល្អះ របស់អតីតកីឡាករបាល់ទាត់ ដេវិដ បេកខាំ (David Beckham)។ នៅ​ចំពោះការរកឃើញថា កីឡាករបានប្រើប្រាស់ ដើម្បីផលប្រយោជន៍ផ្ទាល់ខ្លួន នូវអង្គការ «Unicef» ដែល​ជា​អង្គការមនុស្ស​ធម៌​មួយ​ផ្នែក នៃអង្គការសហប្រជាជាតិ ទទួលបន្ទុកខាងកុមារនោះ លោក ដេវីដ បេកខាំ បាន​ចេញ​មុខ​ប្រតិកម្ម តាម​រយៈ​អ្នកនាំពាក្យខ្លួន ដោយអះអាង​ឡើងថា ប្រាក់បៀវត្សន៍​៥ខែ​ចុង​ក្រោយ ដែល​លោក​ទទួល​បាន ពី​ក្រុម​កីឡា ប៉ារីស (PSG - ក្នុងប្រទេសបារាំង) ក្នុង​ឆ្នាំ២០១៣ ត្រូវបាន​លោកប្រគល់​ជូន​ទាំងអស់ ដោយគ្មានខ្វះ​មួយ​សេន​ណា​ឡើយ ទៅឲ្យអង្គការ​មនុស្សធម៌​ជាច្រើន។

អ្នកនាំពាក្យបានអះអាងថា៖ «ដេវិដ បានគាំទ្រ​អង្គការ "Unicef" និងអង្គការ​មនុស្ស​មួយ​ចំនួន​ទៀត ក្នុង​រយៈ​ពេល​ច្រើន​ឆ្នាំ​មក​នេះ ក្នុងនោះ មានទាំងការផ្ដល់​វិភាគទាន នូវប្រាក់បៀវត្សន៍​ទាំងអស់ ដែល​លោក​ទទួល​បាន នៅ​ពេល​លោក​បានទាត់ ឲ្យ​ក្រុម​បាល់ទាត់ ប៉ារីសស៊ាំងហ្សែរម៉ាំង (Paris Saint germain ឬ PSG)»។

បណ្ដាញស៊ើបអង្កេតអ៊ឺរ៉ុប «Football Leaks» ដែលមានការចូលរួម ពីប្រព័ន្ធផ្សព្វផ្សាយ ប្រមាណ​ជា១២​ស្ថាប័ន​ធំៗ នៅ​ក្នុង​ទ្វីបអ៊ឺរ៉ុប បានអះអាងថា អតីតកំពូលកីឡាករ បានប្រើប្រាស់​អង្គការ​​មនុស្ស​ធម៌​​ទាំង​​នោះ ដើម្បី​ភាព​មាន​បាន​របស់​ខ្លួន។ សារព័ត៌មាន «Mediapart» នៅក្នុង​ប្រទេស​បារាំង បាន​សរសេរ​ថា៖ «ដេវិដ បេកខាំ បាន​ប្រើ​ប្រាស់ ​"Unicef" ក្នុង​ថានៈ​ខ្លួន​ជា​"អង្គទូត​​គោចរ" ដើម្បីពង្រីក​​ភាព​ល្បី​ល្បាញ​ និង​ដើម្បី​បង្កើន​ផល សម្រាប់​ជំនួញ​ផ្ទាល់​ខ្លួន»។

សារព័ត៌មាន​បានស្រង់ចម្លើយមួយ របស់លោក ដេវីដ បេកខាំ ដែលបានសរសេរ តបទៅ​មិត្តភ័ក្រ​របស់​ខ្លួន ឈ្មោះ​​លោក «Simon Oliveira» ដែលមាន​តួនាទី ជានាយក​ប្រតិបត្តិ​នៃ​ភ្នាក់ងារ «Doyen Global» មក​បញ្ជាក់​ថា៖ «ខ្ញុំគ្មាន​បំណង​ធ្វើវិភាគទាន ដោយប្រើប្រាស់​លុយផ្ទាល់ខ្លួនខ្ញុំ ទៅឲ្យ​បុព្វហេតុ​ដូច្នេះទេ»។ ចម្លើយ​នេះបាន​ធ្វើ​ឡើង បន្ទាប់ពីលោក «Simon Oliveira» បានផ្ដល់​យោបល់ ឲ្យអតីត​កីឡាករ​​ជាតិ​អង់គ្លេស​រូបនេះ ទៅ​ចូល​រួម​ក្នុង​ពិធី​លៀង​អាហារ​​ពេលល្ងាច ដើម្បីអំពើល្អមួយ នៅ​ក្នុង​ប្រទេស​កុងហ្គោ ឬទៅ​ចូលរួម ក្នុង​ពិធី​ផ្ដល់​មេដៃ​កិត្តិយស​មួយ នៅ​ក្នុង​ក្រុង សៀងហៃ ប្រទេស​ចិន។

លោក ដេវីដ បេកខាំ អតីតកីឡាករ ដែលធ្លាប់ទាត់​ឲ្យក្រុម ​មែនឆេស្ទ័រ​​យូណាយធីត (Manchester United) ដែរ​នោះ បាន​បន្តឆ្លើយ ទៅមិត្តភ័ក្រ​លោក​ទៀតថា៖ «ឲ្យប្រាក់រាប់លាន ទៅក្នុងមូលនិធិនេះ គឺដូចដាក់​ប្រាក់​ផ្ទាល់​ខ្លួន របស់​ខ្ញុំ​អញ្ចឹង។ បើគ្មាន​មូលនិធិ​នេះទេ លុយ​នោះ គឺជា​របស់​ខ្ញុំ។»។

ការស៊ើបអង្កេត បានរកឃើញទៀតថា នៅពេលដែលលោក ដេវីដ បេកខាំ បានចុះបេសកកម្ម ទៅ​កាន់​ប្រទេស​កម្ពុជា កាលពីខែ​មិថុនា ឆ្នាំ២០១៥ ក្រុមហ៊ុន «DBV» របស់​អតីត​កីឡាករ បាន​ផ្ញើរ​វិក័យប័ត្រ សម្រាប់​ទឹក​ប្រាក់ ៨០០០អ៊ឺរ៉ូ ទៅ​ឲ្យ​អង្គការ «Unicef»។ ប៉ុន្តែអង្គការ​មនុស្សធម៌​មួយនេះ បាន​បដិសេធ​ ត្រឡប់​ទៅការ​រក​ឃើញ​នេះ​ថា លោក ដេវីដ បេកខាំ បានធ្វើដំណើរ នៅក្នុងយន្ដហោះឯកជន ហើយមូលនិធិ (របស់អង្គការនេះ) មិនមាន​ខ្ទង់ចំណាយ ទៅលើសំបុត្រ​យន្ដហោះ​ណាមួយ ដែល​លោក ដេវិដ មិន​បាន​ទិញ (ដើម្បីធ្វើដំណើរ) នោះ​ទេ។

» អានអត្ថបទដែលទាក់ទង៖ «ដេវីដ បេកខាំ ជួយ​កុមារ​កម្ពុជា​តាម UNICEF៖ ភាព​ក្ដុក​ក្ដួល»

អង្គការ «Unicef» ដែលជាផ្នែកមួយ នៃអង្គការសហប្រជាជាតិ ទទួលបន្ទុកខាងកុមារ បានបន្ត​បដិសេធ មិន​ធ្វើ​អត្ថាធិប្បាយ ទៅលើការ​ចោទ​ប្រកាន់ទាំងអស់ ទៅលើអតីតកីឡាករទេ។ ផ្ទុយទៅវិញ អង្គការ «Unicef» បាន​សំដែង​នូវ​«មោទនភាព​ដ៏ខ្ពង់ខ្ពស់» ចំពោះទំនាក់ទំនង​ដែលអង្គការមាន ជាមួយ​លោក ដេវីដ បេកខាំ រាប់​ចាប់​តាំង ពី​ឆ្នាំ​២០១៥នោះមក។ សម្រាប់មនុស្ស ដែលនៅជុំវិញអតីត​កីឡាករវិញ បានហៅ​ការស៊ើប​អង្កេត របស់​បណ្ដាញ «Football Leaks» ថាគ្មាន​ការពិត និងយក​តែករណី «ខុសសាច់រឿង» មក​អះអាង ជា​​ពិសេស​រឿង ដែល​បណ្ដាញ​ស៊ើប​អង្កេត ទទួលបានតែ​ពីការលួចទូរសា នៅតាមបណ្ដាញ​អ៊ិនធើណែត៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...