បន្ទាប់ពីរឿងអាស្រូវ ក្នុងការលួចបន្លំសាច់សេះ ដាក់ក្នុងសាច់គោមក ពួកអ្នកប្រកបរបរអាជីប ទាក់ទងនឹងគ្រឿងឧបភោគ​បរិភោគ ត្រៀមខ្លួននឹងនិយាយពីតម្លាភាព នៅក្នុងសាច់ដែលពួកខ្លួនប្រើប្រាស់នៅក្នុងចានម្ហូប តែទន្ទឹមនឹងនេះ ពួកគេ​បាននិយាយចោទប្រកាន់អ្នកទទួលទាន ថាចង់បានតែតម្លៃថោកជ្រុល។

មើលទៅម្ហូបក្នុងភោជនីយដ្ឋាននេះ គួរអោយឆ្ងាញ់ តែវាជាសាច់អ្វី?

ជារឿងអាស្រូវដ៏ធំនៅអ៊ឺរ៉ុប ដែលចរាចរណ៍សាច់សត្វ ត្រូវបានគេរកឃើញថា មានការបន្លំយកសាច់សេះ មកដាក់ជំនួស​សាច់គោ នៅក្នុងមុខម្ហូបជាច្រើន ជាពិសេសនៅក្នុងម្ហូបដែលធ្វើរួចស្រេចដាក់កក លក់ក្នុងទីផ្សារធំៗ។

សូមអានអត្ថបទមុនរបស់មនោរម្យព័ងអាំងហ្វូ ដែលបានជម្រាបជូនរួចហើយ ពីពេលដែលរឿងអាស្រូវ​បានចាប់ផ្ដើម​ដំបូង។

នៅចំពោះមុខរឿងអាស្រូវនេះ ក្រុមអ្នកអន្តរាគមន៍ជាច្រើន រួមនឹងរដ្ឋាភិបាលបារាំងផង មានបំណងចង់អោយដាក់នូវ ការ​ខ្ចប់ម្ហូបអាហារទាំងនោះ ដោយជាតិផ្លាស្ទិកថ្លា ដោយថែមទាំងដាក់ប្រកាសថា សាច់ទាំងនេះមកទីណានោះទៀត។ ប៉ុន្តែ​បញ្ហាផ្លូវច្បាប់ ក៏ជារឿងមួយ ដែលគេត្រូវយកមកជជែកដូចគ្នា ទាក់ទងនឹងផ្លាកប្រកាសបញ្ជាក់ប្រភពនេះ។

ក្រុមហ៊ុនផ្សារទំនើប ការហ្វួរ (Carrefour) ដែលមានទីតាំងពាសពេញប្រទេសបារាំង និងនៅក្នុងប្រទេសមួយចំនួនទៀត បានកំពុងត្រួតពិនិត្យឡើងវិញ ជាមួយនឹងក្រុមហ៊ុនផ្គត់ផ្គង់ ពីផលិតផលម្ហូបអាហារ ដែលមានការសង្ស័យ ពីការលួច​បន្លំ​នេះ។ អគ្គលេខារបស់ក្រុមហ៊ុន លោក ហ្សេរ៉ូម ប៊េឌីយ៉េ (Jérôme Bédier) បាននិយាយបៀបធៀបនឹង បណ្ដាញ​ម៉ាហ្វីយ៉ា​មួយ ដែលគេគិតថា «វាមានគ្រោះថ្នាក់ តិចជាងការជួញគ្រឿងញៀន តែរកលុយបានច្រើនជាង ក្នុងការជួញផលិតផល​ចំណីអាហារ»។ លោកទាមទារ សុំអោយមានការប្រើប្រាស់ប្រព័ន្ធតុលាការ ដើម្បីដាក់ពិន័យទៅលើ​បណ្ដាញនៃការលួច​បន្លំនេះ។

នាយកប្រតិបត្តិរបស់ ក្រុមហ៊ុនកសិចំណីរអាហារ ម៉ាអីសសាឌួរ ម្នាក់ទៀត (Maïsadour) លោក ទីជែរី ប្លងឌីនីញ៉ែ (Thierry Blandinières) បានបន្ថែមទម្ងន់ទៀតថា មិនត្រឹមតែផលិតផលចំណីអាហារ ដែលដាក់លក់​ក្នុងទីផ្សារធំៗនោះ​ប៉ុណ្ណោះទេ តែគេក៏ត្រូវដាក់ពីផ្លាកប្រកាសនេះ នៅលើម្ហូបចំណីដែលគេធ្វើ នៅក្នុងបណ្ដាភោជនីយអាហារនានាដែរ។ បញ្ហានេះ បានត្រូវចាប់អារម្មណ៍ខ្លាំង នៅពេលដែលក្រុមហ៊ុនផ្គត់ផ្គងដ៏ធំមួយ របស់បារាំង ឈ្មោះណេស្លេ (Nestlé) បាន ប្រកាសពីសប្ដាហ៍មុន ពីវត្តមាននៃសាច់សេះ នៅក្នុងម្ហូបធ្វើស្រាប់ ធ្វើសម្រាប់លក់ទៅអោយ ភោជនីយដ្ឋាន។

សម្រាប់សហជីបអ្នកធ្វើភោជនីយដ្ឋានបារាំង វាជាពេលសមល្មមមួយ ដែលបណ្ដាចុងភៅគួរតែចំអិនចំណីអាហារ ទៅ​អោយអតិថិជន នូវម្ហូបអាហារដែលធ្វើភ្លាមៗ នៃសាច់ចេញពីប្រភពច្បាស់លាស់។ ហើយវិធានការទាំងនេះ សហជីប​ចង់​អោយមានការដាក់បន្ថែម ទៅក្នុងច្បាប់នៃបម្រើបម្រាស់ ដែលបានសន្យាដោយ រដ្ឋមន្ត្រីក្រសួងបម្រើបម្រាស់ផលិតផល លោក ប៊ើន័រ ហាម៉ុង (Benoît Hamon) ថានឹងចេញនៅរដូវក្ដៅខាងមុខ។

តែសហជីបអ្នកធ្វើភោជនីយដ្ឋានមួយទៀត ឈ្មោះ អ៊ុយមីហ៍ (Umih) ក៏បានថ្លែងការខ្វាយខ្វល់ដូចគ្នា ថា«តម្លៃដែល​ថោក​ជ្រុល នឹងមានហនិភ័យខ្ពស់» ជាពិសេសនឹងធ្វើអោយមានការលួចបន្លំ រវាងម្ហូបចំអិននៅក្នុងភោជនីយដ្ឋាន និងម្ហូប​ធ្វើរួច​លក់នៅក្នុងទីផ្សារធំៗ។ ប្រធានសហជីបនេះ ឈ្មោះរ៉ូឡង់ ហេហ្គី (Roland Héguy) បានចោទជាសំនួរថា «តើគេពន្យល់​ទៅអតិថិជន បានយ៉ាងដូចម្ដេច បើពីស្សា (pizza) មួយថ្លៃ១០អ៊ឺរ៉ូ នៅក្នុងភោជនីយដ្ឋាន តែគេអាចរកបាន​ពីស្សា ដដែល​នេះ ថ្លៃតែ១,៥០អ៊ឺរ៉ូ លក់នៅក្នុងផ្សារនោះ? បញ្ហា គឺមកពីតម្លៃថោកជ្រុលនេះហើយ ដែលជម្រុញធ្វើអោយគេកុហក។» លោកបន្ថែមថា «ដោយសារតែវិបត្តិសេដ្ឋកិច្ច ទឹកត្រី នឹងអាចត្រូវគេផ្លាស់ប្ដូរ ដោយទឹកអំបិល»៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២៥ ខែកុម្ភះ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ