ការប្រកួត រវាងក្រុមខ្លាំងទាំងពីរ នៅក្នុងប្រទេសបារាំង រវាងក្រម ប៉ារីស (PSG) និងក្រុមម៉ូណាកូ (Monaco) (លទ្ធផលនៃការប្រកួត ១-១) ក្នុងយប់ថ្ងៃអាទិត្យ ទី២៩ ខែមករានេះ បានទាក់ទាញចំណាប់អារម្មណ៍ ពី​ប្រិយមិត្ត​ដ៏ល្បីៗ​របស់ខ្លួន មិនតិចនាក់ទេ។ ប៉ុន្តែគ្មាននរណាដឹងជាមុនថា គ្រូបង្វឹករបស់​ក្រុម មែនឆេស្ទ័រ ស៊ីធី (Manchester City) លោក ប៉េប ហ្គ័រឌីយ៉ូឡា (Pep Guardiola) ក៏បានមក​អង្គុយ​​មើលការប្រកួតនេះ ដោយផ្ទាល់ដែរ​នោះ​ទេ។

ការបង្ហាញវត្តមានរបស់លោក ដ៏គួរឲ្យភ្ញាក់ផ្អើល ពីលើវេទិកានៃកីឡាដ្ឋាន «Parc des Princes» របស់​រដ្ឋធានី ប៉ារីស ត្រូវបានអ្នកផងគិតថា ដើម្បីមកឃ្លាំមើលបច្ចេកទេសទាត់ របសក្រុម ម៉ូណាកូ ដែលត្រូវជួប ជាមួយ​ក្រុម​ម្ចាស់​ផ្ទះ មែនឆេស្ទ័រ ស៊ីធី នៅ​ក្នុង​វគ្គ​១ភាគ៨​ផ្ដាច់​ព្រ័ត្រ នៃក្របខណ្ឌ «Champions's League» នៅថ្ងៃទី២១ ខែ​កុម្ភៈ​ខាងមុខ។ នោះគឺដោយ​សារ​​លោក ប៉េប មិនមែនមកតែម្នាក់ឯង ជាលក្ខណៈឯកជននោះទេ តែលោក​មាន​នាំ​មក​ជា​មួយ នូវគ្រូបង្វឹករង (ដែល​អង្គុយ​​នៅជាប់លោក ក្នុងរូបខាងក្រោម) ឈ្មោះ «Mikel Arteta» នោះផង។

ប៉ុន្តែ​ប្រភពមួយ ស្និតនឹងក្រុមបាល់ទាត់អង់គ្លេស បានបង្ហើបឲ្យដឹងថា លោក ប៉េប មិនគ្រាន់តែមក​មើល​បច្ចេក​ទេស​​ទាត់​បាល់ របស់ក្រុម ម៉ូណាកូ ប៉ុណ្ណោះ​ទេ តែលោកមកកាន់រដ្ឋធានីប៉ារីសនេះ ក៏ដើម្បីមករកមើល កីឡាករ​ជើង​ល្អ​មួយ​ចំនួន ដែលក្រុម មែនឆេស្ទ័រស៊ីធី បានរំពៃតាមដាន តាំងពីមួយរយៈមកហើយ ដូចជា​កីឡាករ​ស្បែក​ខ្មៅ របស់​ក្រុម ម៉ូណាកូ ឈ្មោះ «Tiémoué Bakayoko» នោះជាដើម។

សូមបញ្ជាក់ដែរថា ជំនួបសងសឹក រវាងក្រុមខ្លាំងទាំងពីរ (ក្រុមប៉ារីស និក្រុមម៉ូណាកូ) ក្នុងយប់ថ្ងៃអាទិត្យនេះ បាន​ទទួល​ប្រិយមិត្ត ដ៏កំពូល និងល្បីៗជាច្រើននាក់ មកអង្គុយទស្សនាផ្ទាល់ នៅក្នុងកីឡាដ្ឋាន ដែលស្ថិត​នៅ​ភាគ​នារតី នៃរ​ដ្ឋធានីប៉ារីស។ អ្នកទាំងនោះ ដែលគេស្គាល់ មានដូចជា ព្រះអង្គម្ចាស់ «Albert II» របស់ប្រទេស​ម៉ូណាកូ និង​កីឡាករ «Ronaldinho» របស់ប្រទេសប្រេស៊ីល ជា​ដើម៕