របបដឹកនាំក្រុងព្យុងយ៉ាង អាចនឹងឈាន ទៅរកការ«ដួលរលំ» ដោយសារ​បណ្ដាជន​កូរ៉េខាងជើង មាន​ចំនួន​កាន់​តែ​ច្រើន​ឡើង បានបែរខ្នងដាក់ខ្លួន។ នេះ ជាការអះអាង របស់អតីតមន្ត្រីការទូតជាន់ខ្ពស់ របស់​ប្រទេស​កូរ៉េ​ខាង​ជើង ដែលបានរត់មកជ្រកកោន នៅក្នុងប្រទេសកូរ៉េខាងត្បូង កាលពីខែសីហាកន្លងទៅ។

លោក «Thae Yong-ho» អតីតលេខាទូត ដែលជាមន្ត្រីថ្នាក់ទីពីរ នៃស្ថានទូតកូរ៉េខាងជើង ប្រចាំ​នៅ​រាជធានី ឡុងដ៍ ចក្រភពអង់គ្លេស បានថ្លែងដូច្នេះ​ជាសាធារណៈ នៅក្នុងសន្និសីទ​សារព័ត៌មាន​ដំបូង​មួយ​​របស់​​លោក ទៅ​កាន់​អ្នក​យក​​ព័ត៌មាន​​បរទេស​​ទាំង​ឡាយ។ លោកបានថ្លែងឡើងថា បណ្ដាជន​កូរ៉េខាងជើង កាន់តែ​ច្រើន​ឡើង បាន​ដើរ​តាម​គំរូរបស់លោក ដោយសារពួកគេ​​មើល​​ឃើញ​ថា របបកូរ៉េខាងជើង កំពុង​ស្ថិត​នៅលើ​ជំរាលធ្លាក់ចុះមួយ។ លោក​ថា៖ «ខ្ញុំគិតថា ថ្ងៃអង្សារបស់ គីម ជុង-អ៊ុន (Kim Jong-un) កាន់​តែ​ឈាន​​ជិត​​មក​​ដល់​​ហើយ»។

របបកុម្មុយនីសកូរ៉េ ត្រូវបានបង្កើតឡើង ដោយគ្រួសារ«មហា គីម» នៅឆ្នាំ១៩៤៨ និង​ត្រូវ​បាន​ដឹកនាំ ដោយ​គ្រួសារ​នេះ អស់បីជំនាន់​មក​ហើយ។ សព្វថ្ងៃ របបនេះ កំពុងស្ថិតក្រោមកណ្ដាប់ដៃដែក របស់​លោក គីម ជុង-អ៊ុន ដែល​បាន​ឡើង​កាន់​អំណាច ទាំងវ័យក្មេង បន្ទាប់ពីឪពុក​របស់​លោក ឈ្មោះ គីម ជុង-អីល (Kim Jong-il) បានទទួលមរណភាព កាលពី៥ឆ្នាំមុន។

ប៉ុន្តែ ភាពរឹងមាំនៃរបបកុម្មុយនីស មិនត្រូវបានមន្ត្រីរបស់ខ្លួន ជឿជាក់នោះទេ ដូច​យ៉ាង លោក «Thae Yong-ho» ជា​ដើម។ អតីតមន្ត្រីការទូតរូបនេះ បានទម្លាយឲ្យដឹងថា សមាជិកមេដឹកនាំយោធា ដែល​មាន​ចំនួន​​កាន់​តែច្រើន​ឡើង បាន«បែកខ្នង» ដាក់លោក គីម ជុង-អ៊ុន ហើយប្រព័ន្ធដឹកនាំ ដែលបង្កើត​ឡើង​គ្រួសារ​ត្រកូល គីម កំពុងស្រុតចុះ។ លោកបានពន្យល់ថា ដោយសារលោក ធ្លាប់មានតួនាទី ជាមន្ត្រីការទូត ហើយ​មាន​សិទ្ធិ អាច​ចូល​​ទៅ​​ក្នុង​​ប្រព័ន្ធ​​ព័ត៌មាន​​សំងាត់ៗ​​ជាច្រើន​នោះ ទើបលោកបានដឹង ពី«ថ្លើមប្រមាត់» របស់​របប​នេះ​យ៉ាង​ច្បាស់។

«ចាប់កូនៗ របស់អ្នកការទូត ធ្វើជាចំណាប់ខ្មាំង»...

លោក គីម ជុង-អ៊ុន ខ្លួនឯងក៏បានដឹង ពីរឿងនេះដែរ ជាពិសេស​តាម​រយៈ យុទ្ធនាការ«ចំរាញ់»​មិន​អាសូរ​មួយ ដែល​បាន​យក​មន្ត្រីជាន់ខ្ពស់ និងសំខាន់ៗ​ជាច្រើននាក់ យកទៅប្រហារជីវិត ទាំង​ជា​សាធារណៈ ទាំង​ជា​លក្ខណៈ​សំងាត់។ លោក «Thae Yong-ho» បានរៀបរាប់ថា មន្ត្រីការទូតជាទូទៅ ដែលត្រូវ​បាន​តែង​តាំង ឲ្យ​ទៅ​កាន់​តំណែង នៅឯបរទេស ត្រូវបានបង្ខំចិត្ត ឲ្យទុកកូនៗរបស់ពួកគេ នៅក្នុងប្រទេស ដើម្បី​ជា​ការ​«ធានា»​មួយ សម្រាប់​​ញ្ជាក់​​ពី​«ភក្ដីភាព» ទៅដល់របបកុម្មុយនីស។

អតីតមន្ត្រីការទូត បាននិយាយថា លោកមានសំណាងណាស់ ដោយសារ​លោក​មាន​លទ្ធភាព ចេញ​ទៅ​ធ្វើការ ​នៅ​ក្នុង​ចក្រភព​អង់គ្លេស ដោយមានកូនលោកទាំងពីរ (អាយុ១៩ និងអាយុ២៦ឆ្នាំ) ទៅ​ជា​មួយ។ លោក​បញ្ជាក់​ថា៖ «របប​របស់ គីម ជុង-អ៊ុន បានយកសេចក្ដីស្រឡាញ់ រវាងឪពុកម្ដាយ និងកូន មកធ្វើជា​ចំណាប់​ខ្មាំង ដើម្បី​គ្រប់​គ្រង​​នយោបាយ​​ការ​បរទេស ​របស់ប្រទេសកូរ៉េខាងជើង»។

សម្រាប់ប្រទេសកូរ៉េ​ខាងជើងវិញ ដែលមិនដែលអត់អោន ឲ្យជន«ក្បត់»ណាម្នាក់ ទាល់តែ​សោះ​នោះ ធ្លាប់​បាន​ប្រកាស​ចាត់​ទុក លោក «Thae Yong-ho» ថាជា​«មនុស្ស​កាក​សំណល់»មួយរូប បន្ទាប់ពី​អតីត​លេខា​ទូត​​ បាន​នាំ​ប្រពន្ធ និងកូនៗ​របស់លោក រត់មកជ្រកកោន នៅក្នុងប្រទេស​កូរ៉េខាងត្បូង។ របបកុម្មុយនីស ថែម​ទាំង​បាន​ចោទ​មន្ត្រី​រត់​ចោល​ជួររូបនេះ ថាបានលួច​កឹបកេង​ប្រាក់​​ក្នុង​ចំនួន​ដ៏ច្រើន បានរំលោភ​ក្មេង​មិន​ទាន់​គ្រប់​អាយុ និង​ជា​«គិញ​សំងាត់» របស់​ប្រទេស​កូរ៉េខាងត្បូង​នោះ​ទៀត៕