រដ្ឋមន្ត្រីព័ត៌មានផ្ដល់មេរៀន«ទី១» ឲ្យវិទ្យុ ABC និងអាចារ្យ A
- ដោយ: ដារី ([email protected]) - ភ្នំពេញ ថ្ងៃទី២៤ មករា ២០១៧
- កែប្រែចុងក្រោយ: January 24, 2017
- ប្រធានបទ: ប្រព័ន្ធផ្សព្វផ្សាយ
- អត្ថបទ: មានបញ្ហា?
- មតិ-យោបល់
-
ការព្រមានម្ដងជាពីរដង ដោយមិនចេញឈ្មោះ ពីសំណាក់លោករដ្ឋមន្ត្រី ទំនងជាមិនបានធ្វើឲ្យវិទ្យុមួយនេះ ស្កៀបជើងធ្មេញឡើយ រហូតបានប្រកាសសង្គ្រាម«ពាក្យសំដី»ជាចំហរ តាមរយៈកម្មវិធីរបស់ខ្លួនត្រឡប់មកវិញ ដោយលើកឡើងថា ក្រុមអ្នករិះគន់នោះ ទាំង«ហ្វូង» រួមទាំងលោករដ្ឋមន្ត្រីផង មិនយល់ពីអ្វី ដែលវិទ្យុខ្លួនកំពុងធ្វើ នៅក្នុងកម្មវិធី «ABC 3 spring» ដែលចាក់ផ្សាយផ្ទាល់ នៅតាមកញ្ចក់ទូរទស្សន៍ ប៉ុស្ដ៍លេខ៣។
ប៉ុន្តែភាពគឃ្លើនជាច្រើនដង ពីសំណាក់វិទ្យុនេះ បានជំរុញឲ្យក្រសួងព័ត៌មាន ធ្វើប្រតិកម្ម។ សេចក្ដីប្រកាសមួយ ដែលចេញផ្សាយ កាលពីរសៀលថ្ងៃទី២៤ ខែមករានេះ និងចុះហត្ថលេខា ដោយរដ្ឋមន្ត្រីព័ត៌មាន លោក ខៀវ កាញារីទ្ធ បានបង្គាប់ ទៅស្ថានីយ៍ទូរទស្សន៍ប៉ុស្ដ៍លេខ៣ តាមរយៈម្ចាស់ស្ថានីយ លោក ខាំពូន កែវមុណី ឲ្យបញ្ឈប់កិច្ចសហការផលិតកម្មវិធី ជាមួយវិទ្យុ អេប៊ីស៊ី ដែលជាកម្មសិទ្ធិ របស់លោក លោក សេង ប៊ុនវ៉េង ហៅ«អាចារ្យ A»។ ការបង្គាប់នោះ ត្រូវចូលជាធរមាន ជាបន្ទាន់ និងចាប់ពីថ្ងៃជូនដំណឹងនេះតទៅ។
ក្នុងលិខិតនោះ មានសរសេរថា ក្រសួងព័ត៌មាន បានឯកភាពអនុញ្ញាត ឲ្យធ្វើកិច្ចសហការ ជាមួយស្ថានីយវិទ្យុ ABC កម្ពុជា FM 107.50MHz ក្នុងការផលិតកម្មវិធីចម្រុះ ដើម្បីធ្វើការផ្សាយផ្ទាល់ តាមកញ្ចក់ទូរទស្សន៍ប៉ុស្តិ៍លេខ៣ រាជធានីភ្នំពេញ រយៈពេល៣ម៉ោង ក្នុងមួយថ្ងៃ ចាប់ពីម៉ោង ៦ ដល់ម៉ោង ៩ព្រឹក។
លិខិតបានបន្តទៀតថា៖ «ប៉ុន្តែបន្ទាប់ពីដំណើការកម្មវិធីនេះ (បាន)មួយរយៈខ្លីមក ធ្វើឱ្យមហាជនជាច្រើន ធ្វើការរិះគន់ទៅលើពិធីករ ពិធីការិនី កម្មវិធីចម្រុះ ABC 3 Spring ដែលបានប្រព្រឹត្តិ នូវអំពើពុំគួរគប្បី ដោយសម្តែងកាយវិការមិនសមរម្យ ការប្រើពាក្យសម្តី ខ្វះសីលធម៌ វិជ្ជាជីវៈ ជាអ្នកសារព័ត៌មាន និងបានប្រមាថមើលងាយអ្នកស្តាប់ ក៏ដូចជាទស្សនិកជន ក្នុងពេលកំពុងបំពេញភារកិច្ចរបស់ខ្លួន ដែលធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូ របស់ពិធីករ ពិធីការិនីផ្សេងទៀត»។
កាលពីប៉ុន្មានម៉ោងមុននេះ លោក ខៀវ កាញារីទ្ធ បានបង្ហោះសារមិនចំពោះមួយ នៅលើគណនេយ្យហ្វេសប៊ុក ព្រមានពីពិធីករ ពិធីការិនី «ឡឺត»មួយចំនួន ដែលមើលងាយសាធារណជន ថានឹងមិនត្រូវ ឲ្យមានវត្តមាន នៅលើប្រព័ន្ធផ្សព្វផ្សាយរដ្ឋនោះទេ។ លោកបានសរសេរថា៖ «ថ្ងៃនេះ ខ្ញុំបានណែនាំថា ពិធីករ ពិធីការិនីណា ដែលឡឺត រហូតមើលងាយសាធារណជន មិនត្រូវមានមុខ មានសំលេង នៅលើប្រព័ន្ធផ្សព្វផ្សាយរដ្ឋទេ ហើយបើស្ថានីយឯកជនណា ដែលចង់រក្សាតម្លៃវិជ្ជាជីវៈរបស់ខ្លួន អនុម័តជំហរនេះទៀត គឺជាការប្រសើរ»។
ការលើកឡើង របស់លោករដ្ឋមន្ត្រី បានធ្វើឡើងបន្ទាប់ពីកម្មវិធី «ABC 3 Spring» បានផ្សាយកាលពីព្រឹក នូវប្រតិកម្មខ្លាំងៗមួយចំនួន ធ្វើឡើងតាមរយៈ ពិធីករ ពិធីការិនី រួមនឹងលោក សេង ប៊ុនវ៉េង ផង ចាត់ទុកការរិះគន់ ពីសំណាក់បណ្ដាជន និងប្រិយមិត្តទស្សនិកជន ថាមានបំណងចង់«កៀប»វិទ្យុ «អេប៊ីស៊ី» មិនឲ្យ«បម្រើប្រិយមិត្តខ្មែរ» ដែលតែងចូលចិត្ត និងតាមដានស្ដាប់ ទស្សនានូវកម្មវិធីផ្សាយរបស់ខ្លួន។
ប្រតិកម្មរបស់វិទ្យុ «អេប៊ីស៊ី» កាលពីព្រឹកនេះ មានរាប់បញ្ចូល ការថ្លែងខ្លាំងៗ បាញ់ឆ្ពោះដោយត្រង់ៗ ទៅកាន់លោក ខៀវ កាញារីទ្ធ ដែលបានសរសេរសារ «មិនចំពោះ»មួយ កាលពីថ្ងៃអាទិត្យ នៅលើគណនេយ្យហ្វេសប៊ុកដដែលរបស់លោក ដូច្នេះថា៖ «បណ្តុះបណ្តាលពិធីករ ពិធីការិនី វិទ្យុ ទូរទស្សន៍ មិនមែនជាការលេងទេ ហើយរឹតតែមិនមែនងាយទៀត។ បណ្តុះបណ្តាល អ្នកនិយាយព័ត៌មាន ព្រោះមិនមែនគ្រាន់តែនិយាយ ឲ្យលឺនោះទេ ត្រូវមានទាំងសីលធម៌ មានទាំងចំណេះដឹង។ សូមថែរក្សាអាជីពនេះ ឲ្យថ្លៃថ្នូរ បើមិនដូចនេះទេ អាជីពនេះសូមធាក់អ្នកចេញហើយ !»។
» ទស្សនាការលើកឡើង របស់វិទ្យុ «អេប៊ីស៊ី» នៅក្នុងកម្មវិធី «ABC 3 Spring» នៅព្រឹកថ្ងៃអង្គារនេះ៖
រឿងរ៉ាវ បានផ្ទុះឡើងខ្លាំង កាលពីចុងសប្ដាហ៍កន្លងមក បន្ទាប់ពីពិធីការិនីវ័យក្មេងម្នាក់ បានបង្ហាញកាយវិការច្រងេងច្រងាង នៅក្នុងកម្មវិធីផ្សាយផ្ទាល់ខាងលើ រាប់ទាំងការលោតកន្លងតុ ការស្ទុះទៅទះតប់ (ទោះតិចតួចក្ដី) និងការប្រើប្រាស់ភាសាមិនសមប្រកប ខណៈកម្មវិធីខ្លួនកំពុងផ្សាយផ្ទាល់ នៅចំពោះទស្សនិកជនគ្រប់វ័យ រាប់ទាំងកុមារៗនោះផង។ កាយវិការខាងលើ របស់ពិធីការិនី ដែលបានរងការរិះគន់ខ្លាំងៗ ពីបណ្ដាប្រិយមិត្តរបស់ខ្លួននោះ ត្រូវបានវិទ្យុនេះបកស្រាយថា ជាការសំដែងសិល្បៈ ឬឈុតឆាកកំប្លែង។
គួរបញ្ជាក់ដែរថា នេះ មិនមែនជាលើកដំបូងទេ ដែលក្រសួងព័ត៌មាន ចេញមុខធ្វើប្រតិកម្ម តបនឹងលោក សេង ប៊ុនវ៉េង ឬវិទ្យុអេប៊ីស៊ីរបស់លោក។ កាលពីលើកមុន គឺនៅអំឡុងខែសីហាកន្លងទៅ ប្រតិកម្មខ្លាំងៗរបស់ក្រសួងបានកើតឡើង បន្ទាប់ពីលោក «អាចារ្យ អេ» ម្នាក់នេះ បានធ្វើអត្ថាធិប្បាយ តាមរយៈវិទ្យុរបស់ខ្លួន លើកពីស្ត្រីបម្រើការ នៅតាមហាងខារាអូខេថា «គួរលក់ខ្លួន ឲ្យអ្នកមានលុយ ជាជាងបន្តអង្គុយកំដរ (ឬផឹកស្រាបៀរ) ជាមួយភ្ញៀវ»។ ប្រតិកម្មរបស់ក្រសួងព័ត៌មានទាំងនេះ បានបន្ថែមតួលេខ ទៅក្នុងបញ្ជីប្រតិកម្មជាច្រើនផ្សេងទៀត មកពីមជ្ឈដ្ឋាននានា ក្នុងពេលកន្លងមក ប្រឆាំងនឹងស្ថានីយ៍វិទ្យុមួយនេះ ដែលតែងអួតអាងថា ខ្លួនបម្រើ-ជួយសង្គម និងមិនខ្វល់ពីកំហុស ដែលខ្លួនបានប្រព្រឹត្តិ ត្រឹមតែ «មួយ-ពីរ»។
កំហុស«មួយ-ពីរ» តែជាអំពើខុសច្បាប់។ នេះ បើគេត្រឡប់ទៅនិយាយ រំលឹកការយករថយន្ដ គិលានសង្គ្រោះ (ឬរថយន្ដដឹកសាកសព) របស់វិទ្យុមួយនេះ ទៅដឹកទឹកផ្លែឈើ«ខុសច្បាប់»ជាច្រើនហិប ដើរដាក់ឲ្យ«ម៉ូយ» និងបន្ទាប់មក នៅដើមខែសីហា រថយន្ដនេះត្រូវបាន ក្រុមអធិការកិច្ច របស់មន្ទីរសុខាភិបាលរាជធានី ធ្វើការឃាត់ទុក បង្កឲ្យមានសង្គ្រាមពាក្យសំដី យ៉ាងខ្លាំងក្លា។
ប៉ុន្តែ នៅពេលនោះ លោកនាយករដ្ឋមន្ត្រី ហ៊ុន សែន បានចេញមុខ មកការពារវិទ្យុមួយនេះ និងបែរជាដាក់កំហុស ទៅលើមន្ទីរសុខាភិបាលរាជធានីទៅវិញ។ ក្រោមហេតុផលថា មន្ទីរមិនបានធ្វើរបាយការណ៍ «ជូនទៅថ្នាក់លើ» លោក ហ៊ុន សែន បានដកអតីតប្រធានមន្ទីរ លោក សុខ សុគន្ធ ដែលជាមន្ត្រីរដ្ឋមួយរូប ចេញពីតំណែង។ នោះ ដោយគ្រាន់តែមន្ត្រីរូបនេះ បានអនុវត្តន៍ច្បាប់ដោយត្រឹមត្រូវ ប្រឆាំងនឹងវិទ្យុរបស់លោក «អាចារ្យ A» ប៉ុណ្ណោះ៕