«ប្រធានាធិបតី នៃសាធារណរដ្ឋ លោក ស៊ែរចូ ម៉ាតារ៉ែឡា (Sergio Mattarella) បានទទួលជួបលោកសាស្ត្រាចារ្យ ហ្សូហ្សេប៉េ កុងតេ (Giuseppe Conte) កាលពីរសៀលថ្ងៃពុធនេះ ដើម្បីលោកបានការអនុញ្ញាត ឲ្យទទួលអាណត្តិ ក្នុងការរៀបចំរដ្ឋាភិបាល» នេះ ជាការប្រកាសឡើង របស់លោក «Ugo Zampetti» នាយកខុទ្ទកាល័យ នៃប្រធានាធិបតីអ៊ីតាលី ទៅកាន់ក្រុមអ្នកយកព័ត៌មាន។

ការតែងតាំងលោក ពីសំណាក់ប្រធានាធិបតីអ៊ីតាលី មានលក្ខណៈជាទម្រង់ តាមពិធីការ និងកំណត់ដោយរដ្ឋធម្មនុញ្ញ។ ប៉ុន្តែមុនមកដល់​ការតែងតាំង​នេះ លោក ហ្សូហ្សេប៉េ កុងតេ ត្រូវបានជ្រើសរើស ជាឯកច្ឆ័ន្ទ ដោយគណបក្សនយោបាយពីរ ដែលទទួលសម្លេង​ឆ្នោត​ច្រើនជាងគេ ហើយសម្រេចចូលធ្វើសម្ព័ន្ធភាព ដើម្បីដឹកនាំរដ្ឋាភិបាល។ គណបក្សទាំងពីរនោះ គឺគណបក្សចលនាផ្កាយប្រាំ និងគណបក្សសម្ព័ន្ធ។

សង្គ្រាមប៉ាកកា រឿងកុហក​ពីបទពិសោធន៍ការងារ...

យ៉ាងណា លោក ហ្សូហ្សេប៉េ កុងតេ បានរងការរិះគន់ ថាបានកុហក ជុំវិញប្រវត្តិការងាររបស់លោក។ លោកបានលើកឡើង ពីកិច្ចការផ្នែកច្បាប់ ជាច្រើន ដែលលោកបានធ្វើ នៅក្នុងសាកលវិទ្យាល័យដ៏ល្បីៗ នៅឯបរទេស។ ប៉ុន្តែសាកលវិទ្យាល័យញ៉ូយក (New York University - NYU) ដែលស្ថិតក្នុងចំណោមសាកលវិទ្យាល័យ ដែលលោកអះអាងនោះ បានបញ្ជាក់ថា គ្មានឈ្មោះ ហ្សូហ្សេប៉េ កុងតេ នៅក្នុងបញ្ជីមន្ត្រីបុគ្គលិករបស់ខ្លួនទេ៕