ជម្លៀសពលរដ្ឋ៥៤០០០នាក់ចេញ ព្រោះរកឃើញគ្រាប់បែកសល់ពីសង្គ្រាមលោក
- ដោយ: សេក មនោរកុមារ ([email protected]) - បារីស ថ្ងៃទី២៦ ធ្នូ ២០១៦
- កែប្រែចុងក្រោយ: December 27, 2016
- ប្រធានបទ: គ្រាប់មិនទាន់ផ្ទុះ
- អត្ថបទ: មានបញ្ហា?
- មតិ-យោបល់
-
ការជម្លៀសពលរដ្ឋ ប្រមាណជា ៥៤០០០នាក់ ចេញពីក្រុង អូស្បួរ (Augsbourg - ភាគខាងត្បូងអាល្លឺម៉ង់) ត្រូវបានធ្វើឡើង នៅព្រឹកថ្ងៃទី២៥ ខែធ្នូ គឺនៅចំថ្ងៃបុណ្យណូអែល (ឬគ្រឹស្មាស) នោះតែម្ដង។ ហើយភ្នាក់ងារនគរបាល ចំនួន៩០០នាក់ ត្រូវបានបញ្ជូន មកធ្វើកិច្ចការនេះ ដែលជាការជម្លៀសខ្លួនដ៏ធំ មិនដែលធ្លាប់មាន រាប់ចាប់តាំងពី ពីសម័យសង្គ្រាមលោកមក។ នេះបើតាមការប្រកាសឲ្យដឹង របស់អាជ្ញាធរក្រុង ហើយត្រូវបានសារព័ត៌មានអាល្លឺម៉ង់ យកចេញមកផ្សាយ នៅក្នុងថ្ងៃដដែល។
មូលហេតុបណ្ដាល ឲ្យមាការជម្លៀសពលរដ្ឋចេញនេះ ដោយសារ គ្រាប់បែកមួយគ្រាប់ ទំងន់១,៨តោន ត្រូវបានរកឃើញ នៅក្នុងការដ្ឋានសាងសង់មួយ កណ្ដាលទីក្រុង កាលពីថ្ងៃទី២០ ខែធ្នូកន្លងមក។ គ្រាប់បែកនេះ ជារបស់កងទ័ពចក្រភពអង់គ្លេស ដែលត្រូវបានដឹកតាមយន្ដហោះ មកទម្លាក់នៅទីនោះ នៅក្នុងការវាយប្រយុទ្ធ រវាងក្រុមកងទ័ពសម្ព័ន្ធមិត្ត (អាមេរិក អង់គ្លេស បារាំង រ៉ូស្ស៊ី កាណាដា...) ប្រឆាំងនឹងក្រុមហ្វាស៊ីសអាល្លឺម៉ង់ កាលពីសង្គ្រាមលោកលើកទីពីរ។ ប៉ុន្តែ គ្រាប់បែក មិនបានផ្ទុះទេ។
ផ្ទុយពីអាយុកាលរបស់វា តែអាវុធដ៏កញ្ចាស់នេះ នៅតែមានគ្រោះថ្នាក់ និងអាចផ្ទុះបានគ្រប់ពេល។ ដូច្នេះហើយ ទើបអាជ្ញាធរបានជ្រើសរើសយក ថ្ងៃបុណ្យណូអែល ដើម្បីកំទេច ឬដកបង្កៃផ្ទុះចេញពីគ្រាប់បែក ដោយហេតុថា នៅកណ្ដាលក្រុងក្នុងថ្ងៃនោះ មានសភាពស្ងប់ស្ងាត់... ហាងលក់ទំនិញ និងការិយាល័យធ្វើការទាំងឡាយ បានបិទទ្វា។ អាជ្ញាធរបានកំណត់យក ផ្ទៃក្រឡាដីចំនួន ១,៥គីឡូម៉ែត្រ ព័ទ្ធជុំវិញគ្រាប់បែក ជាតំបន់ដែលមានហនិភ័យខ្ពស់។
នៅក្នុងវីដេអូមួយ ដែលបង្ហោះនៅតាមបណ្ដាញសង្គម អភិបាលក្រុង «Augsbourg» លោក «Kurt Gribl» បានឲ្យដឹងថា៖ «នៅថ្ងៃនេះ ខ្ញុំសូមស្នើទៅបណ្ដាជន ដែលស្ថិតក្នុងតំបន់នេះ ឲ្យចាកចេញដោយខ្លួនឯង តាមតែអាចធ្វើទៅបាន»។ ជម្រកបណ្ដោះអាសន្ន ដូចជាសាលារៀន ឬអាគារកីឡាធំៗ ត្រូវបានបង្កើតឡើង សម្រាប់ជនទាំងឡាយណា ជាពិសេសជនជរាពិការ ដែលគ្មានលទ្ធភាពចាកចេញ ទៅឆ្ងាយ ឬអ្នកដែលគ្មានគ្រួសារ។
នៅសល់ ៣០០០គ្រាប់ទៀត នៅក្រោម... ប៊ែរឡាំង!
អាជ្ញាធរបានបញ្ជាក់បន្ថែមថា ប្រតិបត្តិការកំទេច ឬដកបង្កៃផ្ទុះ របស់គ្រាប់បែក ត្រូវបានធ្វើ ចាប់ពីវេលាថ្ងៃត្រង់ ហើយបានប្រើពេលរហូតដល់ទៅ៥ម៉ោង។
ទោះជាសង្គ្រាមលោក បានកន្លងផុតទៅ ជាង៧០ឆ្នាំហើយក៏ដោយ តែទឹកដីអាល្លឺម៉ង់ នៅតែមានសណ្ឋាន ជាចំការបង្កប់គ្រាប់បែក ដែលមិនទាន់ផ្ទុះនៅឡើយ។ គ្រាប់បែកទាំងនោះ តែងអណ្ដែត ឬត្រូវបានរកឃើញមកវិញជារឿយៗ មកដល់សព្វថ្ងៃ។ អាជ្ញាធរអាល្លឺម៉ង់ បានរំពឹងថា គ្រាប់បែកសល់ពីសង្គ្រាមលោក ដែលនៅមិនទាន់ផ្ទុះ ចំនួន៣០០០គ្រាប់បែកទៀត កំពុងសំងំលាក់ខ្លួនយ៉ាងស្ងប់ស្ងៀម នៅខាងក្រោមដីនៃរដ្ឋធានី ប៊ែរឡាំង៕