ត្រាំ ចោទ អូបាម៉ា ថាបង្កើតឧបសគ្គក្នុងការផ្ទេរតំណែង
- ដោយ: សុបិន្ដ ([email protected]) - ម៉ុងរ៉េអាល់ ថ្ងៃទី ២៩ ធ្នូ ២០១៦
- កែប្រែចុងក្រោយ: December 30, 2016
- ប្រធានបទ: ឆ្ពោះទៅសេតវិមាន
- អត្ថបទ: មានបញ្ហា?
- មតិ-យោបល់
-
ប្រធានាធិបតីអាមេរិក ដែលទើបនឹងជាប់ឆ្នោត លោក ដូណាល់ ត្រាំ (Donald Trump) បានសរសេរចោទប្រធានាធិបតីផុតតំណែង លោក បារ៉ាក់ អូបាម៉ា (Barack Obama) ថានៅតែបានលើកឡើង នូវសំដីអុចអាល និងបង្កើតនូវឧបសគ្គ ដែលនាំឲ្យរំខាន ដល់ការចូលមកកាន់តំណែងរបស់លោក ក្នុងពេលខាងមុខ។
លោក ដូណាល់ ត្រាំ បានសរសេរនៅលើទំព័រទ្វីសធើរ (Twitter) របស់លោកថា៖ «ខ្ញុំបានធ្វើគ្រប់លទ្ធភាពរបស់ខ្ញុំ ដើម្បីបញ្ជៀសឧបសគ្គជាច្រើន និងការថ្លែងបែបអុចអាល របស់ប្រធានាធិបតី អូ (បាម៉ា)។ ខ្ញុំបានគិតថា ការផ្ទេរតំណែង នឹងប្រព្រឹត្តិទៅ ដោយរលូន។ តែនេះ មិនអញ្ចឹងទេ!»។
ប៉ុន្តែលោក ត្រាំ មិនបានលំអិតថា «សំដីអុចអាល» របស់លោក អូបាម៉ា នោះ បានធ្វើឡើង នៅត្រង់ចំណុចណា និងនៅពេលណាឡើយ។
ពីរថ្ងៃបន្ទាប់ពីការបោះឆ្នោត នៅដើមខែវិច្ឆិកា រដ្ឋបុរសទាំងពីរបានជួបគ្នា នៅក្នុងការិយាល័យប្រធានាធិបតី នាសេតវិមាន ដោយបានព្យាយាម ទម្លាក់ចោលនូវភាពតឹងតែង ដែលកើតមានឡើង ក្នុងការឃោសនាបោះឆ្នោត តាំងពីច្រើនខែមកហើយ ហើយជំនួសមកវិញ នូវបំណងប្រាថ្នាធ្វើយ៉ាងណា ឲ្យការផ្លាស់ប្ដូរតំណែង ប្រព្រឹត្តិទៅដោយសន្តិវិធី។
ប៉ុន្តែរឿងមួយ ដែលគេឃើញថា មានការខ្វែងគំនិត ក្នុងពេលនេះ រវាងលោកទាំងពីរ មានជាប់ទាក់ទងនឹងបញ្ហាអ៊ីស្ត្រាអែល និងប៉ាឡេស្ទីន។ ខណៈរដ្ឋាភិបាលអាមេរិក បានចូលរួមគាំទ្រដំណោះស្រាយ របស់អង្គការសហប្រជាជាតិ ដែលបានថ្កោលទោស អ៊ីស្ត្រាអែល ក្នុងការសាងសង់លំនៅដ្ឋានថ្មី ក្នុងតំបន់់ដែលមានជម្លោះនោះ លោក ដូណាល់ ត្រាំ បានបង្ហោះសារនៅលើបណ្ដាញសង្គម សំដែងការគាំទ្រ ចំពោះប្រទេសអ៊ីស្ត្រាអែលទៅវិញ។
ប្រធានាធិបតីជាប់ឆ្នោតថ្មី បានសរសេរនៅលើទំព័រទ្វីសធើរថា៖ «យើងមិនអាចបន្ត ទុកឲ្យប្រទេសអ៊ីស្ត្រាអែល រងនូវការម៉ាក់ងាយ និងគ្មានការគោរពយ៉ាងដូច្នេះទេ។ វាជាប្រពៃណីទៅហើយ ដែលសហរដ្ឋអាមេរិក មានមហាមិត្តមួយ (ដូចប្រទេសអ៊ីស្ត្រាអែល) ប៉ុន្តែពេលនេះ មិនអញ្ចឹងឡើយ។ (...) រឹងប៉ឹងឡើង អ៊ីស្ត្រាអែល! ថ្ងៃទី២០ ខែមករា (ថ្ងៃដែលលោក ត្រាំ ចូលស្បថកាន់តំណែង) ជិតមកដល់ហើយ។»។
ជាលើកទីមួយ រាប់ចាប់តាំងពីឆ្នាំ១៩៧៩មក ដែលសហរដ្ឋអាមេរិកមិនបានប្រើសិទ្ធិ «វេតូ (Veto)» របស់ខ្លួន ដើម្បីបង្អាក់ មិនឲ្យដំណោះស្រាយមួយ របស់អង្គការសហប្រជាជាតិ ធ្វើការថ្កោលទោស ការសង់លំនៅដ្ឋានថ្មីៗ របស់អ៊ីស្ត្រាអែល នៅលើតំបន់ដែលមានជម្លោះ រវាងអ៊ីស្ត្រាអែល និងប៉ាឡេស្ទីន។ ហេតុការណ៍ បានបង្កឲ្យប្រទេស ដែលសំបូរដោយអ្នកកាន់សាសនាជីហ្វមួយនេះ ផ្ទុះកំហឹងឡើង ព្រោះការមិនប្រើសិទ្ធិ «វេតូ» នេះ បានធ្វើឲ្យដំណោះស្រាយ ដែលយល់ព្រម ដោយប្រទេសសមាជិកទាំង១៤ របស់ក្រុមប្រឹក្សាសន្តិសុខ ត្រូវបានអនុម័ត និងចូលជាធរមាន៕