ទីភ្នាក់ងារ «Amaq» ដែលជាឧបករណ៍ឃោសនា របស់ក្រុមរដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​​ហៅ EI អង់គ្លេស​​​​ហៅ ISIS) បានបង្ហោះនៅល្ងាចថ្ងៃសុក្រនេះ បង្ហាញពីជនសង្ស័យជាតិទួនេស៊ី អាយុ​២៤ឆ្នាំ ដែល​ទើប​នឹង​ត្រូវ​​នគរបាល​​អ៊ីតាលី បាញ់សម្លាប់កាលពីព្រឹកព្រហាម ថ្ងៃដដែលនេះ។

ក្នុងវីដេអូនោះ (ដាក់ជូនខាងក្រោម) ជនសង្ស័យឈ្មោះ អានីស អាមរី (Anis Amri) បានធ្វើការស្បថស្បែ បម្រើ​ប្រមុខ​ដឹកនាំ​អង្គការភេរវនិយម ឈ្មោះ អាប៊ូ បាក្រ៍ អាល់បាដាឌី (Abou Bakr al-Baghdadi) យ៉ាង​ស្មោះ​ស្ម័គ្រ និង​ដោយ​ឥត​ងាករេ។ ជនសង្ស័យ ដែលពាក់អាវរងារ ឈរថតវីដេអូនេះ នៅលើស្ពានមួយ បាន​ថ្លែង​ឡើង​ថា ខ្លួន​មាន​បំណង​ចង់​សង​សឹក ឲ្យបណ្ដាជនម៉ូស្លីមទាំងឡាយ ដែលបានរងគ្រោះ ព្រោះការវាយប្រហារ តាម​ផ្លូវ​អាកាស ពី​សំណាក់​ក្រុម​សម្ព័ន្​ធមិត្ត «ឈើ​ឆ្កាង (និមិត្តសញ្ញារបស់សាសនាគ្រឹស្ទ៍)»។

ថ្ងៃខែពេលវេលា និងទីកន្លែង ដែលជននេះ បានថតវីដេអូនេះ មិនត្រូវបានបញ្ជាក់ទេ។

កាលពីព្រឹកថ្ងៃសុក្រ ប៉ុន្មានម៉ោង​ក្រោយ​ការ​បាញ់​សម្លាប់​ជនសង្ស័យ ពីសំណាក់នគរបាលអ៊ីតាលី នៅក្រុង​មីឡង់ (Milan - ភាគខាងជើងអ៊ីតាលី) ក្រុមរដ្ឋអ៊ីស្លាម​ក៏បានចេញសេក្ដីប្រកាសព័ត៌មានមួយដែរ បញ្ជាក់​ថា​ជន​ដែល​ត្រូវ​បាញ់​ស្លាប់នោះ ពិតជាអ្នកកាន់ចង្កូតរថយន្ដ បើកបុកចូលហ្វូងមនុស្ស នៃផ្សារាត្រី​សម្រាប់​បុណ្យ​ណូអែល​​មួយ នៅភាគខាងលិច​រដ្ឋធានី​ប៊ែរឡាំង កាលពីយប់ថ្ងៃចន្ទ ដែលបានធ្វើឲ្យមនុស្ស១២នាក់ស្លាប់ និង​៥០នាក់​រង​របួស។

» វីដេអូរបស់ក្រុមរដ្ឋអ៊ីស្លាម បង្ហាញពីការស្បថស្បែ របស់ជនសង្ស័យ៖

Vidéo d'allégeance du #terroriste #AnisAmri a daesh. Il dit avoir vengé le sang des musulmans tués par l'Occident pic.twitter.com/8WpnLKxMqT

— pat (@natypatou) 23 décembre 2016