ហ៊ីង ប៊ុនហៀង ប្រតិកម្ម​តប​អាមេរិក​ខ្លាំងៗ... ថា​នឹង​ប្ដេជ្ញាការពារ ហ៊ុន សែន និង​គ្រួសារ

នៅក្នុងប្រតិកម្មដោយផ្ទាល់ របស់លោក ហ៊ីង ប៊ុនហៀង ទៅនឹងទណ្ឌកម្មរបស់សហរដ្ឋអាមេរិក លោកមេបញ្ជាការកងអង្គរក្ស ដែលជាមនុស្សជំនិត របស់លោក ហ៊ុន សែន បានថ្លែងបកទៅសហរដ្ឋអាមេរិក​ថា លោកប្ដេជ្ញាការពារសុវត្ថិភាព ជូនលោក ហ៊ុន សែន និងក្រុមគ្រួសារ ឲ្យបានជាដាច់ខាត។
ហ៊ីង ប៊ុនហៀង ប្រតិកម្ម​តប​អាមេរិក​ខ្លាំងៗ... ថា​នឹង​ប្ដេជ្ញាការពារ ហ៊ុន សែន និង​គ្រួសារ
រូបខាងមុខ ពីឆ្វេងទៅស្ដាំ៖ លោក ហ៊ីង ប៊ុនហៀង និងលោក ហ៊ុន សែន។ (រូបថតសហការី)
Loading...
  • ដោយ: មនោរម្យ.អាំងហ្វូ ([email protected]) - ប៉ារីស ថ្ងៃទី១៥ មិថុនា ២០១៨
  • កែប្រែចុងក្រោយ: June 15, 2018
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

បើរដ្ឋាភិបាលសហរដ្ឋអាមេរិក ដាក់លោក ហ៊ីង ប៊ុនហៀង ចូលក្នុងបញ្ជីខ្មៅ នៃការបង្កកទ្រព្យសម្បត្តិ និងការហាមជាន់ទឹកដីអាមេរិនោះ ក៏ព្រោះតែប្រទេសមហាអំណាច បានរកឃើញថា លោកមេបញ្ជាការ កងអង្គរក្ស​នាយករដ្ឋមន្ត្រី​រូបនេះ មានជាប់ពាក់ព័ន្ធដោយផ្ទាល់ និងនៅពីក្រោយ នៃការរំលោភសិទ្ធិមនុស្សដ៏ធ្ងន់ធ្ងរ និងការបង្ក្រាបនានា ដែលធ្វើឲ្យមានស្លាប់ និងរបួសជាច្រើន។

ផ្ទុយទៅវិញ នៅក្នុងប្រតិកម្មដោយផ្ទាល់ របស់លោក ទៅនឹងទណ្ឌកម្មខាងលើ លោក ហ៊ីង ប៊ុនហៀង ដែលជាមនុស្សជំនិត របស់លោក ហ៊ុន សែន បានថ្លែង ទៅកាន់សហរដ្ឋអាមេរិកថា លោកត្រៀម​ខ្លួន​ជានិច្ច​ ដើម្បី​«វាយបក​​ទៅ​លើ​ជន​អាមេរិក​ណា ​ដែល​មិន​គោរព​នូវ​អធិបតេយ្យភាព ​នៃ​ប្រទេស​ឯករាជ្យ​មួយ​ ព្រម​ទាំង​មាន​មហិច្ឆតា​ឈ្លានពាន» ​មក​លើ​ប្រទេស​កម្ពុជា ហើយដែល​ថែម​ទាំង​បាន​​«គាំទ្រ និង​ញុះញង់​ពួកក្បត់​ជាតិ​» ដែល​មាន​ក្នុង​ប្រទេស​កម្ពុជា។

នៅក្នុងលិខិតមួយរបស់លោក ហ៊ីង ប៊ុនហៀង ដែលចេញផ្សាយ កាលពីថ្ងៃម្សិលម៉ិញ ឧត្ដមសេនីយផ្កាយមាសបួនរូបនេះ បានបន្តអះអាង​ថា លោកត្រៀម​ខ្លួន ​ដើម្បី​ទប់ស្កាត់ និង​ប្រឆាំង​ដាច់ខាត ​ចំពោះ​«ជន​ក្បត់ជាតិ និង​បក្ខពួក​ប្រឆាំង ​ដែល​មាន​បំណង​ធ្វើ​បដិវត្តន៍​ពណ៌ ​នៅ​កម្ពុជា​ [និងដែល]មាន​បរទេស​នៅ​ពី​ក្រោយ​ខ្នង»។ លោក ហ៊ីង ប៊ុនហៀង បានថ្លែងឲ្យដឹងទៀតថា ​លោក«ប្ដេជ្ញាការពារសន្តិសុខសុវត្ថិភាព» ជូនលោក ហ៊ុន សែន និងភរិយា រួមនឹងក្រុមគ្រួសារ ឲ្យ«បានជាដាច់ខាត»។

លោក ហ៊ីង ប៊ុនហៀង ជាមន្ត្រីរដ្ឋាភិបាលកម្ពុជាដំបូងគេ ដែលរងការចាត់វិធានការក្ដៅ ពីសំណាក់រដ្ឋាភិបាល​សហរដ្ឋ​អាមេរិក ដែលបានរក​ឃើញថា មេបញ្ជាការ​កងអង្គរក្សរូបនេះ បានចូលរួម​ដោយផ្ទាល់ ក្នុងការរំលោភ​​សិទ្ធិមនុស្ស​​​ធ្ងន់ធ្ងរ ក្នុង​​រយៈ​ពេល​ ជា​ច្រើន​​ឆ្នាំ​​កន្លងមក​ ជាពិសេសនៅក្នុងការ​បង្រ្កាប​ លើ​​ក្រុម​​អ្នក​តវ៉ា និង​សកម្មជន​​បក្ស​ប្រឆាំង ដូចជា​ការ​​បោក​គ្រាប់​​បែក​​ លើ​អ្នក​តវ៉ា​អហិង្សា នៅខាងមុខរដ្ឋសភាចាស់ កាល​ពី​ឆ្នាំ​១៩៩៧ ដែល​​ធ្វើ​​ឲ្យ​​ស្លាប់​ និង​របួស​​មនុស្ស​ ជា​ច្រើន​នាក់ រួមទាំង​​របួស​​ពលរដ្ឋ​​អាមេរិក ​​មួយ​រូប​​ផង។

» អត្ថបទដែលទាក់ទង៖ ហ៊ីង ប៊ុនហៀង ត្រូវ​អាមេរិក​ដាក់​ចូល​បញ្ជីខ្មៅ​ ដែល​​ត្រូវ​​បង្កក​​ទ្រព្យ​មុន​​គេ

ទណ្ឌកម្ម ដែលកំណត់ដាក់​ប្រឆាំងរូបលោក ហ៊ីង ប៊ុនហៀង ត្រូវបានធ្វើឡើង​ នៅ​ក្រោមច្បាប់ «GLOBAL MAGNITSKY» ដែលមានរូបរាង​នៅក្នុងឆ្នាំ២០១២ (រដ្ឋបាលរបស់ប្រធានាធិបតី បារ៉ាក់ អូបាម៉ា)។ ច្បាប់នេះ ដែលពង្រីកវិសាលភាព ជាលក្ខណៈសកល នៅឆ្នាំ២០១៦ នឹងអនុញ្ញាតឲ្យនាយកដ្ឋាន​រតនាគារ​ជាតិអាមេរិក ចាត់​​វិធានការ​ទាំង​ឡាយ ដើម្បី​​បង្កក​ទ្រព្យ​សម្បត្តិ មិនផ្ដល់ទិដ្ឋការ ឬបង្កក​ផល​ប្រយោជន៍​​ផ្សេង​ទៀត​ ដែល​ពាក់ព័ន្ធ​នឹង​​លោក ហ៊ីង ប៊ុន​ហៀង។ ច្បាប់ដដែលនេះ ក៏​នឹង​​ហាម​ឃាត់​​​ជនជាតិ​​​អាមេរិក​​​ឯ​ទៀតៗ មិន​​ឲ្យ​​រកស៊ី ឬ​ទាក់ទង​​ជាមួយ​លោក ហ៊ីង​ ប៊ុនហៀង ​នោះដែរ។

ប៉ុន្តែលោក​ ហ៊ីង ប៊ុនហៀង បានបញ្ជាក់​តបទៅអាមេរិក​ទៀតថា លោកជាពលរដ្ឋខ្មែរ ដូច្នេះលោកមិនចាំបាច់គោរព តាមច្បាប់អាមេរិក ហើយក៏គ្មានទ្រព្យសម្បត្តិ សម្រាប់ទុកឲ្យសហរដ្ឋអាមេរិកបង្កក ក៏ដូចជាគ្មានបំណង ចង់មានទំនាក់ទំនង ជាមួយបណ្ដាជនអាមេរិក ឬក៏ទៅជាន់ទឹកដីអាមេរិកនោះដែរ។

សម្រាប់អតីតអ្នកច្បាប់ខ្មែរមួយរូប លោក ព្រហ្ម គិត ដែលសព្វថ្ងៃ​កំពុងរស់នៅ​ក្នុង​ប្រទេស​បារាំង បានសំដែងក្ដីសង្ស័យ ទៅលើខ្លឹមសារឆ្លើយតបមួយចំនួន របស់លោក ហ៊ីង ប៊ុនហៀង ដែលហាក់ដូចជាគ្មានទាក់ទង នឹងសហរដ្ឋអាមេរិកទាល់តែសោះ។ លោក ព្រហ្ម គិត បានបញ្ជាក់ថា៖ «តាមខ្ញុំសង្កេតមើលទៅ ប្រតិកម្មតបអាមេរិកវិញនេះ មានលក្ខណៈជាការការពារខ្លួន ពីគោលការណ៍ "ពាលស៊ីពាល" នៅក្នុងគណបក្សប្រជាជនកម្ពុជា ដែលពួកគេតែងតែយកមកប្រើ នៅក្នុងករណីជាច្រើន រួចមកហើយ។ លោក ហ៊ីង អាចនឹងត្រូវគេជំរុះចោល ដើម្បីបង្ករូបភាពស្អាតស្អំ ឲ្យលោក ហ៊ុន សែន និងគ្រួសារបក្ខពួក។»៕

 
Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...