ប្រទេសកូរ៉េខាងជើង បានប្រកាសកាន់ទុក្ខ ចំនួនបីថ្ងៃ កាលពីថ្ងៃចន្ទកន្លងទៅនេះ ចំពោះមរណភាព​របស់​លោក ហ្វីដែល កាស្ត្រូ ដែលប្រទេសកុម្មុយនីស បានចាត់ទុកថា «ជាមិត្ត និងជាសម្ព័ន្ធមិត្ត» ដ៏ជិតស្និត​បំផុត​របស់ខ្លួន ប្រឆាំងនឹង«អាមេរិកាំងឈ្លានពាន»។ ទង់ជាតិកូរ៉េខាងជើង​នានា នៅក្នុងប្រទេស នឹងត្រូវទម្លាក់ មក​នៅ​ត្រឹម​ពាក់​កណ្ដាល ដើម្បីឧទ្ទិសនូវកិត្តិយស ដ៏«មហាថ្លៃថ្លា» របស់«បីតាបដិវត្តន៍គុយបា» ដែលបាន​លាចាក​​លោក​​ទៅ នៅថ្ងៃសុក្រទី២៥ ខែវិច្ឆិកា ឆ្នាំ២០១៦ ក្នុងជន្មាយុ៩០ឆ្នាំ។

សារព័ត៌មានផ្លូវការ «Rodong Sinmun» របស់គណបក្សពលករកូរ៉េ ដែលជាគណបក្សដឹកនាំប្រទេស​តែមួយ បាន​ផ្សាយអត្ថបទមួយ អមដោយរូបថតរបស់លោក ហ្វីដែល កាស្ត្រូ ក្នុងសម្លៀកបំពាក់យោធា ដោយបាន​រំលឹក​​មក​និយាយ​ឡើងវិញ ពីទស្សនកិច្ចផ្លូវរដ្ឋរបស់លោក កាស្ត្រូ កាលពីឆ្នាំ១៩៨៦ នៅកូរ៉េ​ខាង​ជើង ជាមួយ​នឹង​​ជំនួប​​«ជា​ប្រវត្តិសាស្ត្រ» ជាមួយ«បីតាស្ថាបនិក» នៃរបបកុម្មុយនីសកូរ៉េ លោក គីម អ៊ីល-ស៊ុង (Kim Il-Sung)។

សារព័ត៌មានដដែលបានសរសេរ ហៅលោក ហ្វីដែល កាស្ត្រូ ថាជា«វីរបុរស នៃសាធារណរដ្ឋ​ប្រជា​មានិត​ប្រជាធិបតេយ្យ​កូរ៉េ (ឈ្មោះផ្លូវការ របស់​ប្រទេស​កូរ៉េខាងជើង)» ដើម្បីជាការឆ្លើយតប ទៅនឹងការខិតខំ​ប្រឹង​ប្រែង​របស់លោក នៅក្នុងការ«ពង្រឹងទំនាក់ទំនងទ្វេរភាគី» និងក្នុងការ«ប្រយុទ្ធប្រឆាំង នៅខ្សែ​ត្រៀម​ជួរ​មុខ» ប្រឆាំងនឹង«អាមេរិក និងបនចក្រពត្តិនិយម​ទាំងឡាយ»។

រីឯលោក គីម ជុង-អ៊ុន (Kim Jong-Un) មេដឹកនាំវ័យក្មេងបច្ចុប្បន្ន របស់របបដឹកនាំក្រុងព្យុងយ៉ាង ក៏បាន​ថ្លែង​លើកឡើង មិនខុសពី​សារព័ត៌មាន​ខាងលើ​ដែរ។ លោកបានសម្ដែងការចូលរួមមរណទុក្ខ ចំពោះ​ដំណឹង​ដ៏​«ក្រៀម​ក្រំ» នៃ«អគ្គមេបញ្ជាការ» និងបានហៅលោក កាស្ត្រូ ថាជា«មិត្តជិតដិត និងជា​សមមិត្ត»​មួយរូប។ គណៈ​ប្រតិភូ​កូរ៉េ​ខាង​ជើង​មួយ​ក្រុម​ នឹងត្រូវធ្វើដំណើរទៅកាន់រដ្ឋធានី ឡាហាវ៉ាន់ (La Havane - រដ្ឋធានី​របស់​ប្រទេស​គុយបា) នៅថ្ងៃ​ចន្ទ​ដដែលនេះ ដើម្បីទៅចូលរួមបុណ្យសព របស់លោក កាស្ត្រូ ដោយ​ផ្ទាល់។

ប្រសិន​ជាលោក ហ្វីដែល កាស្ត្រូ បានមកធ្វើទស្សនកិច្ចដោយផ្ទាល់ នៅក្នុងប្រទេសកូរ៉េខាងជើងនោះ ប៉ុន្តែ​មេ​ដឹកនាំ​នៃ​របប​ក្រុងព្យុងយ៉ាងវិញ មិនមាននរណា​ម្នាក់ ចេញទៅធ្វើទស្សនកិច្ច នៅក្នុងប្រទេសគុយបាឡើយ រាប់​ចាប់​តាំង​ពី​លោក គីម អ៊ីល-ស៊ុង ជាជីតា ​រហូតមកចៅគឺលោក គីម ជុង-អ៊ុន សព្វថ្ងៃ។

ចំពោះប្រវត្តិ​នៃ​ទំនាក់​ទំនង រវាងប្រទេសទាំងពីរ នៅក្នុងទសវត្សន៍ឆ្នាំ៦០-៧០ ក៏មិនមានភាពរលូន ជាមួយ​គ្នា​ប៉ុន្មានដែរ ជា​ពិសេស​នៅ​ក្នុង​ចលនា នៃក្រុម​ប្រទេស​«មិន​ចូលបក្សសម្ព័ន្ធ»។ នៅពេលនោះ ប្រទេស​គុយបា​ជា«ក្លើម្រាក់» ជាមួយ​ក្រុង​ម៉ូស្គូ ខណៈប្រទេសកូរ៉េខាងជើង រក្សាគម្លាតស្មើគ្នា រវាង​សហភាព​សូវៀត និង​ប្រទេស​ចិន ដែលជា​មហា​​ប្រទេស​​កុម្មុយនីស​ពីរ មើលមុខគ្នាមិនចំ៕