នាវា​ចម្បាំង​យក្ស​រ៉ុស្ស៊ី​មក​ដល់​ឆ្នេរ​ស៊ីរី ត្រៀម​ធ្វើ​សង្គ្រាម

ដូចបានគ្រោងទុក មហាអំណាចរ៉ុស្ស៊ីបានសម្រេច បើកយុទ្ធនាការសឹកបន្ថែមទៀត ដើម្បីគាំទ្រ​ដល់​របប​លោក បាឆារ អែល-អាសាធ (Bachar el-Assad) ប្រធានាធិបតី​ស៊ីរី​សព្វថ្ងៃ។ នាវា​ចម្បាំង​យក្ស​រ៉ុស្ស៊ី ដែលមានផ្ទុកពេញ ដោយ​យន្ដហោះប្រដេញ ដ៏ទំនើបៗ ទើបនឹងបាន​រំកិល​ខ្លួន ចូល​មក​ដល់​ក្បែរ​ឆ្នេរ នៃប្រទេសស៊ីរី កាលពីចុង​សប្ដាហ៍​នេះ។
នាវា​ចម្បាំង​យក្ស​រ៉ុស្ស៊ី​មក​ដល់​ឆ្នេរ​ស៊ីរី ត្រៀម​ធ្វើ​សង្គ្រាម
មហានាវាចម្បាំង ដែលមានទំហំបណ្ដោយជាង៣០០ម៉ែត្រ ឈ្មោះ «Amiral Kuznetsov» របស់​ប្រទេស​រ៉ូស្ស៊ី។ (រូបថត ឯកសារ)
Loading...
  • ដោយ: សេក មនោរកុមារ ([email protected]) - បារីស ថ្ងៃទី១២ វិច្ឆិកា ២០១៦
  • កែប្រែចុងក្រោយ: November 13, 2016
  • ប្រធានបទ: វិបត្តិស៊ីរី
  • អត្ថបទ: មានបញ្ហា?
  • មតិ-យោបល់

សម្រាប់ប្រទេសរ៉ុស្ស៊ី សង្គ្រាមលោកលើកទី៣ ហាក់ដូចជាបានចាប់ផ្ដើម បញ្ចេញរូបរាងរបស់វារួចហើយ។ នាវា​ចម្បាំងយក្សឈ្មោះ «Amiral Kouznetsov» ដែលមានផ្ទុកពេញ ដោយ​យន្ដហោះ​ប្រដេញ និង​យន្ដហោះ​ទម្លាក់​គ្រាប់បែក ដ៏ទំនើបៗ ត្រូវបានបញ្ជូន​ទៅ​ដល់​តំបន់​ឆ្នេរសមុទ្រ នៃប្រទេសស៊ីរីហើយ ដើម្បី​ពង្រឹង​កម្លាំង​យោធា​រ៉ុស្ស៊ី និង​ត្រៀមធ្វើ​ប្រតិបត្តិការ​សឹក​ធំៗបន្ថែម​ទៀត នៅក្នុងវិបត្តិស៊ីរី។ នេះ​បើតាមការប្រកាស ដោយផ្ទាល់ របស់​មេ​បញ្ជាការ​នាវានេះ លោក «Sergueï Artamonov» កាលពីថ្ងៃសៅរ៍។

លោកមេបញ្ជាការ បានថ្លែងឲ្យដឹង តាមកញ្ចក់ទូរទស្សន៍ជាតិ ឈ្មោះ «Rossia 1» ថា៖ «ក្រុមនាវា ដែលមាន​ផ្ទុក​យន្ដហោះចម្បាំងរ៉ុស្ស៊ី បានមកដល់តំបន់ ដែលត្រូវឈរជើង ស្ថិតនៅ​ភាគ​ខាងកើត នៃសមុទ្រមេឌីទែរ៉ាណេ ហើយ។ ក្រុមនាវាទាំងនោះ កំពុងបំពេញ​ភារកិច្ច​របស់​ពួកគេ​រួមគ្នា ដោយបានចល័តនៅលើដែនទឹក ភាគ​ខាង​លិច នៃប្រទេសស៊ីរី។»។

លោក «Sergueï Artamonov» បានបន្តទៀតថា យន្ដហោះចម្បាំង នៃនាវា «Amiral Kouznetsov» នឹង​ធ្វើការ​ហោះហើរ «សឹងជា​រៀង​រាល់​ថ្ងៃ» ជាពិសេសហ្វឹកហាត់ ដើម្បីធ្វើ​សហប្រតិបត្តិការ ជាមួយកំពង់ផែ​សមុទ្រ​នៅ​ជិត​បំផុត របស់ប្រទេសស៊ីរី។ តាំងពីជាង​មួយ​ឆ្នាំ​មកហើយ ប្រទេសរ៉ុស្ស៊ីបានដឹកនាំ​​​ការ​វាយ​ប្រហារ​​​តាម​​ផ្លូវ​អាកាស ដើម្បីជាការគាំទ្រ​ទៅដល់កងទ័ពស៊ីរី របស់លោកប្រធានាធិបតី បាឆារ អែល-អាសាធ (Bachar el-Assad)។

» នាវាចម្បាំងនុយក្លេអ៊ែរ «Amiral Kouznetsov» មើលពីចំហៀង៖

រដ្ឋាភិបាលក្រុង ម៉ូស្គូ បានប្រកាសកាលពីពាក់កណ្ដាល ខែតុលា ថានាវាចម្បាំងនុយក្លេអ៊ែរ «Amiral Kouznetsov» ដែលមានផ្ទុក​យន្ដហោះ​ប្រដេញ យន្ដហោះទម្លាក់គ្រាប់បែក និង​ឧទ្ធម្ភាគចក្រ​​បាញ់មិនឆេះ នឹង​ត្រូវ​អមដំណើរ​ដោយនាវាផ្សេងទៀត ដើម្បី​ធ្វើដំណើរ​ទៅកាន់ប្រទេសស៊ីរី ក្នុងគោលបំណង​ដើម្បី​ពង្រឹង​វត្តមាន​យោធា​រ៉ុស្ស៊ី នៅក្នុងតំបន់។ សេចក្ដីប្រកាស​ព័ត៌មាន​មួយ របស់​កងទ័ព​រ៉ុស្ស៊ី បានអះអាងថា ការដាក់​ពង្រាយ​នាវា​ចម្បាំង​​ធុន​ធ្ងន់​មួយនេះ ក៏ដូចជានាវាសឹកដទៃទៀត (ក្នុងនោះមាន នាវាប្រឆាំងនាវាមុជទឹក នាវា​កាំភ្លើង​ធំ «Amiral Koulakov» និងនាវាអន្តរាគមន៍ «Piotr Veliki») នឹងផ្ដល់លទ្ធភាព​ឲ្យធ្វើការឆ្លើយតប ទៅនឹង​ការ​​គម្រាម​ថ្មីៗ​​គ្រប់​ទម្រង់ ជាពិសេសឧក្រិដ្ឋកម្ម​ចោរសមុទ្រ និងភេរវនិយមអន្តរជាតិ។

នៅក្នុងប្រទេសស៊ីរី កងទ័ពរ៉ុស្ស៊ី​មាន​មូលដ្ឋាន​ទ័ព​អាកាស​របស់​ខ្លួន​មួយ​ហើយ​ នៅក្រុង «Hmeïmim» ដែល​ជា​ក្រុង-បន្ទាយ​យោធា​ដ៏ធំ របស់លោក បាឆារ អែល-អាសាធ នៅក្បែរ​នឹងខេត្ត «Lattaquié»។ កងទ័ពរបស់​មហា​អំណាច​រ៉ុស្ស៊ី បានប្រើប្រាស់មូលដ្ឋាន​ទ័ព​អាកាស​នេះ ដើម្បីធ្វើប្រតិបត្តិការ វាយប្រហារតាមផ្លូវអាកាស រាប់​ចាប់​តាំង​ពី​ការ​លូកដៃដំបូង របស់ប្រទេសនេះ នៅក្នុង​វិបត្តិ​ស៊ីរី នាថ្ងៃទី៣០ ខែ​កញ្ញា ឆ្នាំ២០១៥។

ការតម្លើងវត្តមានយោធា និងសព្វាវុធ របស់ប្រទេសរ៉ុស្ស៊ីនៅក្នុងតំបន់ បានធ្វើឡើង នៅក្នុងបរិបទដ៏តឹងតែង រវាង​ប្រទេសនេះ និង​បណ្ដា​ប្រទេសនៅបស្ចឹមលោក ដែលបាន​មើល​មុខ​គ្នា​មិនចំ ស្ដីពីដំណោះស្រាយវិបត្តិ ក្នុង​ប្រទេស​ស៊ីរី។ សាធារណមតិរ៉ុស្ស៊ីខ្លួនឯង បាន​គិតរួច​ជាស្រេច​ហើយថា ពិភពលោកកំពុងប្រឈមមុខ នឹង​សង្គ្រាម​លោក​លើកទី៣ ជាពិសេស​នៅបន្ទាប់​ពី​ការ​ចរចា រវាងក្រុង​វ៉ាស៊ីនតោន និង​ក្រុង​ម៉ូស្គូ ស្ដីពីវិបត្តិស៊ីរី ត្រូវ​បាន​កាត់​ផ្ដាច់ កាលពីថ្ងៃទី៣ ខែតុលាកន្លងមក៕

-------------------

» វីដេអូបង្ហាញពីសកម្មភាព នៅលើនាវាចម្បាំង «Amiral Kuznetsov» របស់កងទ័ពរ៉ូស្ស៊ី៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...