ទីបំផុតទៅ លោក កឺម សុខា អនុប្រធាន (បច្ចុប្បន្នប្រធានស្ដីទី) គណបក្សសង្គ្រោះជាតិ បានទៅចុះឈ្មោះ​បោះ​ឆ្នោត រួចរាល់ជាស្ថាពរហើយ កាលពីព្រឹក​ថ្ងៃទី០៥ ខែតុលានេះ នៅក្នុងការិយាល័យចុះឈ្មោះ នៃសង្កាត់​ចាក់​អង្រែ​លើ។ ការចុះឈ្មោះនោះ បានធ្វើឡើងបន្ទាប់ពីលោក កឹម សុខា បាន​បង្ខាំង​ខ្លួន​ឯង នៅក្នុងទីស្នាក់ការ​គណបក្ស តាំង​ពី​ច្រើន​ខែ​មកហើយ។

ព្រមទាំងមានអ្នកគាំទ្រ ជាច្រើនរយនាក់ តាមហែហម និងតាមឃ្លាំមើលផង អនុប្រធានគណបក្សប្រឆាំង បាន​ដើរ​ចូល ទៅក្នុងការិយាល័យចុះឈ្មោះ ដែលបានរងការជន់លិចទឹកភ្លៀង តាមរយៈក្ដាបន្ទះ ធ្វើជាស្ពាន​«បណ្ដោះ​អាសន្ន» នៅវេលាម៉ោងប្រមាណ ជា១០ និង១៥នាទី ព្រឹកថ្ងៃទី៥ ខែតុលានេះ។ យ៉ាងណាក៏ដោយ ក៏ការ​ចុះ​ឈ្មោះ​បោះឆ្នោត​របស់លោក បាន​ប្រព្រឹត្តិ​ទៅ ដោយរលូន និង​គ្មាន​ការ​រារាំង ឬការតាមចាប់ខ្លួន ពី​សំណាក់​អាជ្ញាធរ​នោះទេ។

លោក កឹម សុខា មានទីលំនៅពីរកន្លែង មួយស្ថិតក្នុង​សង្កាត់បឹងកក់២ ខណ្ឌទួលគោក និងមួយទៀត នៅ​សង្កាត់​ព្រែកឯង ខណ្ឌច្បាអំពៅ រាជធានី​ភ្នំពេញ។ ប៉ុន្តែ លោកបានទៅចុះឈ្មោះ ក្នុងការិយល័យនា​សង្កាត់​ចាក់​អង្រែ​លើ ដែលមិនមែនជាទីលំនៅរបស់លោកនោះ ព្រោះច្បាប់បោះឆ្នោត បានអនុញ្ញាត ដោយតម្រូវឲ្យ​មាន​ត្រឺម​តែ​សាក្សី ជួយបញ្ជាក់ប៉ុណ្ណោះ។

អនុប្រធានគណបក្សសង្គ្រោះជាតិ បានថ្លែងទៅកាន់អ្នកគាំទ្រ បន្ទាប់ពីលោកបានត្រឡប់ មកដល់​ទីស្នាក់ការ​គណបក្សវិញថា លោក និងគណបក្ស​របស់​លោក មានបំណងចង់ឲ្យបរិយាកាសនយោបាយ វិលត្រឡប់​ទៅ​រក​ភាព​ប្រក្រតី​ឡើង​វិញ។ លោកបានពន្យល់ ពីបុព្វហេតុ​របស់លោក ក្នុងការ​បង្ខាំង​ខ្លួន នៅក្នុងទីស្នាក់ការ​​គណបក្ស ថា​ជា«ការតស៊ូមតិ ដើម្បីទាមទាររក​​ដំណោះស្រាយ​​នយោបាយ»។

លោក កឹម សុខា បានថ្លែងឲ្យដឹងថា៖ «ខ្ញុំចង់ឲ្យមានដំណោះស្រាយនយោបាយ ដោយសន្តិវិធី ដោយអហិង្សា សំណោះស្រាយនយោបាយ ដើម្បី​សម្រេចឲ្យបាន នូវបរិយាកាសដែលមានភាពប្រក្រតី ស្មើភាព។ បរិយាកាស​នយោបាយ ដែលយើងចង់បាននោះ គឺជាបរិយាកាស ដើម្បីឲ្យ​គ្រប់​ភាគី​នយោបាយ​ទំាងអស់ អាច​ចូល​រួម​បោះ​ឆ្នោត​ដោយសេរី ត្រឹមត្រូវ ហើយឲ្យប្រជាពលរដ្ឋ ដែលម្ចាស់ឆ្នោត គឺមានសិទ្ធិធ្វើសេចក្តីសម្រេច ដោយ​សេរី​និង​ត្រឹមត្រូវ។»។

គេនៅមិនទាន់ដឹងនៅឡើយ ថាតើការចេញទៅចុះឈ្មោះបោះឆ្នោត ប្រកដោយភាពរលូន កាលពីព្រឹកថ្ងៃនេះ នឹងបិតបញ្ចប់ នូវការបង្ខាំងខ្លួន តាំងពីជិត​៥ខែកន្លងមក របស់លោក កឹម សុខា ខ្លួនលោក ឬយ៉ាងណាទេ។ ប៉ុន្តែ​ទោះជាយ៉ាង​ណា​ក៏​ដោយ ក៏សភាពការណ៍នយោបាយកម្ពុជា ត្រូវបានគេ​មើល​ឃើញ ថាបានធូរស្រាល​មក​វិញ នៅ​ក្នុងរយៈ​ពេល​ចុង​ក្រោយ​នេះ ជាពិសេស បន្ទាប់ពីលោក ហ៊ុន សែន នាយករដ្ឋមន្ត្រីបីទសវត្សន៍ជាង របស់​កម្ពុជា បាន​ប្រកាស​កាល​​​ពីពីរ​សប្ដាហ៍​មុន អះអា​ងពី​«បទ​ឈប់​បាញ់»​នយោបាយ​ ជាបណ្ដោះអាសន្នមួយ ជា​មួយ​​គណបក្ស​​សង្គ្រោះ​ជាតិ៕