រឿងរ៉ាវ បានបង្កការរំភើបចិត្ត ដល់អង្គមហាសន្និបាតទាំងមូល នៃអង្គការសហប្រជាតិ កាលពីម្សិលម៉ិញ បន្ទាប់​ពី​ប្រធានាធិបតីអាមេរិក លោក បារ៉ាក់ អូបាម៉ា (Barack Obama) បានឡើងថ្លែង​រៀបរាប់ ពីរឿងនេះ នៅ​លើ​វេទិការ នៃមហាសន្និបាតនេះរួច។ បន្ទាប់ពីនោះរួច គេហទំព័ររបស់សេតវិមាន បានយកសំបុត្រនោះ មក​បង្ហោះ​ផ្សាយ ហើយទទួលបានការស្វាគមន៍យ៉ាងខ្លាំង ពីសំណាក់អ្នកប្រើប្រាស់​បណ្ដាញ​អ៊ិនធើណែត។ តើមាន​រឿ​​​​ងអ្វីឬ?

គេត្រូវរំលឹកឡើង ពីហេតុការណ៍ដ៏រន្ធត់មួយ កាលពីខែសីហាកន្លងទៅ ខណៈពេលដែល​​កុមារ​ជាតិ​អាមេរិកាំង ដែលមានអាយុ៦ឆ្នាំមួយរូប បាននៅពីមុខកញ្ចក់ទូរទស្សន៍ ហើយបានទស្សនារូបភាព ដ៏ខ្លោចផ្សារ​របស់​កុមារ​ជាតិ​ស៊ីរី​ម្នាក់ ឈ្មោះ «អ៊ុំរ៉ាន (Omran)» បន្ទាប់ពីការទម្លាក់គ្រាប់បែក ទៅលើលំនៅដ្ឋាន​របស់​កុមារ​ទាំង​កណ្ដាល​រាត្រី ក្នុងក្រុងអាឡិប (Alep) ស្ថិតក្នុងភាគពាយ័ព្យ នៃប្រទេសស៊ីរី។ រូបភាព (ទាំងរូបថត ទាំងវីដេអូ) នោះ ត្រូវ​បាន​ផ្តិត​ជាប់ នៅពេលដែលកុមារ អ៊ុំរ៉ាន អាយុ៥ឆ្នាំ ត្រូវបានក្រុមអ្នកជួយសង្គ្រោះ ជួយលើកចេញ ពីគំនរ​អាគារ​​បែក​បាក់ ហើយដិតដាមនៅលើផ្ទៃមុខ និងដងខ្លួន ដោយធូលី ឈាម និងភាពតក់ស្លុត។

៤ថ្ងៃ ក្រោយពីរូបភាពនោះ ត្រូវបានផ្សាយ នៅពាសពេញពិភពលោករួច កុមារអាមេរិកាំង​ដែលមានឈ្មោះ អេឡិច (Alex) រស់នៅក្រុងញ៉ូយក បានចាប់ប៊ិចមកសរសេរជាសំបុត្រមួយ ទៅកាន់ប្រធានាធិបតីរបស់ខ្លួន។ សេចក្ដីសំបុត្រនោះ មានជាអាថ៌​ដូច្នេះ៖ «លោកប្រធានាធិបតី អូបាម៉ា ជាទីគោរព។ តើលោកមាននៅចាំឬទេ ពីកុមារម្នាក់​ដែល​ត្រូវ​ជួយ​សង្គ្រោះ ដោយរថយន្ដគិលានសង្គ្រោះ នៅក្នុងប្រទេសស៊ីរី? តើលោកអាច ទៅយកកុមារនោះ មកនៅ​ក្នុង​ផ្ទះ​ជា​មួយ​ខ្ញុំ? យើងនឹងរង់ចាំលោក នៅទីនេះ ជាមួយនឹងទង់ជាតិ ផ្កា និងប៉េងប៉ោងជាច្រើន។ យើងនឹងចាត់​ទុក​កុមារ​នោះ ដូចជាគ្រួសារតែមួយ ហើយដូចជាប្អូនប្រុសរបស់យើង។»។

កុមារ អេឡិច បានបញ្ជាក់ទៀតថា កុមារនឹងឲ្យលោក អូបាម៉ា ខ្ចីនូវកង់របស់ខ្លួន ហើយបង្រៀន​លោក​ប្រធានា​ធិបតី ឲ្យចេះជិះថែមទៀត ដោយកុមារបានគិតថា លោកអូបាម៉ា ទំនងជាលែងមានកង់ជិះ និងលែងចេះ​ជិះ​កង់​អស់​ហើយ។ មិនត្រឹមតែប៉ុណ្ណឹងទេ កុមារអាមេរិកាំងរូបនេះ នៅបានបន្តថា ប្អូនស្រីរបស់ខ្លួន នាង​តូច ខាថឺរីន (Catherine) ក៏នឹងចែករំលែក​ល្បែងលេង ជាមួយប្រធានាធិបតីអាមេរិក ដូចខ្លួនដែរ។

អ្នក​ប្រើប្រាស់​បណ្ដាញ​អ៊ិនធើណែត បានធ្វើការសាទរកុមារ អេឡិច ដែលមានវ័យ​នៅតូចនៅឡើយ តែបែរ​មាន​«មនុស្សធម៌ សេចក្ដីស្រឡាញ់ និងការយល់ដឹង» ច្រើនជាងមនុស្សធំជាច្រើននោះផង។ នៅក្នុងមហា​សន្និបាត របស់អង្គការ​សហប្រជាជាតិ លោក បារ៉ាក់ អូបាម៉ា បានបន្ថែមពីលើនេះ ដោយលោកសុំអញ្ជើញ មនុស្ស​«ធំៗ»​ទាំងឡាយ ឲ្យបំភ្លេចនូវគំនុំ និងការប្រកាន់​នូវការយកឈ្នះ​រៀងៗខ្លួន ហើយត្រឡប់មករក សមាន​ចិត្ត​ដ៏​ថ្លៃថ្លា ដូច​កុមារតូចៗទាំងនេះ បានធ្វើដូចខាងលើ៕