មរណភាពរបស់អតីតរដ្ឋមន្ត្រី មិន ឃិន បានប្ដូរម៉ោង!
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី០៩ កញ្ញា ២០១៦
- កែប្រែចុងក្រោយ: September 09, 2016
- ប្រធានបទ: ជីវិត
- អត្ថបទ: មានបញ្ហា?
- មតិ-យោបល់
-
ដំណឹងមរណភាព របស់លោក មិន ឃិន ទេសរដ្ឋមន្ត្រីទទួលបន្ទុកបេសកកម្មពិសេស និងជាអតីតរដ្ឋមន្ត្រីក្រសួងធម្មការ និងសាសនា មានពីរដំណាក់កាលខុសគ្នា ខណៈដំណាក់ទីមួយ ត្រូវបានច្រានចោល ដោយក្រុមគ្រួសាររបស់លោក មិន ឃិន ដោយផ្ទាល់។
កាលពីថ្ងៃទី៨ ខែកញ្ញាម្សិលម៉ិញ មន្ត្រីទទួលខុសត្រូវជាច្រើននាក់ រួមនឹងសារព័ត៌មាន ដែលស្និតនឹងរដ្ឋាភិបាលផង បានអះអាងព្រោងព្រាត ពីមរណភាពរបស់លោក មិន ឃិន ថាបានលាចាកលោក នៅវេលាម៉ោង៩ព្រឹក (ម្សិលម៉ិញ)។ ផ្ទុយទៅវិញ ក្រុមគ្រួសាររបស់លោកឯណេះ បាននិយាយថា មន្ត្រីជាន់ខ្ពស់របស់រដ្ឋាភិបាល និងរបស់គណបក្សប្រជាជនកម្ពុជារូបនេះ នៅមានជីវិតនៅឡើយ ហើយកំពុងស្ថិតក្រោមការព្យាបាល ពីក្រុមគ្រូពេទ្យជំនាញ។
លោក មិន ម៉ាដេត កូនប្រុសច្បងរបស់លោក មិន ឃិន បានថ្លែងបដិសេធ ពីមរណភាពរបស់ឪពុកលោក ប្រាប់សារព័ត៌មានភ្នំពេញប៉ុស្ដ៍ ថាលោកមានការភ្ញាក់ផ្អើល និងសោកស្ដាយ ចំពោះពត៌មាននេះ។ លោកបានបន្ទោស អ្នកបញ្ចេញព័ត៌មាន និងសារព័ត៌មានទាំងនោះ ថាមិនបានសួរទៅក្រុមគ្រួសារលោក សូម្បីតែមួយម៉ាត់។
ប៉ុន្តែកូនប្រុសច្បងរូបនេះ បានទទួលស្គាល់ថា ឪពុកលោកមានជំងឺច្រើនយ៉ាង ដូចជា គ្រួសក្នុងតម្រងនោម ជំងឺលើសឈាម និងជំងឺទឹកនោមផ្អែមដ៏រ៉ាំរ៉ៃ ដែលមិនអាចព្យាបាលបាន ហើយបានឈានមកដល់ដំណាក់កាលចុងក្រោយ ដែលពេទ្យមិនអាចព្យាបាល ឲ្យជាសះបានឡើយ។ លោក ម៉ាដេត បានឲ្យដឹងថា៖ «នៅពេលនេះ យើងកំពុងរៀបចំបំពេញ ឯកសារមួយចំនួន ដើម្បីនាំយកឪពុករបស់ ខ្ញុំមកព្យាបាលនៅផ្ទះ ក្នុងខណ្ឌចំការមនវិញ (ដើម្បី)ជាប្រយោជន៍បានកូនចៅ និងសាច់ញាតិទាំងអស់ បានឃើញមុខ និងមើលថែផ្ទាល់ដៃ និងបានស្ដាប់ការទូន្មានចុងក្រោយរបស់គាត់ផង»។
យ៉ាងណាក៏ដោយ ក៏ការផ្ដល់កិច្ចសម្ភាសនេះ ទំនងជាធ្វើឡើង កាលពីថ្ងៃទី៨ ខែកញ្ញា នៅក្រោយផ្សាយដណឹងមរណភាពភ្លាមៗ ហើយលោក មិន ឃិន ទំនងជានៅមានជីវិត នៅឡើយពិតមែន។ រហូតមកដល់យប់ថ្ងៃទី៨ ចូលមកថ្ងៃទី៩ ខែកញ្ញា វេលាម៉ោង១និង៥៩នាទីរំលងអាធ្រាត ទើបដំណឹងមរណភាព ត្រូវបានអះអាងជាផ្លូវការ នៅលើទំព័រហ្វេសប៊ុករបស់លោក មិន ឃិន ផ្ទាល់តែម្ដង ថាលោកបានលាចាកលោកហើយ (រូបភាពខាងក្រោម)។
សារព័ត៌មាន «FreshNews» ដែលស្និតនឹងរដ្ឋាភិបាល ក៏បានចេញផ្សាយ«ឡើងវិញ» ពីកាលវេលានៃមរណភាព របស់លោក មិន ឃិន នៅក្នុងថ្ងៃទី៩ ខែកញ្ញានេះ ខុសពីអ្វី ដែលសារព័ត៌មានដដែលបានផ្សាយ កាលពីម្សិលម៉ិញដែរ។
សារព័ត៌មាននេះ បានបញ្ជាក់ទៀតថា កម្មវិធីបូជាសពលោក មិន ឃិន នឹងត្រូវធ្វើឡើងនៅវេលាម៉ោង ៧ ព្រឹកថ្ងៃទី១៤ ខែកញ្ញា ឆ្នាំ២០១៦ នៅខាងមុខវត្តបុទមវត្តី ក្រោមការណែនាំ ពីសំណាក់លោកនាយករដ្ឋមន្ត្រី ហ៊ុន សែន ទៅកាន់គណៈរដ្ឋមន្ត្រីរបស់លោក ដើម្បីធ្វើយ៉ាងណា រៀបចំពិធីបុណ្យសពនេះ ឲ្យបានសក្ដិសមទៅនឹង«កិត្តិយស»របស់លោកទេសរដ្ឋមន្ត្រី៕
