កឹម សុខា ត្រូវ​ផ្ដន្ទា​ទោស​ជាប់​គុក៥ខែ និង​ពិន័យ​៨សែន​រៀល

តុលាការ​សាលាដំបូងរាជធានីភ្នំពេញ ទើបនឹងសម្រេច​ផ្ដន្ទាទោស​អនុប្រធាន (សព្វថ្ងៃជា​ប្រធាន​ស្ដីទី) ​គណបក្ស​​សង្គ្រោះ​ជាតិ លោក កឹម សុខា ឲ្យ​ជាប់​​ពន្ធនាគារ ចំនួន​៥​ខែ និង​ពិន័យ​ជា​ប្រាក់ ៨សែន​រៀល តាម​មាត្រា​៥៣៨ នៃ​​ក្រម​ព្រហ្មទណ្ឌ​កម្ពុជា។
កឹម សុខា ត្រូវ​ផ្ដន្ទា​ទោស​ជាប់​គុក៥ខែ និង​ពិន័យ​៨សែន​រៀល
លោក កឹម សុខា អនុប្រធាន (សព្វថ្ងៃជាប្រធានស្ដីទី) គណបក្សសង្គ្រោះជាតិ។ (រូបថតលើហ្វេសប៊ុក)
Loading...
  • ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី០៩ កញ្ញា ២០១៦
  • កែប្រែចុងក្រោយ: September 09, 2016
  • ប្រធានបទ: នយោបាយ-កម្ពុជា
  • អត្ថបទ: មានបញ្ហា?
  • មតិ-យោបល់

សាល​ក្រម​ទើប​នឹង​ធ្លាក់មកដល់ ក្នុងពេលមុននេះបន្តិច។ ជាសាលក្រម ដែលប្រកាសដោយលោក កែវ មុនី ចៅក្រមកាត់​សេចក្ដី របស់សាលាដំបូង​រាជធានីភ្នំពេញ។ អនុប្រធាន (សព្វថ្ងៃជាប្រធានស្ដីទី) គណបក្ស​សង្គ្រោះ​ជាតិ លោក កឹម សុខា ត្រូវបានចៅក្រមរូបនេះ សម្រេចផ្ដន្ទាទោស ឲ្យជាប់ពន្ធនាគារចំនួន៥ខែ និង​ត្រូវ​ពិន័យ​​ជា​​ប្រាក់ ចំនួន៨សែនរៀល តាមមាត្រា៥៣៨ នៃក្រមព្រហ្មទណ្ឌ ពីបទ«បដិសេធការចូលខ្លួន»។

សវនាការនៃសាលាដំបូងរាជធានី ក្នុងនៅព្រឹកថ្ងៃសុក្រនេះ មិនមានវត្តមាន របស់លោក កឹម សុខា និង​មេធាវី​ទាំង​៤រូប របស់លោកទេ។ ក្រុមមេធាវីរបស់លោក កឹម សុខា បានសំអាងមូលហេតុថា ការជំនុំជម្រះនេះ ធ្វើ​ឡើង​ដោយ​ខុស​នីតិវិធីច្បាប់ ខណៈលោក កឹម សុខា នៅមានអភ័យឯកសិទ្ធិសភានៅឡើយ។

លោក កឹម សុខា បានបដិសេធការចូលខ្លួន តាមការកោះរបស់ចៅក្រមស៊ើបអង្កេត ដែលបានចេញដីកា​កោះ​ហៅ​លោក ទៅបំភ្លឺក្នុងនាមជាសាក្សី កាលពីជិត៤ខែមុន ដោយមូលហេតុថាលោក ជាសមាជិកសភា​ដែល​មាន​អភ័យឯក​សិទ្ធិ។ ការបដិសេធនេះ ត្រូវបានតុលាការចោទលោក ថាបានប្រព្រឹត្តិបទល្មើសជាក់ស្ដែង ដែលមាន​ស្ថាន​ទម្ងន់ទោស ដូចមានចែងក្នុងក្រមព្រហ្មទណ្ឌ។

អនុប្រធានគណបក្សប្រឆាំង បានរស់នៅបង្ខាំងខ្លួនឯង នៅក្នុងទីស្នាក់ការគណបក្ស តាំងពីពេលនោះ​រហូត​មក បន្ទាប់ពីព្រឹត្តិការណ៍សំរុកចូល ក្នុងទីស្នាក់ការគណបក្ស ពីសំណាក់កងកម្លាំង ប្រដាប់ដោយអាវុធទំនើបៗ ក្នុង​បំណង​ចង់ចាប់រូបលោក។

នៅព្រឹកម៉ិញនេះ លោក កឹម សុខា បានចេញមុខជាសាធារណៈ មកថ្លែងទៅកាន់អ្នកគាំទ្ររបស់លោក នៅ​នឹង​ទីស្នាក់ការ​របស់គណបក្ស ដោយបានបរិហារ​ពីការតាមយាយី ធ្វើទុក្ខបុកម្នេញ តាមគ្រប់រូបភាព តាមរយៈ​ការ​ប្រើ​ប្រាស់ គ្រប់ស្ថាប័នរបស់ជាតិ ក្នុងគោលបំណង ដើម្បី«បញ្ចប់ជីវិតនយោបាយ»របស់លោក។

យុវជនដែលរងការចាប់ខ្លួន ត្រូវបានដោះលែង

នៅខាងក្រៅអាគារតុលាការវិញ យុវជនម្នាក់ឈ្មោះ អ៊ុំ ដារា ដែលជាអ្នកគាំទ្រមួយរូប ត្រូវបានក្រុម​សមត្ថកិច្ច​ចាប់​ខ្លួន និងបញ្ជូនទៅកាន់​អធិការដ្ឋាន​ខណ្ឌ៧មករា កាលពីវេលាម៉ោងប្រមាណជា ៩ និង៣០នាទី។ ប៉ុន្តែ​យុវជន​រូបនេះ ត្រូវបានអាជ្ញាធរ​ដោះ​លែង​​មក​វិញ​ហើយ ក្នុងវេលារសៀល​ថ្ងៃដដែល នៅមុននេះបន្តិច។ នេះ​បើ​តាម​ប្រភព​ព័ត៌មាន​មួយស្និត នឹងអាជ្ញាធរ​ខណ្ឌ៧មករា។ យុវជន អ៊ុំ ដារា បាន​ចូលរួម​ជា​មួយ​​អ្នកគាំទ្រ​​គណបក្ស​សង្គ្រោះជាតិ ជាច្រើន​រយ​នាក់ នៅ​ខាង​មុខ​តុលាការ និងបានស្រែក ស្នើឲ្យ​តុលាការ​​ទម្លាក់​​ចោល ​​​ការ​ចោទ​​ប្រកាន់​ទៅ​លើ​​លោក កឹម សុខា៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...