ប្រធានាធិបតីកូរ៉េខាងត្បូង លោក មូន ចេ-អ៊ីន (Moon Jae-in) បានជួបជជែកជាមួយ អគ្គមគុទេសន៍កូរ៉េខាងជើង លោក គីម ជុង-អ៊ុន (Kim Jong-Un) កាលពីសៅរ៍ នៅក្នុងតំបន់គ្មានយោធាមួយ ដែលស្ថិតនៅលើព្រំដែន នៃប្រទេសកូរ៉េទាំងពីរ។ នេះ បើតាមការប្រកាសឲ្យដឹង របស់ការិយាល័យប្រធានាធិបតីកូរ៉េខាងត្បូង នៅមួយថ្ងៃក្រោយ ពីការប្រកាសប្ដូរជំហរ របស់ប្រធានាធិបតីអាមេរិក លោក ដូណាល់ ត្រាំ (Donald Trump) ដែលលើកឡើងថា ជំនួបកំពូលរវាងលោក ត្រាំ និងលោក គីម អាចនឹងប្រព្រឹត្តិទៅបាន នៅថ្ងៃទី ១២ ខែមិថុនាខាងមុខ។

មុននេះប៉ុន្មានថ្ងៃ លោក ដូណាល់ ត្រាំ បានសម្រេច​លប់ជំនួបកំពូល​ចោល ជាឯកតោភាគី តាមរយៈលិខិតមួយ​របស់លោក ដែល​ចុះថ្ងៃទី២៤ ខែឧសភា ឆ្នាំ២០១៨ ផ្ញើរទៅកាន់​លោក គីម ជុង-អ៊ុន។ ប្រធានាធិបតីអាមេរិក បានលើក​ពីមូលហេតុដ៏ខ្លី រុញ​ការទទួលខុសត្រូវ នៃការលប់ចោល​នេះ ទៅលើ «កំហឹងដ៏ធំធេង និងអរិភាព ដែល​បានបង្ហាញ នៅក្នុងសេចក្តី​ថ្លែងការណ៍ថ្មីៗបំផុត» របស់លោក គីម ជុង-អ៊ុន ប្រឆាំង​សហរដ្ឋអាមេរិក។

ក្នុងជំនួបកាលពីថ្ងៃសៅរ៍ មេដឹកនាំកូរ៉េទាំងពីរ បានជជែកគ្នា អស់រយៈពេល២ម៉ោង នៅក្នុងក្រុង «Panmunjon» ទីកន្លែងដែលអ្នកទាំងពីរ បានជួបគ្នាកាលពីខែកន្លងទៅ។ បន្ទាប់មក ប្រមុខដឹកនាំទាំងពីរ បានចេញសេចក្ដីថ្លែងការណ៍រួមមួយ ដែលលើកឡើងថា នឹងខិតខំធ្វើឲ្យប្រសើរឡើង នូវទំនាក់ទំនងរបស់ពួកគេ។

សេចក្ដីប្រកាសព័ត៌មាន របស់ការិយាល័យប្រធានាធិបតីកូរ៉េខាងត្បូង បានឲ្យដឹងថា៖ «មេដឹកនាំទាំងពីរ បានផ្លាស់ប្ដូរយោបល់គ្នា ទៅវិញទៅមក និងពិភាក្សាស្វែងរកមធ្យោបាយ ដើម្បីចេញសេចក្ដីថ្លែងការណ៍រួម នៃក្រុង "Panmunjon" និងដើម្បីធានាឲ្យមានភាពជោគជ័យ ដល់ជំនួបកំពូល អាមេរិក-កូរ៉េខាងជើង»៕