តុលាការហៅ សម រង្ស៊ី ជាជនជាប់សង្ស័យ ទាំងមិនទាន់សួរនាំ
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី០៣ សីហា ២០១៦
- កែប្រែចុងក្រោយ: August 04, 2016
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
ភាគីចុងចោទ មិនទាន់ត្រូវបានសួរនាំពីមុនមកទេ ហើយរយៈពេលនៃការដាក់ពាក្យបណ្ដឹង ក៏ដូចជារំលងគ្នាតែប៉ុន្មានម៉ោងប៉ុណ្ណោះដែរ តែលោកព្រះរាជអាជ្ញារងនៃសាលាដំបូងរាជធានីភ្នំពេញ បានហៅភាគីចុងចោទ ថាជាជនជាប់សង្ស័យទៅហើយ។ នេះបើគេសំអាងលើ ដីកាកោះមួយចុះថ្ងៃទី០១ ខែសីហា របស់ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ លោក លី សុផាណា ដែលបានកោះហៅប្រធានគណបក្សសង្គ្រោះជាតិ លោក សម រង្ស៊ី ឲ្យចូលមកឆ្លើយបំភ្លឺ តាមបណ្ដឹងរបស់លោកនាយករដ្ឋមន្ត្រី ហ៊ុន សែន ដែលចុះថ្ងៃទី០១ ខែសីហាដដែល ជុំវិញការចោទប្រកាន់ជាសាធារណៈ ថាលោក ហ៊ុន សែន នៅពីក្រោយឃាតកម្ម ទៅលើលោក កែម ឡី។
ក្នុងដីកាកោះ ដែលទស្សនាវដ្ដីមនោរម្យ.អាំងហ្វូ ទទួលបានមួយច្បាប់ដែរ នៅក្នុងថ្ងៃទី៣ ខែសីហានេះ បានសរសេរថា៖ «យើង លី សុផាណា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ អញ្ជើញឈ្មោះ សម រង្ស៊ី ជាជនជាប់សង្ស័យ (មាន)អាស័យដ្ឋាន (...) ឲ្យចូលទៅកាន់អយ្យការ អមសាលាដំបូងរាជធានីភ្នំពេញ នៅថ្ងៃទី ១៩ ខែសីហា ឆ្នាំ២០១៦ វេលាម៉ោង ០៨ ម៉ (និង) ៣០នាទី ព្រឹក ដើម្បីស្ដាប់ចម្លើយ»។
ប្ដឹងថ្ងៃទី១ ខែសីហា កោះហៅថ្ងៃទី១ ខែសីហា...
ការហៅភាគីចុងចោទ ថាជាជនជាប់សង្ស័យភ្លាមៗដូច្នេះ បានបង្កមន្ទិលដល់ដំណើរការនីតិវិធី របស់ស្ថាប័នអយ្យការអមសាលាដំបូង ដែលហាក់ដូចជា បានធ្វើចំណាត់ការយ៉ាងរហ័ស ទៅលើពាក្យបណ្ដឹងរបស់លោកនាយករដ្ឋមន្ត្រី ហ៊ុន សែន ខណៈតុលាការនៅមិនទាន់កោះហៅភាគីចុងចោទ ឲ្យចូលខ្លួនមកបំភ្លឺ ស្រាយបន្ទុកជាមុននៅឡើយ។ ភាពមន្ទិលនេះ បានបន្ថែមនូវចំណែកមួយទៀត ដែលធ្វើឲ្យគេសង្ស័យកាន់តែខ្លាំងឡើង ពី«ឯករាជ្យភាព» របស់ប្រព័ន្ធតុលាការនៅកម្ពុជា។
អតីតមន្ត្រីច្បាប់កម្ពុជា លោក ព្រហ្ម គិត ដែលបានតាមដានរឿងរ៉ាវនេះ យ៉ាងដិតដល់ បានសំដែងក្ដីងឿងឆ្ងល់ថា ពាក្យបណ្ដឹងរបស់លោក ហ៊ុន សែន ហាក់ត្រូវបានស្ថាប័នតុលាការចាត់ការយ៉ាងរហ័ស និងបន្ថែមបន្ទុកដាក់ទៅភាគីចុងចោទ ថាជនជាប់សង្ស័យរួចជាស្រេច។ ទិដ្ឋភាពនេះ ត្រូវបានលោកសង្ស័យថា ជាទម្រង់មួយ នៃការឃុបឃិតគ្នារវាងស្ថាប័ននីតិប្រតិបត្តិ និងនីតិតុលាការ ដោយមានការរៀបចំជាមុន។ លោក ព្រហ្ម គិត បាននិយាយក្នុងកិច្ចសម្ភាសខ្លីមួយ ជាមួយទស្សនាវដ្ដីនារសៀលថ្ងៃពុធនេះថា៖ «តើពាក្យបណ្ដឹងរបស់ជនរងគ្រោះ ព្រោះបញ្ហារំលោភបំពានផ្សេងៗ ប្រឆាំងនឹងឧកញ៉ាមានប្រាក់ ឬអ្នកមានអំណាចផ្សេងៗនោះ ត្រូវបានតុលាការចាត់ការ ដោយប្រើរយៈពេលរលងគ្នា តែប៉ុន្មានម៉ោងដូច្នេះឬ? ហើយថា តើតុលាការបានហៅភាគីចុងចោទ នៅក្នុងសំនុំរឿងទាំងនោះ ថាជាជនជាប់សង្ស័យ តាំងពីដីកាកោះទីមួយអញ្ចឹងឬទេ?»។
សូមបញ្ជាក់ដែរថា លោក សម រង្ស៊ី ត្រូវបានព្រះរាជអាជ្ញារង លោក លី សុផាណា ចេញដីកាកោះហៅនៅក្នុងថ្ងៃទី១ ខែសីហាតែមួយ ជាមួយនឹងអ្នកស្រី ថាក់ ឡានី សមាជិកព្រឹទ្ធសភាមកពីគណបក្ស សម រង្ស៊ី នៅក្នុងសំនុំរឿងដូចគ្នា។ តែអ្នកទាំងពីរត្រូវចូលខ្លួន នៅថ្ងៃពីរខុសគ្នា៖ អ្នកស្រី ថាក់ ឡានី ចូលខ្លួននៅថ្ងៃទី៨ ខែសីហា ខណៈលោក សម រង្ស៊ី ចូលខ្លួននៅថ្ងៃទី១៩ ខែសីហាខាងមុខ។ នេះបើតាមការអះអាងឲ្យដឹង ពីសំណាក់លោក លី សុផាណា ខ្លួនលោក នៅតាមបណ្ដាញសង្គម តេឡេហ្គ្រាម (Telegram)។
ពាក្យបណ្ដឹងរបស់លោក ហ៊ុន សែន ដែលធ្វើឡើងតាមរយៈលោកមេធាវី គី តិច បានដាក់ចូល មកអយ្យការអមសាលាដំបូងរាជធានីភ្នំពេញ កាលពីថ្ងៃទី០១ ខែសីហា ឆ្នាំ២០១៦។ លោក ហ៊ុន សែន បានប្ដឹងប្រធានគណបក្សសង្គ្រោះជាតិ លោក សម រង្ស៊ី និងសមាជិកព្រឹទ្ធសភាមកពីគណបក្ស សម រង្ស៊ី អ្នកស្រី ថាក់ ឡានី ទាក់ទងនឹងការចោទថា រូបលោក (ហ៊ុន សែន) និងរដ្ឋាភិបាលជាអ្នកនៅពីក្រោយខ្នង នៃឃាតកម្មលើលោក កែម ឡី។ ពាក្យបណ្ដឹងនោះ បានស្នើសុំឲ្យតុលាការផ្ដន្ទាទោសលោក សម រង្ស៊ី និងអ្នកស្រី ថាក់ ឡានី តាមផ្លូវច្បាប់ និងទាមទារសំណងជំងឺចិត្តក្នុងម្នាក់ចំនួន ១០០រៀល៕
» ដីកាកោះហៅលោក សម រង្ស៊ី ពីសំណាក់លោកព្រះរាជអាជ្ញារង លី សុផាណា៖
