សម រង្ស៊ី ថា ហ៊ុន សែន ក៏ធ្លាប់រត់ចោលស្រុកដែរ
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី២៣ មិថុនា ២០១៦
- កែប្រែចុងក្រោយ: June 24, 2016
- ប្រធានបទ: នយោបាយ-កម្ពុជា
- អត្ថបទ: មានបញ្ហា?
- មតិ-យោបល់
-
ដើម្បីបុព្វហេតុប្រទេសជាតិ តើអ្នកនយោបាយខ្មែរ ចាំបាច់ត្រូវរត់ចោលស្រុក ឬធ្វើការនិរទេសខ្លួន ចេញក្រៅស្រុក ជានិច្ចជាកាលអញ្ចឹងឬ? លោក សម រង្ស៊ី បានលើកយកករណី របស់សម្ដេច ព្រះនរោត្ដម សីហនុ ដែលលោក សម រង្ស៊ី បញ្ជាក់ថា ព្រះអង្គធ្លាប់ធ្វើជាប្រធានចលនាតស៊ូ នៅក្រៅស្រុក ដើម្បីរដោះប្រទេសកម្ពុជា ចេញពី«នឹមត្រួតត្រា» របស់យួនឈ្លានពាន មកធ្វើជាទឡ្ហីករណ៍ ការពារការធ្វើនិរទេសខ្លួនរបស់លោក នាពេលនេះ។ ការនិរទសខ្លួនរបស់លោក សម រង្ស៊ី ដែលអ្នកផងមើលឃើញថា គឺដើម្បីគេចចេញពីការស្វែងរកចាប់ខ្លួន នៃប្រព័ន្ធយុត្តិធម៌ក្នុងស្រុក។
ប៉ុន្តែលោក សម រង្ស៊ី មិនបានភ្លេចឡើយ ក្នុងការលើកឡើងថា លោក ហ៊ុន សែន នាយករដ្ឋមន្ត្រីបីទសវត្សន៍នៅកម្ពុជា ក៏ធ្លាប់រត់ចោលស្រុក ដូចគេឯងអញ្ចឹងដែរ។ ថ្លែងនៅក្នុងជំនួប ជាមួយពលរដ្ឋខ្មែរអាមេរិកាំង ក្នុងក្រុង ឡូវែល នៃរដ្ឋម៉ាសាឈូសេត សហរដ្ឋអាមេរិក កាលពីថ្ងៃទី១៩ ខែមិថុនា ឆ្នាំ២០១៦ ប្រធានគណបក្សសង្គ្រោះជាតិ បានឆ្លើយនឹងសំនួរមួយ ដែលសួរលោក ពីករណីជាប់ពន្ធនាគារ ឲ្យដូចអ្នកស្រី អ៊ុងសាន ស៊ូជី ជាជាងរត់ចេញក្រៅស្រុក ដែលជាទង្វើមួយ រងការរិះគន់ថា មិនប្រកបដោយវិរៈភាព។
លោក សម រង្ស៊ី បានសួរបកទៅវិញថា៖ «ចុះ ហ៊ុន សែន ខ្លួនឯង ដែលគ្រាន់បើណាស់ ដែលហ៊ានប្រឆាំងខ្មែរក្រហម នៅឆ្នាំ១៩៧៧ - ៧៨ គ្រាន់បើណាស់ ម៉េចក៏មិនឲ្យខ្មែរក្រហមចាប់ទៅ ម៉េចក៏ខ្លាចខ្មែរក្រហម ម៉េចក៏ទៅស្រុកយួនធ្វើអី?»
ការលើកឡើងរបស់លោក សម រង្ស៊ី បានបង្កចម្ងល់ឡើងថា តើលោក ហ៊ុន សែន ដែលបានរត់ចេញ ទៅកាន់ប្រទេសវៀតណាម ក្នុងអំឡុងឆ្នាំ១៩៧៨-៧៨នោះ ពិតជាដើម្បីបុព្វហេតុជាតិមាតុភូមិឬ? ឯកសារជីវប្រវត្តជាច្រើន ផ្សាយដោយរបបក្រុងភ្នំពេញ និងដោយប្រព័ន្ធផ្សព្វផ្សាយ ស្និតនឹងលោក ហ៊ុន សែន តែងបានការពារអំណះអំណាងនេះជានិច្ច ហើយលោក ហ៊ុន សែន ខ្លួនលោក ក៏តែងរំលើកជាច្រើនដងច្រើនសារ ពីការបូជាជីវិត បូជាការរស់នៅជួបជុំគ្នា នៃក្រុមគ្រួសាររបស់លោក នៅក្នុងសម័យកាលនោះ ដើម្បីរំដោះជាតិមាតុភូមិ ចេញពីរបបប្រល័យពូជសាសន៍ ខ្មែរក្រហមដែរ។
ប៉ុន្តែឯកសារផ្សេងទៀត នៅឯបរទេសបានលើកឡើងផ្ទុយពីនេះ និងបានពន្យល់ថា លោក ហ៊ុន សែន បានរត់ចោលស្រុក គឺនៅក្នុងបុព្វហេតុតែមួយគត់ នោះគឺគេចចេញ ពីចំណាត់ការរបស់ប៉ុលពត ដែលកំណត់ឲ្យកំចាត់ក្រុមក្បត់អង្គការ ក្បត់បដិវត្តន៍ នៅតំបន់បូព៌ា។ សក្ខីកម្មនៃឯកសារទាំងនោះ ត្រូវបានក្រុមអ្នកប្រើប្រាស់ គេហទំព័រ «Wikipedia» ធ្វើការប្រមែប្រមូល និងយកមកសង្ខេប ទាក់ទងនឹងប្រវត្តិរបស់លោក ហ៊ុន សែន ដូចខាងក្រោម៖
នៅឆ្នាំ ១៩៧៧ ឧបទ្ទវហេតុជាច្រើន បានកើតឡើង នៅតាមព្រំដែនកម្ពុជា-វៀតណាម និងបានបង្កឱ្យមានការឆ្លើយតប ពីសំណាក់កងទ័ពប្រជាជនវៀតណាម ដែលធ្វើឲ្យកងទ័ពខ្មែរក្រហម ពិបាកនឹងធ្វើការទប់ទល់។ មេបញ្ជាការជាន់ខ្ពស់ នៃរបបខ្មែរក្រហម បានទម្លាក់ការទទួលខុសត្រូវ នៃការទប់ទល់ដ៏ខ្សត់ខ្សោយនាពេលនោះ ទៅលើក្រុមទាហាន និងក្រុមមេទាហានរបស់ខ្លួនមួយចំនួន ដែលមិនមានភក្ដីភាពពេញលេញ ជាមួយនឹងអង្គការ ហើយបានបញ្ជាឲ្យមានការចម្រាញ់ចេញ នូវជនក្បត់បដិវត្តន៍ ដែលស្និតនឹងក្រុង ហាណូយ។ ដើម្បីគេចចេញ ពីយុទ្ធនាការចម្រាញ់នេះ លោក ហ៊ុន សែន បានសម្រេចចិត្តរត់ឆ្លងព្រំដែន ចូលប្រទេសវៀតណាម។
លោក ហ៊ុន សែន បានរត់គេចខ្លួននៅខែមិថុនា ហើយបានរស់នៅ ក្នុងព្រៃអស់រយៈពេលជាច្រើនខែ មុននឹងចូលទៅដល់ទឹកដីវៀតណាម ក្នុងខែធ្នូ ឆ្នាំ១៩៧៧។ ពេលទៅដល់ភ្លាម លោក ហ៊ុន សែន ត្រូវបានអាជ្ញាធរយួនចាប់ឃុំខ្លួន មួយរយៈទៀត(?)។ បន្ទាប់ពីត្រូវបានដោះលែង លោក ហ៊ុន សែន បានចូលរួមជាមួយ លោក ហេង សំរិន និងលោក ជា ស៊ីម ក្នុងការបង្កើតឲ្យមានចលនានយោបាយមួយ ដើម្បីផ្ដួលរំលំរបបខ្មែរក្រហម។ ចលនានោះ មានឈ្មោះដំបូងឡើងថា «រណសិរ្សសាមគ្គីប្រជាជនខ្មែរ ដើម្បីសង្គ្រោះជាតិ» និងក្រោយមក បានប្ដូរមកជា «រណសិរ្សយសាមគ្គីសង្គ្រោះជាតិកម្ពុជា» ហៅកាត់ជាភាសាបារាំង «FUNSK»៕