ឈុតឆាកបានកើតឡើងពិតៗ តែវាដូចនៅក្នុងភាពយន្ដចារកម្ម របស់អង់គ្លេស-អាមេរិក រឿងជេមស្ប៊ន ០០៧ ដូច្នេះ។ ហេតុការណ៍បានកើតឡើង កាលពីថ្ងៃព្រហស្បត្តិ៍មុន នៅក្នុងទីក្រុង «Marijampolé» ភាគ​ខាង​ត្បូង​នៃ​ប្រទេសលីតួអានី។ ម្ចាស់រថយន្ដ ធុន «SUV» ដែលមិនចង់ឈប់រថយន្ដ តាមការស្នើសុំរបស់នគរបាល បាន​បើក​រថយន្ដ​របស់ខ្លួននេះ រត់គេចពីនគរបាល ដោយបានប្រើ នូវគ្រប់ល្បិច គ្រប់ស្នៀត ដែលមាន​នៅក្នុង​ភាពយន្ដ ជេមស្ប៊ន ដ៏ល្បី។

នៅក្នុងចំណោមល្បិចស្នៀតទាំងនោះ មានរាប់បញ្ចូលទាំង ផ្សែងពណ៌សបង្ហុយចេញ​តាមរថយន្ដផ្នែក​ខាង​ក្រោយ​របស់ខ្លួន យ៉ាងហុយទ្រលោម និងដែកគោល ដើម្បីឲ្យបំផ្ទុះកង់រថយន្ដ ដែលកំពុងដេញតាមពីក្រោយ​ខ្លួន។ សូមមើលដែកគោល ក្នុងរូបខាងក្រោម៖

នៅទីបំផុត ការប្រមាញ់រថយន្ដដ៏ពិសេស បានបញ្ចប់ទៅ បន្ទាប់ពីថយន្ដនគរបាល​​បានបុកផ្អិបរថយន្ដនោះ ទៅ​រនាំង​ចិញ្ចើមផ្លូវ។ ឈុតឆាកនេះ ត្រូវបានថតដោយកាម៉េរ៉ាវីដេអូ ដែលមានបំពាក់ នៅលើរថយន្ដនគរបាល ហើយ​ត្រូវ​បានយកមកបង្ហោះ នៅលើទំព័រហ្វេសប៊ុករបស់នគរបាល នៅប៉ុន្មានថ្ងៃបន្ទាប់មក។ ជាសំណាងល្អ នៅ​ក្នុង​ហេតុការណ៍​នេះ មិនមាននរណាម្នាក់រងរបួសឡើយ៕

» ទស្សនាវីដេអូ នៃការប្រដេញនេះទាំងស្រុង ដូចតទៅ៖