សម រង្ស៊ី៖ បរទេសឈ្មានពានឲ្យខ្មែរស៊ីឈ្នួល បង្កវិបត្តិនយោបាយនៅកម្ពុជា
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី១៥ មិថុនា ២០១៦
- កែប្រែចុងក្រោយ: June 16, 2016
- ប្រធានបទ: នយោបាយ-កម្ពុជា
- អត្ថបទ: មានបញ្ហា?
- មតិ-យោបល់
-
ទិដ្ឋភាពមួយផ្នែក ដែលអាជ្ញាធររដ្ឋាភិបាល គ្រប់គ្រងដោយគណបក្សប្រជាជនកម្ពុជា តែងតែលើកឡើងមិនដាច់ពីមាត់ ទាក់ទងនឹងការចាប់ចង ផ្ទុះរឿងរ៉ាវថ្មីៗជាបន្តបន្ទាប់នោះ គឺជាករណីរបស់តុលាការ «សុទ្ធសាធ» ហើយមិនពាក់ព័ន្ធនឹងនយោបាយទេ។ ប៉ុន្តែសម្រាប់ប្រធានគណបក្សសង្គ្រោះជាតិ លោក សម រង្ស៊ី ដែលកំពុងនិរទេសខ្លួននៅក្រៅប្រទេស ដើម្បីគេចពីការចាប់ចងនោះ បានលើកឡើង ថាវិបត្តិនយោបាយសព្វថ្ងៃនេះ ត្រូវបានបង្កឡើង ក្នុងផលប្រយោជន៍ចំនួនពីរ។
«បរទេសឈ្លានពាន បញ្ជា(មក)អ្នកស៊ីឈ្នួលគេ ដើម្បីបង្កវិបត្តិ...»
ថ្លែងនៅក្នុងកម្មវិធី «វេទិការអ្នកស្ដាប់» វិទ្យុអាស៊ីសេរី កាលពីយប់ថ្ងៃពុធ ទី១៥ ខែមិថុនានេះ លោក សម រង្ស៊ី បានពន្យល់ចំពោះផលប្រយោជន៍ទីមួយថា គឺដើម្បីបិតបាំងបញ្ហាជាតិធំៗ និងបញ្ហាអាយុជីវិតប្រទេសជាតិ ដោយយកតែរឿងកំប៉ិចកំប៉ុក រឿងផ្ទាល់ខ្លួន រឿងបុគ្គល យកមកលាតត្រដាង។ លោក រង្ស៊ី បានរៀបរាប់ថា៖ «អាណ្នឹង (ដើម្បី) បង្វែរអារម្មណ៍ កុំឲ្យយើងគិតពីបញ្ហាប្រទេសជាតិ។ ហើយបើយើងមិនគិត ពីបញ្ហាប្រទេសជាតិទេ គឺយើងបណ្ដោយ ឲ្យប្រទេសជាតិយើងលិចលង់។ នរណា ចង់ឲ្យជាតិយើងលិចលង់? បើខ្មែរជាអ្នកស្រឡាញ់ជាតិ (គឺ)មិនចង់ឲ្យជាតិយើងលិចលង់ទេ។ មានតែបរទេសឈ្លានពាន គេបញ្ជា(មក)អ្នកដែលស៊ីឈ្នួលគេ អ្នកដែលបម្រើគេ (ធ្វើឲ្យ)ខ្មែរឈ្មោះគ្នា កុំឲ្យខ្មែរអាចដោះស្រាយបញ្ហាអាយុជីវិត របស់ជាតិមាតុភូមិ របស់យើងបាន។»
រីឯផលប្រយោជន៍ទីពីរ ត្រូវបានប្រធានគណបក្សសង្គ្រោះជាតិរូបនេះ អះអាងថា ដើម្បីបង្កបញ្ហាឲ្យការបោះឆ្នោត នាពេលខាងមុខនេះ មានការ«រាំងស្ទះ»។ លោក សម រង្ស៊ី បានថ្លែងឡើងថា៖ «គេដឹង ថាប្រជារាស្ត្រស្រឡាញ់ជាតិ ប្រជារាស្ត្រខ្មែរស្រឡាញ់យុត្តិធម៌ ប្រជារាស្ត្រខ្មែរគាំទ្រគណបក្សសង្គ្រោះជាតិ។ ដូច្នេះ ឆន្ទះប្រជារាស្ត្រ គឺកាន់តែមោះមុត កាន់តែចង់ឲ្យមានការផ្លាស់ប្ដូរថែមទៀត។ ថែមទាំង គ.ជ.ប. (គណៈកម្មាធិការជាតិរៀបចំការបោះឆ្នោត) ថ្មីនេះ (...) ដែលយើងអាចជឿទុកចិត្តបាន។ យើងជឿថា ការបោះឆ្នោតលើកក្រោយ (នឹង) ល្អប្រសើរជាងមុន ហើយ (...) បើល្អប្រសើរជាងមុនតែបន្តិច (នោះ) គឺគណបក្សសង្គ្រោះជាតិ នឹងទទួលជ័យជំនៈយ៉ាងធំធេង។»
«យុទ្ធសាស្ត្រ...»
មេដឹកនាំគណបក្សប្រឆាំង បានបន្តទៀតថា៖ «ដូច្នេះ ខាងគេម្ខាងទៀត ក៏គេយល់ដូចយើង ប៉ុន្តែគេយល់បញ្ច្រាស(ពី)យើង ពីព្រោះផលប្រយោជន៍គេ វាផ្ទុយពីផលប្រយោជន៍ជាតិ ផលប្រយោជន៍គណបក្សសង្គ្រោះជាតិ។ ដូច្នេះ គេត្រូវតែបំផ្លាញ ដំណើរការបោះឆ្នោត។ (ហើយ) ដើម្បីបំផ្លាញដំណើរការបោះឆ្នោត គេត្រូវតែបង្ករឿង។ បង្ករឿង ចំពោះគណបក្សសង្គ្រោះជាតិ ហើយបង្ករឿងចំពោះអ្នកណា ដែលហ៊ានទិតៀន អ្នកណាដែលហ៊ានចេញមុខ ការពារផលប្រយោជន៍ជាតិ។ (...) យុទ្ធសាស្ត្ររបស់គេ គឺយុទ្ធសាស្ត្រហិង្សា យុទ្ធសាស្ត្រចាប់ដាក់គុក យុទ្ធសាស្ត្របំភិតបំភ័យ កុំឲ្យដំណើរការបោះឆ្នោតនោះ (ប្រព្រឹត្តិទៅ)មានលក្ខណៈរលូន។»
លោក សម រង្ស៊ី បានបញ្ជាក់ទៀតថា៖ «យើងឃើញក្រឡា យើងឃើញក្រយ៉ៅ របស់អ្នកដែលមានបំណងអាក្រក់ ដែលចេះតែរករឿង ចង់ឲ្យខ្មែរឈ្លោះគ្នា ឥតឈប់ឈរនេះ»៕