ការវិភាគរបស់លោក កែម ឡី បានចូលមកដល់របត់ថ្មី ថាលោក នឹងទទួលខុសត្រូវ នៅចំពោះមុខច្បាប់ ទៅ​លើករណីដែលបានលើកឡើង ទាក់ទងនឹងសំណេរអត្ថាធិប្បាយមួយ ដែលលោកដាក់ចំណងជើងថា «ឆ្នាំង​បាយ​ខ្មែរ ត្រូវយួនវាយបំបែក»។ លោកបានពន្យល់ថា មុខរបរធំៗរបស់ខ្មែរ តាំងពីសម័យដើម និងកន្លង​មក គឺធ្វើ​ស្រែចម្ការ នេសាទ និងទទួលផល ពីអនុផលធម្មជាតិដើម្បីចិញ្ចឹមកូន ចៅ និងបានទទួលការសិក្សា ដែល​មាន​គុណភាព។ លោកបានបញ្ជាក់បន្តថា ប៉ុន្តែជាផលអវិជ្ជមាន យួនបានវាយបំបែកមុខរបរ ឬឆ្នាំងបាយខ្មែរ​តាម​រយៈ​ប្រាំ​ចំណុច។

លោក កែម ឡី បានពន្យល់ពីការបំបែកឆ្នាំងបាយខ្មែរ ពីសំណាក់យួនទាំងនោះ ដែលទស្សនវដ្ដី​មនោរម្យ.​អាំងហ្វូ សូម​ដងស្រង់​ទាំងស្រុង មកជម្រាបជូនដូចតទៅ៖

ឆ្នាំងបាយទី១៖
មុខរបរនេសាទ ត្រូវបានយួនវាយកម្ទេច តាមរយៈការប្រើប្រាស់ឧបករណ៍ល្មើសច្បាប់ នៅគ្រប់ផ្ទៃទឹក​ដូច​ជា​តំបន់​ឆ្នុកទ្រូ តំបន់ចុងឃ្នៀស តំបន់តាមដងទន្លមេគង្គ តំបន់សមុទ្រ។ល។ លើសពីនេះ ចំនួនអ្នកនេសាទ​យួន​កាន់​តែ​ច្រើន ដែលធ្វើឲ្យចំនួនអ្នកនេសាទខ្មែរបានថយចុះ និងបរិមាណត្រីក្នុងទឹក និងត្រីនេសាទបាន​ប្រចាំ​ថ្ងៃ ​កាន់​តែ​ថយ​ពី​មួយថ្ងៃទៅមួយថ្ងៃ។ ចុងបញ្ចប់ (ខ្មែរ)ក្លាយជាទាសករ (ទៅ)នៅក្រៅស្រុក។

ឆ្នាំងបាយទី២៖
មុខរបរកសិកម្ម ត្រូវបានពលរដ្ឋបោះបង់ចោលជាបណ្តើរៗ ដោយសារតែការបង្កាត់ពូជកសិកម្ម​ពីយួន ពូជ​មិន​អាចបង្កកូនបាន និងទិន្នផលបានច្រើន តែត្រូវការតម្លៃដើមទុនខ្ពស់ ដោយប្រើជីគីមី។ លើសពីនេះ ទំនិញ​កសិកម្ម​ត្រូវ​គ្រប​​ដណ្តប់ ដោយទំនិញយួន ដោយរដ្ឋយួនជួយជនជាតិគេ ឲ្យប្រកបកសិកម្ម​អាជីព​និង​ចំណាយ​ទុន​តិច ទិន្នផល​ខ្ពស់។ ទំនិញកសិកម្មខ្មែរ បែរជាមិនអាចប្រណាំង នឹងទីផ្សារដោយការហូរចូលលើសលុប និង​សម្លាប់​តម្លៃ​ផលិតផល​កសិកម្មខ្មែរ។ ទីបំផុត (ខ្មែរ)ក្លាយជាទាសករ (ទៅ)នៅក្រៅស្រុក។

ឆ្នាំងបាយទី៣៖
នៅពេលដែលដីសម្បទានសេដ្ឋកិច្ច ផ្តល់ឲ្យក្រុមហ៊ុនយួនច្រើន កម្មករយួនត្រូវមកជំនួសច្រើន និងជា​ពិសេស​កៅស៊ូ​ខ្មែរ ធ្លាប់តែលក់ឲ្យយួនបានចំណេញ តែឥឡូវ យួនមានទីតាំងដាំកៅស៊ូ​ច្រើនលើសលុប​នៅលើ​ទឹកដី​ខ្មែរ ទីបំផុត​ចម្ការកៅស៊ូខ្មែរមួយចំនួន អាចត្រូវលក់ឲ្យយួនដោយគ្មានទីផ្សារ និងខាតទុនដោយលក់​បាន​តម្លៃ​ថោក។ កម្មករក៏បាត់ឆ្នាំងបាយ និងក្រុមហ៊ុនខ្មែរ ក៏មានស្ថានភាពអាក្រក់ និងមុខរបរជនជាតិដើមភាគតិច ក៏​ត្រូវ​បាត់បង់។

ឆ្នាំងបាយទី៤៖
នៅពេលដែលជនជាតិយួន ហូរចូលខុសច្បាប់ច្រើនលើសលុប សិប្បកម្ម សហគ្រាស និង ជំនួញមួយ​ចំនួន​របស់​ខ្មែរ ត្រូវជំនួសដោយយួននោះ ទៅអនាគត ឆ្នាំងបាយនេះ ត្រូវប៉ះទាំងខ្មែរអ្នកមាន អ្នកមធ្យម និងអ្នកក្រ។ សិប្បកម្ម​យួន មិនដែលជួលជនជាតិខ្មែរទេ។ ទីបំផុត ខ្មែរក្លាយជាទាសករ (ទៅ)នៅក្រៅប្រទេស។

ឆ្នាំងបាយទី៥៖
នៅពេលដែលយួនហូរចូលកាន់តែច្រើន ជោគវាសនានៃការគ្រប់គ្រងរដ្ឋ តាំងពីថ្នាក់ខ្ពស់ រហូតដល់ថ្នាក់តូច ត្រូវបានជំនួសជាបណ្តើរៗ ដោយកូនយួន ទៅអនាគត សូម្បីតែប្រធានភូមិ ក៏កូនខ្មែរពិបាកចាប់យកដែរ។
ពស់​លេប​ក្បាលកង្កែបបាត់ហើយ តែខ្លួន និងជើងកង្កែប នៅតែមានសង្ឃឹមឈ្នះបាន ករណីមានការ​ចូលរួម​យ៉ាង​សកម្ម និងពេញលេញពីពលរដ្ឋ។

បន្ទាប់មកលោក កែម ឡី បានបន្ថែមនូវរូបភាពមួយចំនួន ដែលបង្ហាញពីនិគមជនយួន ដែលចូលមក​រស់នៅ​ដេរដាស នៅតាមតំបន់ជាច្រើន ដែលលោក កែម ឡី ខ្លួនលោក បានធ្វើដំណើរ«ត្រាច់ចរ»ទៅដល់។ ទស្សនាវដ្ដី​​មនោរម្យ.អាំងហ្វូ សូមបង្ហាញជូននូវវីដេអូមួយទៀត ដែលរូបលោកបានថតដោយផ្ទាល់ និងបង្ហោះ​ផ្សាយ នៅ​​លើ​​ទំព័រ​ហ្វេសប៊ុកររបស់លោក៕