ផលិតកម្ម «Imaginew» ជំនាញខាងភាពយន្ដគំនូរជីវចល បានប្រកាសឲ្យដឹងថា លោក ចូស្សេ ម៉ូរ៉េញ៉ូ (José Mourinho) រហស្សនាម «Special One» នឹងបញ្ចូលសម្លេងរបស់លោក ទៅក្នុងតួអង្គនៃសម្ដេច​សង្ឃ​កាតូលីក ហ្វ្រង់ស៊័រ (François) សម្រាប់ភាពយន្ដមួយ ដែលផលិតឡើង ដើម្បីចូលរួមក្នុងពិធីបុណ្យ​ រំលឹក​ដល់​ការ​បង្ហាញ​ខ្លួន នៃ​ព្រះសាវ័ក «Vierge Marie (ក្នុងសាសនាគ្រឹស្ទ៍ ជាម្ដាយព្រះយ៉េស៊ូ)»។ ពិធីបុណ្យនេះ នឹង​ប្រព្រឹត្តិ​ទៅ នៅក្នុងក្រុង «Fatima» ស្ថិតនៅភាគកណ្ដាល​នៃប្រទេសព័រទុយហ្គាល។

លោក ម៉ូរ៉េញ៉ូ នឹងបញ្ចូលសម្លេងរបស់លោក ជាភាសាចំនួនបួន៖ ព័រទុយហ្គាល់ អង់គ្លេស អេស្ប៉ាញ៉ុល និង​អ៊ីតាលី ដែលសុទ្ធសឹងជាភាសា នៃប្រទេសដែលលោកធ្លាប់ចូលទៅធ្វើជាគ្រូបង្វឹក ឲ្យក្រុមបាល់ទាត់​ដ៏ល្បីៗ។

ការយកលោក ម៉ូរ៉េញ៉ូ មកបញ្ចូលសម្លេងនេះ មិនមែនចេះតែរើស ឲ្យតែបាន ឬដោយសារតែលោក​មាន​ឈ្មោះ​បោះ​សម្លេង នៅក្នុងពិភពបាល់ទាត់ប៉ុណ្ណោះទេ។ ប៉ុន្តែការជ្រើសរើស យកគ្រូបង្វឹកបាល់ទាត់ម្នាក់នេះ មក​ជំនួស​សម្លេង​របស់​សម្ដេចសង្ឃកាតូលីក ត្រូវបានទទួលដឹងឮ ពីសំណាក់បូរីវ៉ាទីកង់ (Vatican - ព្រះវិហារ​កណ្ដាល នៃ​សាសនា​គ្រឹស្ទ៍) រួចហើយនោះទៀត។ នេះបើតាមការអះអាងឲ្យដឹង ពីសំណាក់ផលិតកម្មដដែល។

តាមជំនឿនៅក្នុងសាសនាគ្រឹស្ទ៍ ព្រះសាវ័ក «Vierge Marie» បានបង្ហាញខ្លួនឡើងវិញ នៅចំពោះមុខ​កុមារី​បីនាក់ នៅក្រុង «Fatima» ដែលស្ថិតនៅ១៣០គីឡូម៉ែត្រ ខាងជើងរដ្ឋធានី លីស្បន (Lisbonne) របស់​ប្រទេស​ព័រទុយហ្គាល។ ការបង្ហាញខ្លួននេះ បានធ្វើឡើងចំនួន៦ដង នៅក្នុងឆ្នាំ១៩១៧ ខណៈការ​បង្ហាញ​ខ្លួន​លើក​ទី​មួយ ធ្វើនៅថ្ងៃទី១៣ ខែឧសភា។

កាលពីឆ្នាំទៅម៉ិញ សម្ដេចសង្ឃកាតូលីក ហ្វ្រង់ស៊័រ ធ្លាប់បានប្រកាសថា ព្រះអង្គមានបំណងចង់ចូលរួម ក្នុង​ពិធី​បុណ្យរំលឹក ដល់ការបង្ហាញខ្លួនរបស់ព្រះសាវ័ក របស់ព្រះយ៉េស៊ូ នៅក្នុងឆ្នាំ២០១៧ខាងមុខ៕