ទៀ បាញ់ និងមន្ត្រីយួនរួមគ្នាចង្អុលបក្សប្រឆាំងខ្មែរ ថាបង្កអស្ថិរភាព
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី២០ ឧសភា ២០១៦
- កែប្រែចុងក្រោយ: May 20, 2016
- ប្រធានបទ: ព្រំដែន-នយោបាយ
- អត្ថបទ: មានបញ្ហា?
- មតិ-យោបល់
-
បើសិនជាបញ្ហាព្រំដែន កម្ពុជា-វៀតណាម នៅតែត្រូវបានក្រុមអ្នករិះគន់ លើកឡើងពីភាពមិនប្រក្រតីនោះ តែសម្រាប់រដ្ឋមន្ត្រីការពារជាតិកម្ពុជា បានថ្លែងប្រហាក់ប្រហែលគ្នា ទៅនឹងការលើកឡើង របស់មន្ត្រីអនុព័ន្ធយោធាវៀតណាម ប្រចាំនៅប្រទេសកម្ពុជា ដូច្នេះថា បញ្ហាក្នុងពេលកន្លងមក ទាក់ទងនឹងបញ្ហាព្រំដែន គឺគណបក្សប្រឆាំងនៅកម្ពុជា ជាអ្នកបង្កើតឡើង។
មន្ត្រីជាន់ខ្ពស់ កម្ពុជានិងវៀតណាមទាំងពីររូប បានថ្លែងដូច្នេះ នៅក្នុងពិធីសម្ពោធដាក់ឲ្យប្រើប្រាស់អគារសាលប្រជុំថ្មី សកលវិទ្យាល័យការពារជាតិ ដែលជាអំណោយរបស់ក្រសួងការពារប្រទេស នៃសាធារណរដ្ឋសង្គមនិយមវៀតណាម កាលពីនៅថ្ងៃទី១៩ ខែឧសភា ឆ្នាំ២០១៦ ម្សិលម៉ិញនេះ។
លោក ង្វៀង អាញ់យ៉ុង (Nguyen Anh Dung) អនុព័ន្ធយោធានៃប្រទេសវៀតណាម ប្រចាំនៅកម្ពុជា បានលើកឡើងថា ទង្វើរបស់គណបក្សប្រឆាំង ដែលបានទៅបង្កបញ្ហារញ៉េរញ៉ៃ នៅតាមបន្ទាត់ព្រំដែន កម្ពុជា-វៀតណាម នោះ គឺមានបំណងចង់បំបែកបំបាក់ នូវកិច្ចសហប្រតិបត្តិការល្អ និងទំនាក់ទំនងមិត្តភាព សាមគ្គីភាពរវាងប្រទេសទាំងពីរ កម្ពុជា-វៀតណាម ដែលមានតាំងពី«យូរលុង»ណាស់មកហើយ។
ចំពោះលោក ទៀ បាញ់ រដ្ឋមន្ត្រីការពារជាតិខ្មែរ ក៏បានលើកឡើង មិនខុសគ្នាប៉ុន្មានដែរ។ លោករដ្ឋមន្ត្រីបានថ្លែងស្រដៀងគ្នាថា គណបក្សប្រឆាំងនៅកម្ពុជា តែងតែងធ្វើសកម្មភាពញុះញង់ និងយកបញ្ហាមួយចំនួន មានបញ្ហាព្រំដែនជាដើម មកបង្កបរិយាកាសឲ្យអ័ព្ទអួរ និងនាំឲ្យមានអរិភាព ជាមួយប្រទេសជិតខាង។ លោកថា ទង្វើនេះ មានបំណងផ្ដួលរំលំ រដ្ឋាភិបាលស្របច្បាប់ ដែលកើតចេញពីការបោះឆ្នោត។
លោកនាយឧត្ដមសេនីយ៍ ដែលមានថានៈជាឧបនាយករដ្ឋមន្ត្រីផង បានមានប្រសាសន៍ថា៖ «បក្សប្រឆាំង នៅតែមានមហិច្ឆតា ផ្តួលរំលំរាជរដ្ឋាភិបាលស្របច្បាប់។ ធ្វើការញុះញង់បង្កប់បរិយាកាស អរិភាពជាមួយប្រទេសជិតខាង រឿងបញ្ហាព្រំដែនកម្ពុជា-វៀតណាម ព្រមទាំងការប្រមូលផ្តុំ ធ្វើបាតុកម្ម កូដកម្ម ឬទាមទារតវ៉ានានា។»។
លោក ទៀ បាញ់ បានបញ្ជាក់ទៀតថា បំណងចង់ផ្ដួលរំលំរដ្ឋាភិបាលសព្វថ្ងៃ ដែលដឹកនាំដោយលោកនាយករដ្ឋមន្ត្រី ហ៊ុន សែន មិនមែនមានត្រឹមតែគណបក្សប្រឆាំងប៉ុណ្ណោះទេ តែនៅមានបរទេសមួយចំនួន ក៏បានចិញ្ចឹមចិត្តធ្វើដូច្នេះដូចគ្នាដែរ។ ប៉ុន្តែលោកមិនបានបញ្ជាក់ថា តើបរទេសនោះជាក្រុម ឬប្រទេសណាមួយទេ។
លោករដ្ឋមន្ត្រី បានថ្លែងឡើងថា៖ «មហិច្ឆតាពពួកពីក្រៅមួយចំនួន យើងមិនបាច់និយាយថានរណាទេ ពីក្រៅមួយចំនួន គឺកំពុងតែរងនូវភាពខកចិត្តមួយ ដែលគេបានធ្វើអ្វីៗ គ្រប់បែបយ៉ាងទាំងអស់ តាំងពីយូរយាណាស់មកហើយ ក្នុងការពូនសម្ញំនៅតាមអង្គការសង្គមស៊ីវិល ក៏ដូចជាតាមសមាគម។ ប៉ុន្តែធាតុពិត ធ្វើសកម្មភាពគ្រប់បែបយ៉ាងទាំងអស់ ដើម្បីបម្រើមហិច្ឆតារបស់អ្នកអគតិ។ គោលដៅដ៏ធំរបស់គេ ធ្វើយ៉ាងណាគឺផ្តួលរំលំរដ្ឋាភិបាលស្របច្បាប់ ផ្តួលរំលំរាជរដ្ឋាភិបាល មកពីគណបក្សប្រជាជនកម្ពុជា។»
បន្ទាប់មក លោក ទៀ បាញ់ បានថ្លែងក្នុងនាមក្រសួងការពារជាតិ ថានឹងអនុវត្តតួនាទីរបស់ខ្លួន ក្នុងការថែរក្សាសន្តិភាព និងសន្តិសុខសង្គម។ លោកបានថ្លែងបន្តថា៖ «សកម្មភាពការថ្មីៗនេះ មិនអាចឲ្យយើងអង្គុយស្ងៀម ធ្វេសប្រហែសបានទេ ព្រោះមនុស្សអគតិមួយចំនួនមិនបង្អង់ដៃទេ នៅតែពឺតសម្បើមណាស់ ប្រឹងប្រែងខ្លាំងណាស់ ធ្វើឲ្យមានភាពក្រឡាប់ចក្រ»។
ការថ្លែងដូច្នេះ ពីសំណាក់លោករដ្ឋមន្ត្រី ទៀ បាញ់ ឬពីសំណាក់មន្ត្រីរដ្ឋាភិបាលកម្ពុជាផ្សេងទៀត មិនមែនជារឿងថ្មីឡើយ។ ប៉ុន្តែការថ្លែងរួមគ្នា ជាមួយនឹងមន្ត្រីជាន់ខ្ពស់វៀតណាមបែបនេះ ជារឿងមួយដ៏កម្រ។
យ៉ាងណាក៏ដោយ មន្ត្រីគណបក្សសង្គ្រោះជាតិ ដែលជាគណបក្សប្រឆាំងធំជាងគេនៅកម្ពុជា តែងបានបដិសេធពីការលើកឡើងទាំងឡាយណា ដែលចោទថា គណបក្សខ្លួនចង់ធ្វើការរំលំរដ្ឋាភិបាលស្របច្បាប់ ដែលចេញពីការបោះឆ្នោត។ ប៉ុន្តែគណបក្សនេះ បានអំពាវនាវឲ្យមានការផ្លាស់ប្ដូរ តាមរយៈការបោះឆ្នោត តាមបែបប្រជាធិបតេយ្យ។ រីឯបញ្ហាដែលជាប់ពាក់ព័ន្ធនឹងព្រំដែន ក៏ធ្លាប់ត្រូវបានមន្ត្រីគណបក្សសង្គ្រោះជាតិអះអាងដែរថា ជាសិទ្ធិសេរីភាព របស់ប្រជាជនកម្ពុជា ក្នុងនាមជាម្ចាស់ប្រទេស ជាម្ចាស់ទឹកម្ចាស់ដី ដែលត្រូវខ្វាយខ្វល់ ពីការរំលោភណាមួយ បង្កឡើងដោយបរទេសជិតខាង៕