ករណី«តារាល្បីបើកបរបង្កគ្រោះថ្នាក់ តែបែរជារត់គេចខ្លួន» មិនមែនជារឿងថ្មីទេ ដោយគ្រាន់តែដូរ​មនុស្ស ពីតារា​នេះ ទៅ​​តារា​មួយ​រូប​ទៀត​ប៉ុណ្ណោះ។ ហើយនេះ ទំនងជាហេតុការណ៍ថ្មីមួយទៀត របស់​តារា​ចម្រៀង​ល្បី​ ឈ្មោះ​«ខេម» របស់ផលិតកម្មថោន​ ដែលត្រូវបានសាក្សីនៅផ្ទាល់​កន្លែង​អះអាង​ថា បាន​ជិះ​រថយន្ដ​​ទំនើប ធុន «RANGE ROVER» របស់​​ខ្លួន ជា​មួយ​មិត្ត​ស្រី​ម្នាក់ ទៅ​បុក​ចំ​ពី​មុខ​​យ៉ាង​ពេញ​ទំហឹង ជាមួយ​នឹង​រថយន្ដ ធុន «CELICA» មួយ​​គ្រឿង​​ទៀត ​ដែល​បើក​ក្នុង​ទិស​បញ្ច្រាស​គ្នា បង្កឲ្យអ្នកបើកបររថយន្ដរូបនោះ បាត់បង់ជីវិតភ្លាមៗ។

ហេតុការណ៍បានកើតឡើង នៅម៉ោង ០០ និង៤០នាទី យប់រំលងអាធ្រាត ពីថ្ងៃទី១៧ ចូលមកថ្ងៃ​ទី១៨ ខែ​ឧសភានេះ នៅត្រង់ចំណុចមុខឃ្លាំងស្ថាននីយ៍ប្រេងសូគីម៉ិច តាមបណ្តោយផ្លូវជាតិលេខ៥ ស្ថិតក្នុងសង្កាត់​ឬស្សីកែវ ខណ្ឌ​ឬស្សីកែវ រាជធានី​ភ្នំពេញ។

ប្រភពពីអាជ្ញាធរ ដែលចុះពិនិត្យនៅនឹងកន្លែង បានឲ្យដឹងថា ជនរងគ្រោះដែលស្លាប់ ដោយ​កៀប​ខ្លួន​ក្នុង​រថយន្ដ​ មាន​ឈ្មោះ លី ការីម អាយុ៣១ឆ្នាំ ជាបុគ្គលិកធនាគារអម្រិត និងជាអ្នករស់នៅក្នុងភូមិ​គីឡូម៉ែត្រ​លេខ​៨ សង្កាត់​ច្រាំង​ចំរេះ១ ខណ្ឌ​ឬស្សីកែវ។

រីឯប្រភពដែលបានឃើញហេតុការណ៍ បានបញ្ជាក់ថា គេបានឃើញរថយន្ត «RANGE ROVER» ពណ៍​ស និង​ពាក់​ស្លាក​លេខ «ភ្នំពេញ 2X-9987» បានបើកតាមបណ្តោយផ្លូវជាតិលេខ៥ ក្នុងល្បឿនយ៉ាងលឿន ទិសដៅ​ពី​ជើង​ទៅ​ត្បូង (ចូលមកក្នុងរាជធានីវិញ) និងបានឃើញរថយន្ត «CeLiCa» មួយ​គ្រឿង​ទៀត ពណ៍​ខ្មៅ និង​ពាក់​ស្លាក​លេខ «ភ្នំពេញ 2M-5575» បានបើកក្នុងល្បឿន យ៉ាងលឿនដូចគ្នា តែទិសដៅ​បញ្ច្រាស​គ្នា។ លុះ​ពេល​មក​ដល់​ចំណុច​កើត​ហេតុ​រថយន្ដទាំងពីរបានបុកគ្នា ចំពីមុខយ់ាងពេញទំហឹង បណ្តាល​ឲ្យ​រថយន្ដ​ទាំង​ពីរ​គ្រឿង​រង​ការ​ខូច​ខាត​យ៉ាង​ធ្ងន់ធ្ងរ។

ប្រភពដដែលបាននិយាយទៀតថា អ្នកបើករថយន្ត «RANGE ROVER» ត្រូវបាន​គេ​ស្គាល់ ថា​ជាតារា​ចំរៀង ខេម នៅ​ក្នុង​ផលិតកម្ម​ថោន ដែលមានរួមដំណើរដោយនារីម្នាក់ទៀត។ អ្នកទាំងពីរ បានចុះ​ពី​លើ​រថយន្ត ហើយ​ក៏​រត់​គេច​ខ្លួន​បាត់​ស្រមោល ដោយទុករថយន្ដខូចខាត និងជនរងគ្រោះ នៅ​នឹង​កន្លែង។

ក្រុមសមត្ថកិច្ចមូលដ្ឋាន និងនគរបាលជំនាញ ដែលបានទៅដល់កន្លែងកើតហេតុ នៅបន្តិច​ក្រោយ​មក បាន​ធ្វើ​ការ​វាស់​វែង និង​ស្ទូច​យក​រថយន្ត​ទាំង​២គ្រឿង ទៅរក្សាទុកនៅការិយាល័យ​ចរាចរណ៍​ផ្លូវគោក រាជធានី​ភ្នំពេញ ដើម្បី​ទុក​រង់ចាំ​ដោះស្រាយ​ទៅពេលក្រោយ។ ចំណែកសពជនរងគ្រោះ ត្រូវបានក្រុម​អាជ្ញាធរ​ទាំង​នោះ បញ្ជូន​ទៅ​ប្រគល់​ឲ្យ​ក្រុម​គ្រួសារ​រួចរាល់​ហើយ៕