ក្រុមប្រឆាំង នៅពីក្រោយការប្លន់គេហទំព័ររបស់ ហ៊ុន សែន?
- ដោយ: សុបិន្ដ ([email protected]) - ម៉ុងរ៉េអាល់ ថ្ងៃទី៧ ឧសភា ២០១៦
- កែប្រែចុងក្រោយ: May 07, 2016
- ប្រធានបទ: បច្ចេកវិទ្យា
- អត្ថបទ: មានបញ្ហា?
- មតិ-យោបល់
-
គេហទំព័រផ្លូវការ និងផ្ទាល់ខ្លួនរបស់លោក ហ៊ុន សែន នាយករដ្ឋមន្ត្រីកម្ពុជា ដែលមានអាស័យដ្ឋាន samdechhunsen.gov.kh ត្រូវបានក្រុមវាយប្រហារ តាមប្រព័ន្ធព័ត៌មានវិទ្យា ឫហៅតាមភាសាអង់គ្លេស «Hackers» ផ្លាស់ប្ដូរទិន្នន័យ កាលពីព្រឹកម៉ោង៤ និង១២នាទី ថ្ងៃទី៧ ខែឧសភានេះ ដោយបានប្ដូរទម្រង់ដើម មានទាំងរូបភាព និងសម្លេង។ ក្នុងពេលបច្ចុប្បន្ន គេហទំព័រផ្លូវការនេះ បានវិលមករកដំណើរការដូចធម្មតាឡើងវិញហើយ ប៉ុន្តែទិន្នន័យមួយចំនួនធំ នៅក្នុងគេហទំព័រត្រូវបាត់បង់។
តាមសេចក្ដីថ្លែងការណ៍មួយ ដែលត្រូវបានបង្ហោះ នៅលើទំព័រហ្វេសប៊ុកផ្លូវការរបស់លោក ហ៊ុន សែន បានសរសេរទម្លាក់កំហុស នៃការវាយប្រហារ ទៅលើគេហទំព័រនេះ ថាជាស្នាដៃរបស់ក្រុមប្រឆាំង និងបានអះអាងថា ក្រុមជំនាញស្រាវជ្រាវឧក្រិដ្ឋកម្មព័ត៌មានវិទ្យា (IT Crimes) របស់រដ្ឋាភិបាល កំពុងស្រាវជ្រាវរកប្រភពជនល្មើស ដើម្បីចាប់ឲ្យមកទទួលខុសត្រូវ ចំពោះមុខច្បាប់ «ជាតិ និងអន្តរជាតិ»។
សេចក្ដីថ្លែងការណ៏នោះ បានសរសេរថា៖ «ភស្តុតាងទាំងនេះ គឺជាទង្វើមិនអាចប្រកែកបាន របស់ក្រុមបក្សប្រឆាំង ដែលតែងតែរិះរកវិធីទុច្ចរិត គម្រក់ៗគ្រប់យ៉ាង (ដើម្បី)ធ្វើការវាយប្រហារ មកលើសម្តេចតេជោ ហ៊ុន សែន។ ជនល្មើស ទោះបីមានប្រភពមកពីណាក៏ដោយ គឺត្រូវទទួលខុសត្រូវចំពោះមុខច្បាប់ជាតិ និងអន្តរជាតិ។»។
គោះស្គរប្រហោងក្នុង...
សម្រាប់វិស្វករផ្នែកព័ត៌មានវិទ្យា លោក សុធា មេត្តា ដែលកំពុងធ្វើការ ឲ្យក្រុមហ៊ុនដ៏ធំមួយ ក្នុងប្រទេសកាណាដា បានឲ្យដឹងថា ការវាយប្រហារទៅលើគេហទំព័រណាក៏ដោយ សុទ្ធតែជាទង្វើខុសច្បាប់ ហើយលោកមិនគាំទ្រនូវទង្វើបែបនេះឡើយ បើទោះជាស្នាដៃរបស់ក្រុមណាក៏ដោយ។
ប៉ុន្តែចំពោះចំណាត់ការ ដែលសេចក្ដីថ្លែងការណ៍បានលើកឡើងនោះ ត្រូវបានលោកវាយតម្លៃថា វាមានប្រសិទ្ធិភាពតិចតួចបំផុត និងមានលក្ខណៈដូចជាការគោះស្គរ ដែលឮតែសម្លេង ខណៈស្គរប្រហោងក្នុង។ លោក សុធា មេត្តា បានពន្យល់ប្រាប់ទស្សនាវដ្ដីមនោរម្យ.អាំងហ្វូ ពីក្រុងម៉ុងរ៉េអាល់ ប្រទេសកាណាដា មកថា បើសូម្បីភ្នាក់ងារ «FBI» របស់រដ្ឋាភិបាលអាមេរិក ដែលមានជំនាញរាប់សិបឆ្នាំ ខាងការតាមប្រមាញ់ ក្រុមវាយប្រហារតាមបណ្ដាញអ៊ិនធើណែតនេះ ក៏នៅតែពិបាកស្វែងរកក្រុម ឬជនណាមួយពិតប្រាកដ ឲ្យមកទទួលទោសនោះដែរ។ ហើយម្យ៉ាងទៀត មិនមែនឲ្យតែគ្រប់ការវាយប្រហារ ទៅលើគេហទំព័រទាំងឡាយណា សុទ្ធតែជាអំពើឧក្រិដ្ឋនោះទេ។
លោកវិស្វករបានបញ្ជាក់ទៀតថា ផ្ទុយទៅវិញ ប្រសិនជាក្រុមវាយប្រហារទៅលើគេហទំព័រទាំងនោះ មានបុព្វហេតុដ៏ត្រឹមត្រូវរបស់ពួកគេ និងមានទីតាំងនៅបរទេស នោះក្រុមការងាររបស់លោក ហ៊ុន សែន កាន់តែមានសង្ឃឹមតិចទៅៗ ក្នុងការយកក្រុម ឬជននេះមកផ្ដន្ទាទោស។ លោក សុធា មេត្តា បានលើកជាឧទាហរណ៍ថា កន្លងមក គេហទំព័រជាតិធំៗជាច្រើន នៅក្នុងប្រទេសស៊ីរី បានរងការវាយប្រហារដូចគ្នា ក្រោមបុព្ធហេតុសេរីភាព និងការប្រឆាំងអំពើផ្ដាច់ការ របស់ប្រធានាធិបតី បាល់ឆារ អាល់អាសាធ (Bashar al-Assad)។ ហើយកន្លងមកថ្មីៗ គេហទំព័រជាច្រើន របស់ក្រុមរដ្ឋអ៊ីស្លាម ក៏បានរងគ្រោះដូចគ្នា ពីសំណាក់ក្រុមអនាមិក ដែលតែងប្រកាសដោយចំហរ ធ្វើការប្រឆាំងនឹងក្រុមភេរវនិយមនេះដែរ។ តែក្រុម ឬជន ដែលនៅពីក្រោយការវាយប្រហារ ទៅលើគេហទំព័រទាំងនោះ កម្រត្រូវបានគេរកឃើញ និងចាប់ឲ្យមកទទួលទោសណាស់។
សូមបញ្ជាក់ដែរថា គេហទំព័រផ្លូវការរបស់លោក ហ៊ុន សែន ទើ់បតែត្រូវបានដាក់ ឲ្យមានដំណើរការ ចាប់តាំងពីដើមខែមករា ឆ្នាំ២០១៦នេះប៉ុណ្ណោះ ហើយនេះជាលើកដំបូងហើយ ដែលគេហទំព័រនេះ ត្រូវបានក្រុមវាយប្រហារតាមប្រព័ន្ធព័ត៌មានវិទ្យា ចូលមកធ្វើការផ្លាស់ប្ដូរទិន្នន័យ។ ប៉ុន្តែបើប្រៀបធៀប ទៅនឹងឆ្នាំកន្លងមក គេហទំព័រជាច្រើន របស់ក្រសួងមន្ទីរស្ថាប័នជាតិធំៗមួយចំនួនទៀត ក៏ធ្លាប់បានរង នូវការវាយប្រហារដូចគ្នានេះដែរ។
ការវាយប្រហារ ទៅលើគេហទំព័រជាតិសំខាន់ៗនៅពេលនោះ ត្រូវបានក្រុមអនាមិកកម្ពុជាប្រកាសទទួលស្គាល់ មុននឹងសមាជិករបស់ពួកគេចំនួនពីរនាក់ ត្រូវបានអាជ្ញាធរកម្ពុជាចាប់ខ្លួន ហើយបញ្ជូនទៅឃុំនៅក្នុងពន្ធនាគារ។ យុវជនទាំងពីរនាក់ ដែលសុទ្ធសឹងជានិស្សិតផ្នែកព័ត៌មានវិទ្យា ត្រូវបានតុលាការព្យួរទោស ដែលនៅសេសសល់ និងបង្គាប់ឲ្យទៅបម្រើការនៅក្រសួងមហាផ្ទៃ ក្នុងផ្នែកព័ត៌មានវិទ្យាដដែល៕