តាមពិតទៅ ពាក្យចចាមអារាម ទាក់ទងនឹងកិច្ចសន្យា​ជាមួយប្រទេសអូស្ត្រាលីនេះ បានកើត​ឡើង​តាំង​ពី​ច្រើន​ខែមកហើយ រវាងសហគ្រាសសង់នាវាមុជទឹក ក្នុងប្រទេសបារាំង អាល្លឺម៉ង់ និងក្នុងប្រទេសជប៉ុន។ ប៉ុន្តែ​ទើប​តែ​មក​ដល់​ថ្ងៃអង្គារម្សិលម៉ិញនេះ ទើបនាយករដ្ឋមន្ត្រីអូស្ត្រាលី បានបិទបញ្ចប់ពាក្យចចាម​អារាម​នោះ ដោយ​ផ្ដល់​ជ័យជំនះទាំងស្រុង ទៅឲ្យសហគ្រាស «DCNS» របស់បារាំង។

លោកនាយករដ្ឋមន្ត្រី ម៉ាលកូម ទួនប៊ល (Malcom Turnbull) បានថ្លែងឲ្យដឹង ពីក្រុង «Adélaïde (ភាគ​ខាង​ត្បូង​ប្រទេសអូស្ត្រាលី)» មកថា៖ «គឺជាថ្ងៃដ៏អស្ចារ្យ សម្រាប់កងទ័ពជើងទឹករបស់យើង សម្រាប់​វិស័យ​សេដ្ឋកិច្ច របស់ប្រទេសអូស្ត្រាលី ក្នុងសតវត្សន៍ទី២១នេះ ហើយក៏ជាថ្ងៃដ៏អស្ចារ្យ សម្រាប់វិស័យ​ការងារ​នៅក្នុង​ពេល​អនាគត​​នោះដែរ»។

កិច្ចសន្យាដែលទទួលបាន ដោយសហគ្រាសបារាំង «DCNS» នេះ ក៏នឹងបង្កើតការងារ រាប់​សិប​ពាន់​កន្លែង​ដែរ នៅក្នុងប្រទេសបារាំង។ នេះបើតាមការប្រកាស របស់រដ្ឋមន្ត្រីការពារជាតិ លោក ហ្សង់អ៊ីវ ឡឺឌ្រីយ៉ង់ (Jean-Yves Le Drian)។ លោករដ្ឋមន្ត្រី បានថ្លែងនៅតាមវិទ្យុបារាំងមួយថា៖ «នឹងបង្កើតឲ្យមាន នូវ​ការងារ​រាប់​ពាន់​កន្លែង នៅបារាំង ហើយជាកិច្ចសន្យា ដែលមានរយៈពេលវែង (...) យើងបានផ្សារសាច់ផ្សារ​ឈាម​គ្នា ជាមួយ​ប្រទេសអូស្ត្រាលី ក្នុងរយៈពេល៥០ឆ្នាំទៅមុខ»។

លោក ឡឺឌ្រីយ៉ង់ បានបន្ថែមទៀតថា៖ «មួយភាគ នៃទឹកប្រាក់នេះ នឹងត្រូវធ្វើវិនិយោគទុន នៅក្នុង​ប្រទេស​អូស្ត្រាលី។ យើង​យល់​ពី​បញ្ហានេះ។ នោះ គឺដោយសារតែអូស្ត្រាលី ចង់ធានា នូវអធិបតេយ្យភាពរបស់ខ្លួន ខាង​ផ្នែក​សន្តិសុខ និង​ឧស្សាហកម្ម។ ប៉ុន្តែទឹកប្រាក់ដ៏សម្បើមមួយភាគទៀតនោះ នឹងបានមក​ប្រទេស​បារាំង។»

លោករដ្ឋមន្ត្រី មិនបានបញ្ជាក់អ្វីបន្ថែម ទៅលើក្រមប្រតិបត្តិ ទាក់ទងនឹងកិច្ចសន្យានេះ សម្រាប់​ថ្ងៃ​ខាង​មុខ​ឡើយ។ ប៉ុន្តែលោកបានអះអាងបន្ថែមថា លោកនឹងធ្វើដំណើរ ទៅកាន់ប្រទេសអូស្ត្រាលី ក្នុងពេលខាង​មុខ ដើម្បី​បង្កើត​ឲ្យ​មាន ជាក្រមប្រតិបត្តិនេះឡើង។

ការដ្ឋានសាងសង់នាវាទាំងនេះ នឹងត្រូវធ្វើនៅក្នុងក្រុង «Cherbourg (ភាគខាងលិចប្រទេសបារាំង» ដែលជា​តំបន់ដ៏ធំមួយ ឯកទេសខាងការសាងសង់ នាវាមុជទឹក។ ប៉ុន្តែមិនមែនមានតែ នៅក្នុងក្រុងនេះតែមួយទេ តែ​នៅ​មាន​ការដ្ឋានផ្សេងទៀត នៅឯក្រុង «Brest» «Lorient» និងក្រុង «Nantes» ដែលសុទ្ធតែស្ថិត​នៅភាគ​ខាង​លិច (ក្បែរមហាសមុទ្រអាត្លង់ទិក) នៃប្រទេសបារាំង។

សូមបញ្ជាក់ដែរថា សហគ្រាស «DCNS» ជំនាញខាងការសាងសង់សម្ភារៈកងទ័ពជើងទឹក ជាក្រុមហ៊ុន​ចម្រុះ រវាងរដ្ឋបារាំង និងក្រុមហ៊ុន «Thalès»។ នៅក្នុងរយៈពេល នៃការជជែកពិភាក្សា ពីកិច្ចសន្យា​ខាង​លើ សហគ្រាស «DCNS» មានដៃគូប្រជែងចំនួនពីរទៀត គឺសហគ្រាសអាល្លឺម៉ង់ «ThyssenKrupp Marine Systems (TKMS)» និងសហគ្រាសជប៉ុន «Mitsubishi Heavy Industries»៕