ប្រទេសទាំងបួន មានចិន ប្រ៊ុយណេ កម្ពុជា និងឡាវ បានសម្រេចរួមគ្នា ថាជម្លោះដែនទឹក នៅក្នុង​សមុទ្រ​ចិន​ខាងត្បូង មិនមែនជាបញ្ហារវាងប្រទេសចិន និងសមាគមប្រជាជាតិអាស៊ីអាគ្នេយ៍ (ហៅកាត់ថា អាស៊ាន - ASEAN) នោះទេ។ បញ្ហាទាំងនេះ មិនគួរឲ្យប៉ះពាល់ ដល់ការវិវត្តន៍ទៅមុខ នៃចំណងមេត្រីភាព រវាង​ប្រទេស​ចិន និងសមាគមប្រជាជាតិ ដែលមានសមាជិក ១០ប្រទេសឡើយ។ នេះជាសេចក្ដីរាយការណ៍  របស់​ទីភ្នាក់ងារ​ព័ត៌មានចិន ស៊ីនហួរ ដែលបានដកស្រង់សម្ដី របស់លោក វ៉ាង យី (Wang Yi) រដ្ឋមន្ត្រី​ការបរទេស​ចិន នៅក្នុងការថ្លែងមួយ ទៅកាន់ក្រុមអ្នកយកព័ត៌មាន នារដ្ឋធានីវៀងចន្ទ ប្រទេសឡាវ កាលពីថ្ងៃ​សៅរ៍។

ការអះអាងរបស់លោក វ៉ាង យី បានធ្វើឡើង បន្ទាប់ពីលោក​បានធ្វើទស្សនកិច្ចមួយជុំ នៅក្នុង​ប្រទេស​ប្រ៊ុយណេ កម្ពុជា និងនៅចុងក្រោយគេ នៅក្នុងប្រទេសឡាវ។ លោករដ្ឋមន្ត្រីបានអះអាងទៀតថា ប្រទេស​ទាំង​បួនបានយល់ព្រមទៀតថា សិទ្ធិរបស់រដ្ឋអធិបតេយ្យទាំងនោះ គួរត្រូវបានគោរព ក្នុងការ​ជ្រើសរើស​មធ្យោបាយ​​រៀងៗ​ខ្លួន ដើម្បី​ដោះ​ស្រាយ​ជម្លោះ​ទឹកដី ដោយយោងតាមច្បាប់អន្តរជាតិ។

ប៉ុន្តែប្រទេសទាំងបួននេះ បានជំទាស់ទាំងស្រុង នូវរាល់ការប៉ុនប៉ង ជា​​ឯកតោភាគីទាំងឡាយណា ដែលចង់​ដាក់​របៀបវារៈ (នៃ​បញ្ហាជម្លោះ) នេះ ទៅឲ្យប្រទេសដទៃទៀត។​ នេះបើតាមលោក វ៉ាង យី ដដែល។ ជម្លោះ​ដែនទឹក គួរត្រូវពិគ្រោះ និងចរចា ជាមួយនឹងភាគី ដែលពាក់ព័ន្ធ អនុលោម​ទៅ​តាម​មាត្រាបួន នៃ​សេចក្ដី​ប្រកាស​​ក្រមប្រតិបត្តិ សម្រាប់គ្រប់ភាគី (DOC) នៅជុំវិញសមុទ្រចិនខាងត្បូង។ រីឯ​ប្រទេស​ដែល​ស្ថិត​នៅ​ក្រៅ​តំបន់​វិញ (ចង់​និយាយ​សំដៅ ទៅរកសហរដ្ឋអាមេរិក) គួរប្រើតួនាទីរបស់ខ្លួន ក្នុងន័យ​ស្ថាបនា នៅចំពោះ​ជម្លោះ​ទឹកដី ដ៏រ៉ាំរ៉ៃមួយនេះ៕