«អ្នកឯង ជាមនុស្សម្នាក់​ដ៏សាហាវបំផុត» នេះជាការលើកឡើង ទៅកាន់ជនជាប់ចោទ របស់លោក ម៉ាក ត្រាសុក (Mark Trusock) ចៅក្រមកាត់សេចក្ដី នៅក្នុងតុលាការនៃរដ្ឋមីឈីហ្គែន (Michigan) សហរដ្ឋ​អាមេរិក។ ជនជាប់ចោទ ឈ្មោះ អេរិក ម៉ាស្ទ័រ (Eric Master) អាយុ២៩ឆ្នាំ នឹងត្រូវបានបន្តជីវិត​ ដែល​នៅ​សេសសល់​​របស់ខ្លួន នៅក្នុងពន្ធនាគារ រហូតដល់ថ្ងៃអស់សង្ខា។ តែបើទោះជាស្លាប់ ហើយក៏ដោយ ក៏ជន​ជាប់​ចោទនៅតែ​​មិនអាច«អនុវត្តន៍»ទោស ឲ្យបានទាំងស្រុងនោះដែរ ព្រោះតុលាការបានផ្ដន្ទាទោស ឲ្យ​ជាប់​ពន្ធនាគា​រហូត​ដល់​ទៅ ២០០ឆ្នាំ។

សារព័ត៌មានអង់គ្លេស «Mirror» បានធ្វើសេចក្ដីរាយការណ៍ថា យុវជន អេរិក ម៉ាស្ទ័រ ដែលជា​អតីត​ឆ្មាំសមុទ្រ​មួយរូប មកពីរដ្ឋកេនទុឃី (Kentucky) នោះ បានប្រព្រឹត្តិទង្វើដ៏ហួសនិស្ស័យមួយ គឺបានចាប់រំលោភ ទៅលើ​ទារិកាអាយុ ១៨ខែដ៏តូចម្នាក់ ជាមួយនឹងសកម្មភាពដ៏ព្រៃផ្សៃ។ សារព័ត៌មានបានរំលឹកហេតុការណ៍ ដែល​កើត​ឡើង​ក្នុង​សណ្ឋាគារមួយ តាំងពីឆ្នាំ២០១២មកវិញថា ទារិកាត្រូវបានយុវជន ចាប់ចងដៃចងជើង មុននឹង​ចាប់​នាង​តូច​រំលោភ។ បន្ទាប់ពីសម្រេចបំណងហើយ យុវជនបានបាញ់ទឹកនោមរបស់ខ្លួន ពីលើ​ទារិកា​នោះ​ថែម​ទៀត។

គេកាន់តែមិនយល់ពីទង្វើរបស់យុវជន អេរិក បន្ទាប់ពីគេដឹងថា យុវជនបានថតជាវីដេអូ នូវរាល់​សកម្មភាព​របស់​ខ្លួន​ខាង​លើ តាំងពីដើមដំបូងរហូតដល់ចប់។ លោកចៅក្រម ម៉ាក ត្រាសុក បានអះអាង​នៅក្នុង​ការ​ប្រកាស​សាលក្រម​របស់លោកថា៖ «អ្នកឯងជាមនុស្សម្នាក់ ដ៏សាហាវបំផុត។ យើងត្រូវធានាឲ្យបាន ថាអ្នកឯង​នឹង​មិន​ត្រូវ​រស់នៅ ក្នុងសង្គមជាតិជាមួយអ្នកផងតទៅទៀតទេ។»

វីដេអូដែលថតដោយជនជាប់ចោទ ត្រូវបានរកឃើញ ដោយនគរបាលអាមេរិក និងភ្នាក់ងារ «FBI» នៅ​ក្នុង​ម៉ាស៊ីន​កំព្យូទ័រ នៃជនជាច្រើនទៀត ដែលសុទ្ធសឹង​បានប្រព្រឹត្តិបទល្មើស​ខាងផ្លូវភេទ ជាមួយអនីតិជន (ជន​មិន​ទាន់​គ្រប់​អាយុ តាមផ្លូវច្បាប់)។ កាលពីខែកន្លងទៅ យុវជន អេរិក ម៉ាស្ទ័រ រូបនេះ ក៏ត្រូវបាន​តុលាការ​ផ្តន្ទាទោស​រួច​ហើយ ឲ្យជាប់ពន្ធនាគារ៥០ឆ្នាំ ពីបទបានបៀតបៀនខាងផ្លូវភេទ ជាមួយកុមារៗ នៅក្នុងរដ្ឋមីឈីហ្គែន។

នៅ​ក្នុងសវនាការ យុវជនអាយុ២៩ឆ្នាំ បានថ្លែងថាខ្លួនធ្លាប់បានរងគ្រោះ ព្រោះការរំលោភ​បំពាន​ផ្នែក​ផ្លូវ​ភេទ​នេះ តាំងពីខ្លួន​នៅជាកុមារនៅឡើយ។

ម្ដាយរបស់ទារិកាបានស្នើសុំឲ្យតុលាការ ត្រូវបង្ខាំងទុកយុវជនល្មើស នៅក្នុងពន្ធនាគាររហូតទៅ។ រីឯ​នាង​តូច​រង​គ្រោះ​វិញ មកដល់ថ្ងៃនេះមានអាយុ៥ឆ្នាំហើយ ប៉ុន្តែនាងតូចនៅតែមានអារម្មណ៍ ក្នុងសភាពបាក់ស្បាត សឹង​គ្រប់​ពេលវេលា​ទាំងអស់៕