អ្នកឆ្នៃប្រឌិតធ្វើនំមួយរូប នៅក្រុង ម៉ុងប៊េលីយ៉ារដ៍ (Montbéliard) នៃប្រទេសបារាំង (ជាប់ព្រំដែននៃប្រទេសស្វីស)  បាន​យកក្បាច់រួមរក្សជាច្រើន នៅក្នុងគម្ពឺ «កាម៉ាស៊ុយត្រា (Kamasutra)» ដ៏ល្បីរបស់ជនជាតិឥណ្ឌា មកឆ្លាក់ដាក់នៅលើ ​«នំ​សូកូឡា» ដើម្បីទាក់ទាញអោយចង់ភ្លក្ស ពីសំណាក់អតិថិជន ដែលមានវ័យចំណាស់ៗ។

នំសូកូឡា ដែលមានក្បាច់យ៉ាងពិសេសៗ។ នរណាខ្លះចង់ភ្លក្ស ?

«ជាទម្លាប់កន្លងមក ខ្ញុំធ្វើតែនំសូកូឡាធម្មតាៗ ដូចដែលធ្លាប់ធ្វើពីមុន សម្រាប់បុណ្យសង្សា ដូចជារូបបេះដូងតូចៗ ជាដើម។ តែថ្ងៃនេះ ខ្ញុំចង់បង្កើតនូវគំនិតថ្មីមួយ ដើម្បីទាក់ទាញអារម្មណ៍បន្តិច។» នេះជាការពន្យល់របស់ សេប៊ាស្យៀង ប៉ាវលី (Sébastien Pawly) អ្នកឆ្នៃប្រឌិតធ្វើនំ ដែលហាងនំរបស់គាត់ មានទីតាំងនៅ កណ្ដាលទីក្រុងម៉ុងប៊េលីយ៉ារដ៍។

បុរសអ្នកឆ្នៃប្រឌិតរូបនេះ បានធ្វើនំសូកូឡារបស់គាត់ មានរាងជាចតុកោណកែងតូចៗ ហើយបានចាក់ពុម្ភពីលើនូវ ក្បាច់​ចម្លាក់ក្រឡោត ដែលបង្ហាញពីរបៀបរួមរក្សយ៉ាងពិសេសៗ ដកស្រង់ចេញពីគម្ពឺបូរាណ ដ៏ល្បីរបស់ជនជាតិឥណ្ឌា ហៅថា «កាម៉ាស៊ុយត្រា»។

បណ្ដាអតិជន «បានយកនំទាំងនេះ ទៅកាន់មើល និងញ៉ាំ ជាមួយនឹងភាពញញឹម ហើយឥឡូវ នរណាៗក៏ចង់បាននំ​សូកូឡា ដែលមានក្បាច់រួមរក្សទាំងនេះ។» លោកសេបាស្យៀង បានបន្ថែមយ៉ាងដូច្នេះ។ បុរសអាយុ៣៩ឆ្នាំរូបនេះ បាន​និយាយ​អួតអាងថា មានការភ្ញាក់ផ្អើលជាខ្លាំង ពីការចងដឹងចង់ភ្លក្ស ទៅលើផលិតផលឆ្នៃប្រឌិតរបស់លោក ជាពិសេស​ពី​សំណាក់អតិថិជន ដែលមានអាយុពី៥០ ទៅ៧០ឆ្នាំ។

លោកនិយាយលេងថា «ខ្ញុំពិបាក នឹងធ្វើនំបន្ថែម អោយទាន់តម្រូវការណាស់»៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២៦ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ