CNRP៖ ទណ្ឌកម្មដាក់លើ ហ៊ីង ប៊ុនហៀង ជាសារព្រមាន«មេក្លោង»
- ដោយ: ដ. កែវ ([email protected]) - ប៉ារីស ថ្ងៃទី១៣ មិថុនា ២០១៨
- កែប្រែចុងក្រោយ: June 13, 2018
- ប្រធានបទ: នយោបាយខ្មែរ
- អត្ថបទ: មានបញ្ហា?
- មតិ-យោបល់
-
ប្រតិកម្មបានធ្លាក់ ចុះមកជាបន្តបន្ទាប់ ចំពោះការដាក់លោក ហ៊ីង ប៊ុនហៀង ចូលក្នុងបញ្ជីខ្មៅ នៃបុគ្គលដែលត្រូវរងទណ្ឌកម្ម ក្រោមច្បាប់ គ្លូប៊ល ម៉ែកនីតស្គី (GLOBAL MAGNITSKY) ដែលសម្រេចឡើង កាលពីថ្ងៃទី១២ ខែមិថុនា ឆ្នាំ២០១៨ម្សិលម៉ិញ ដោយនាយកដ្ឋានរតនាគារជាតិអាមេរិក។
សម្រាប់គណបក្សសង្គ្រោះជាតិ ដែលជាគណបក្សប្រឆាំង ដ៏សំខាន់ជាងគេ នៅកម្ពុជា និងដែលត្រូវបានរំលាយចោល ដោយរដ្ឋាភិបាលលោក ហ៊ុន សែន កាលពីចុងឆ្នាំ ទៅម៉ិញនោះ ទណ្ឌកម្មប្រឆាំងមេបញ្ជាការកងអង្គរក្ស របស់នាយករដ្ឋមន្ត្រី គឺជា «ការផ្ដល់ពន្លឺយុត្តិធម៌មួយ ជូនដល់ជនរងគ្រោះ ដែលរងគ្រោះក្រោមស្នាដៃលោក ហ៊ីង ប៊ុនហៀង»។ នេះ បើតាមសេចក្ដីថ្លែងការណ៍មួយ របស់គណបក្សប្រឆាំង ដែលទស្សនាវដ្ដីមនោរម្យ.អាំងហ្វូ ទើបនឹងទទួលបាន នៅមុននេះបន្តិច។
លោក ហ៊ីង ប៊ុនហៀង ឧត្ដមសេនីយផ្កាយមាសបួន និងជាមេបញ្ជាការ នៃកងអង្គរក្សរបស់លោកនាយករដ្ឋមន្រ្តី ហ៊ុន សែន បានរងទណ្ឌកម្មខាងលើ ដែលមានដូចជា ការបង្កកទ្រព្យសម្បត្តិ ការមិនផ្ដល់ទិដ្ឋការ និងបង្កកផលប្រយោជន៍ដទៃទៀតជាដើម។ រដ្ឋាភិបាលសហរដ្ឋអាមេរិកបានរកឃើញថា លោក ហ៊ីង ប៊ុនហៀង បានចូលរួមដោយផ្ទាល់ ក្នុងការរំលោភសិទ្ធិមនុស្សធ្ងន់ធ្ងរ ក្នុងរយៈពេលជាច្រើនឆ្នាំចុងក្រោយនេះ រួមទាំងអំពើហិង្សា នៅឆ្នាំ២០១៣ នៅក្បែរវត្តភ្នំ និងអំពើហិង្សាវាយដំតំណាងរាស្ត្រពីររូប មកពីគណបក្សប្រឆាំង នៅមុខរដ្ឋសភា នៅឆ្នាំ២០១៥។
សេចក្ដីប្រកាស របស់នាយកដ្ឋានរតនាគារជាតិអាមេរិក បានពន្យល់ថា គឺលោក ប៊ុនហៀង និងកងអង្គរក្សរបស់លោក ហ៊ុន សែន នេះហើយ ដែលបានជាប់ពាក់ព័ន្ធដោយផ្ទាល់ នៅក្នុងការបង្រ្កាប លើក្រុមអ្នកតវ៉ា និងសកម្មជនបក្សប្រឆាំង ដូចជាការបោកគ្រាប់បែក លើអ្នកតវ៉ាអហិង្សា កាលពីឆ្នាំ១៩៩៧ ដែលធ្វើឲ្យស្លាប់ និងរបួសមនុស្សជាច្រើននាក់ រួមទាំងរបួសពលរដ្ឋអាមេរិក មួយរូបផង។
» អត្ថបទដែលទាក់ទង៖ ហ៊ីង ប៊ុនហៀង ត្រូវអាមេរិកដាក់ចូលបញ្ជីខ្មៅ ដែលត្រូវបង្កកទ្រព្យមុនគេ
សេចក្ដីថ្លែងការណ៍ របស់គណបក្សសង្គ្រោះជាតិ បានបញ្ជាក់ថា ទណ្ឌកម្មលើលោក ហ៊ីង ប៊ុនហៀង នៅពេលនេះ ជា«សារព្រមានដល់មេក្លោងរំលោភសិទ្ធិមនុស្សនៅកម្ពុជាដទៃទៀត»។ អត្ថបទបានបន្តថា៖ «ពួកគេនឹងមិនរូចខ្លួន ពីសំណាញច្បាប់ឡើយ ហើយពួកគេត្រូវតែបញ្ឈប់ជាបន្ទាន់ នូវការរំលោភសិទ្ធិមនុស្ស និងការធ្វើទុក្ខបុកម្នេញ តាមគ្រប់រូបភាព មកលើប្រជាពលរដ្ឋស្លូតត្រង់ ប្រសិនបើពួកគេមិនចង់ទទួលរងទណ្ឌកម្ម ពីសហគមន៍អន្តរជាតិ»៕