ព្យុងយ៉ាង គម្រាមធ្វើសង្គ្រាម«មួយចំអិនកំពិស» ដើម្បី«រំដោះ»កូរ៉េខាងត្បូង
- ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី១២ មីនា ២០១៦
- កែប្រែចុងក្រោយ: March 13, 2016
- ប្រធានបទ: ឧបទ្វីបកូរ៉េ
- អត្ថបទ: មានបញ្ហា?
- មតិ-យោបល់
-
ខណៈពេលដែលការធ្វើសមយុទ្ធប្រចាំឆ្នាំរួមគ្នា រវាងកងទ័ពអាមេរិក និងកូរ៉ខាងជើង កំពុងប្រព្រឹត្តទៅនោះ ទីភ្នាក់ងារព័ត៌មានផ្លូវការ របស់ប្រទេសកូរ៉េខាងជើង ដែលហៅកាត់ថា «KCNA» បានស្រង់សេចក្ដីប្រកាសព័ត៌មានមួយ របស់បញ្ជាការដ្ឋានកងទ័ព របស់ប្រទេសនេះ មកចេញផ្សាយពីលទ្ធភាព បើកការវាយប្រហារ ប្រឆាំងនឹងកងកម្លាំង«សត្រូវ» ដែលកំពុងធ្វើការហ្វឹកហាត់ នៅក្នុងសមយុទ្ធ។
ទីភ្នាក់ងារផ្លូវការដដែលនោះ បានឲ្យដឹងទៀត កាលពីថ្ងៃសៅរ៍ម្សិលម៉ិញនេះថា របបកុម្មុយនីស កូរ៉េខាងជើង ត្រៀមធ្វើការតបតរ ចេញពីគ្រប់ទិស ទៅនឹងសមយុទ្ធខាងលើនេះ ហើយក៏ជាយុទ្ធនាការ«ដ៏សន្ធាប់»មួយ ដើម្បីរំដោះប្រទេសកូរ៉េខាងត្បូងទាំងមូល រួមទាំងរដ្ឋធានី សេអ៊ូល នោះផង។
ជាប្រតិកម្មត្រឡប់ទៅវិញ ក្រសួងការបរទេសរបស់ប្រទេសកូរ៉េខាងត្បូង បានអំពាវនាវទៅប្រទេសកូរ៉េខាងជើង ឲ្យបញ្ឈប់នូវរាល់ការគម្រាម និងការបង្ករឿង។ នេះបើតាមការចេញផ្សាយ របស់ទីភ្នាក់ងារព័ត៌មាន «Yonhap» របស់ប្រទេសកូរ៉េខាងត្បូង។
ព្រមានប្រើគ្រាប់បែកនុយក្លេអ៊ែរ...
តាំងពីពេលដែលសមយុទ្ធ រវាងកងទ័ពនៃប្រទេសទាំងពីរ (អាមេរិក និងកូរ៉េខាងត្បូង) បានចាប់ផ្ដើមដំណើរការ និងដែលមានសកម្មភាពខ្លាំងក្លា ជាពេលណាៗទាំងអស់នោះ ប្រទេសកូរ៉េខាងជើងបានចេញការព្រមាន សឹងជារៀងរាល់ថ្ងៃ ចំពោះប្រទេសសម្ព័ន្ធមិត្តទាំងពីរ និងជាពិសេសបានព្រមាន ពីការវាយប្រហារ«នុយក្លេអ៊ែរ» នោះទៀត។
សភាពតានតឹង នៅក្នុងឧបទ្វីបកូរ៉េ មិនដែលបានស្រាកស្រាន្ដម្ដងណាឡើយ រាប់ចាប់តាំងពីការសាកល្បងជាលើកទីបួន នូវគ្រាប់បែកនុយក្លេអ៊ែរ របស់ប្រទេសកុម្មុយនីស កាលពីដើមខែមករានោះមក។ បន្ទាប់ពីការសាកល្បងគ្រាប់បែកនោះហើយ នៅខែកុម្ភៈកន្លងទៅថ្មីៗ ប្រទេសកូរ៉េខាងជើងបានបាញ់កាំជ្រួច ប្រភេទរយៈឆ្ងាយមួយទៀត ដែលជាទង្វើ«រំលោភ»ទៅនឹងដំណោះស្រាយ របស់អង្គការសហប្រជាជាតិ។ សកម្មភាពនេះ បានធ្វើឲ្យក្រុមប្រឹក្សាសន្ដិសុខ ធ្វើការកោះប្រជុំជាបន្ទាន់ ហើយព្រមព្រៀងថា នឹងដាក់ទណ្ឌកម្មជាលក្ខណៈអន្តរជាតិបន្ថែមទៀត ទៅលើរបបក្រុងព្យុងយ៉ាង ដែលកំពុងឯកោស្រាប់៕