តែផ្ទុយទៅវិញ សំនុំរឿងរបស់លោក ឡូរ៉ង់ វ៉ាលីយ៉េ (Laurent Vallier) នេះ ត្រូវបានអាជ្ញាធរខ្មែរប្រកាស នៅ​ក្រោយតែប៉ុន្មានថ្ងៃ ពីការរកឃើញ សពមនុស្សទាំងប្រាំនាក់ ដែលស្ថិតក្នុងរថយន្ដត្រាំត្រពាំងក្រោយផ្ទះ ថា​ជា​ករណី​ធ្វើអត្តឃាត។ សម្រាប់ចៅក្រមស៊ើបអង្កេតបារាំង ដែលបានទៅធ្វើកិច្ចការនេះ នៅក្នុងប្រទេសកម្ពុជា បាន​បង្ហាញនូរចំណុចសង្ស័យជាច្រើន ដែលធ្វើឲ្យករណីនេះ ជាឧក្រិដ្ឋកម្មមួយដ៏សាហាវ។ នេះ​បើ​តាម​ការ​ផ្សាយ របស់​សារព័ត៌មាន​បារាំង «Parisien» នៅក្នុងអត្ថបទយកការណ៍មួយដ៏វែងអន្លាយ។

ការរកឃើញ របស់ក្រុមអ្នកស៊ើបអង្កេតបារាំងនេះ ក៏ជាការជឿជាក់តាំងពីដំបូងទី របស់ក្រុមគ្រួសារលោក ឡូរ៉ង់ វ៉ាលីយ៉េ ក្នុងតំបន់ អូត-ពីរ៉េណេ (Haut-Pyrénées) ក្នុងប្រទេសបារាំងដែរ។ លោក ស៊ាវីយ៉េ វ៉ាលីយ៉េ (Xavier Vallier) ដែលជាបងប្រុសរបស់លោក ឡូរ៉ង់ បានច្រានចោលការប្រកាស របស់មន្ត្រីជាន់ខ្ពស់ របស់​នគរបាល​ជាតិខ្មែរ ដែលធ្វើសេចក្ដីសន្និដ្ឋាន យ៉ាងលឿនជាទីបំផុត ថាករណីប្អូនប្រុសលោក ជាការធ្វើ​«អត្តឃាត» និង​បាន​បរិហារការអះអាងនេះ ថាមានបំណង​ដើម្បីបញ្ជៀសការបះពាល់មុខមាត់ ដល់ប្រទេស​កម្ពុជា។

ក្រុមគ្រួសាររបស់លោក ឡូរ៉ង់ វ៉ាលីយ៉េ ជាតិបារាំងទាំងមូល បានសង្ស័យពី«ភាពតានតឹង និង​ទំនាក់ទំនង​មិន​ប្រក្រតី» ដែលលោក ឡូរ៉ង់ វ៉ាលីយ៉េ ធ្លាប់មានជាមួយនឹងគ្រួសារសាច់ថ្លៃរបស់ខ្លួន និងបានដាក់ពាក្យ​បណ្ដឹង កាល​ពី​ខែមករា ឆ្នាំ២០១២ នៅនឹងតុលាការនៃរដ្ឋធានីប៉ារីស ប្រទេសបារាំង ពីបទសង្ស័យ៖ «ឃាតកម្ម»។

សូមរំលឹកមកវិញដែរថា ភរិយាជនជាតិខ្មែររបស់លោក ឡូរ៉ង់ បានស្លាប់ចោលលោក តាំងពីឆ្នាំ២០០៩ ដោយ​បន្សល់​ទុក​កូន​ទាំង​បួននាក់ អោយ​រស់នៅជាមួយលោក នៅក្នុងភូមិគ្រឹះមួយ ស្ថិតក្នុងខេត្តកំពង់ស្ពឺ ប្រទេស​កម្ពុជា។ ប៉ុន្តែចាប់ពីខែកញ្ញា ឆ្នាំ២០១១ មក គ្រួសាររបស់លោក ឡូរ៉ង់ នៅបារាំង បាន​បាត់​ដំណឹង​សូន្យ​ឈឹង​ពី​កូន​ប្រុស និងចៅៗរបស់ខ្លួនតែ​ម្ដង រហូតលុះត្រាដល់ខែមករា ឆ្នាំ២០១២ ទើបអាជ្ញាធរខ្មែរ​ បានរកឃើញ រថយន្ដ​«នីសាន់» ប្រភេទ​៤X៤​មួយ​គ្រឿង ដែលត្រាំលិចទៅក្នុង​ទឹក​ត្រពាំង ក្នុងភូមិគ្រឹនោះ មិនតិច​ជាង៣ខែ​មក​ហើយ។ នៅក្នុងរថយន្ដនោះ មានគ្រោងឆ្អឹងមនុស្សប្រាំនាក់ ដែលត្រូវបានរកឃើញ ក្រោយមកថា ជា​គ្រោង​ឆ្អឹង​របស់​លោក ឡូរ៉ង់ និងកូនតូចៗទាំងបួនរបស់លោក។

» ការស្រង់រថយន្ដពីក្នុងត្រពាំង ដែលជាទស្សនីយភាព​របស់មនុស្សច្រើននាក់៖

ខុសគ្នាពីការអះអាង​របស់មន្ត្រីនគរបាលខ្មែរ ដែលបានលើកឡើង​ពីករណីអត្តឃាត នៅភ្លាមៗក្រោយ​ការ​រក​ឃើញ​រថយន្ដ​នោះ តែនៅបច្ចុប្បន្ននេះ​ ការស៊ើបអង្កេតក្រោមការដាក់សម្ពាធ ពីចៅក្រមស៊ើបសួរបារាំង អ្នកស្រី «Claudine Enfoux» បានបង្ហើបឲ្យដឹង ពីចំណុចសង្ស័យផ្សេងៗទៅវិញ។ ជាពិសេសភស្ដុតាង និង​វត្ថុតាង​ទាំងប៉ុន្មានដូចខាងក្រោម វានឹង​ជា​ជំហាន​ដ៏រឹងមាំ ដើម្បី​ឲ្យ​អ្នក​ស៊ើប​អង្កេត អាច​រក​ឃើញ​ជន​ល្មើស ដែល​ប្រព្រឹត្តិ​ឧក្រិដ្ឋកម្មដ៏សាហាវ និងហួសពីការស្មាន។

ស្លាកស្នាមឈាម ត្រូវ​បាន​រកឃើញនៅក្នុងផ្ទះ និងមានខ្សែពួរ ទុកចោលនៅទីនោះ បួករួមនឹងកាំបិតមួយ នៅ​ក្នុងធុងស៊ីទែន (Citerne) នៃ​បរិវេណ​ផ្ទះ​លោក ឡូរ៉ង់។ អ្នកស៊ើបអង្កេត បានបង្ហើបឲ្យដឹងថា ក្នុង​ចំណោម​កូន​ទាំង​បួន​នាក់ របស់​លោក ឡូរ៉ង់ មាន​តែ​កូន​ម្នាក់​ប៉ុណ្ណោះ ដែលបានស្លាប់ដោយឈ្លក់ទឹក។

ចំណែកឯសាកសពរបស់លោក ឡូរ៉ង់ វិញ ក៏បានបង្ហាញកាន់តែច្បាស់ដែរថា ករណីនេះគឺពិតជា«ឃាតកម្ម»៖ ខ្លួន​ប្រាណរបស់លោក បានអង្គុយនៅលើកៅអីពូកខាងមុខ របស់រថយន្ដ ខណៈឯលលាដ៏ក្បាលលោក បែរជា​ទៅ​នៅ​ឯ​ក្នុង​វ៉ាលីស ដែល​ត្រូវបានទុក នៅក្នុងឃ្លុបឡានខាងក្រោយទៅវិញ។ នេះ បើតាមសារព័ត៌មានបារាំង «Parisien» ដដែល។ ហើយ «ស្បែកជើងជំពាមកៅស៊ូ របស់មនុស្សធំមួយចំហៀង» ​រក​ឃើញពីក្នុង​រថយន្ដ​​មក​នោះ ក៏ត្រូវបានក្រុមអ្នកស៊ើបអង្កេតអះអាងថា វាមិនមែនជារបស់លោក ឡូរ៉ង់ នោះដែរ។ លោក ឡូរ៉ង់ មិន​ដែល​ពាក់​​ស្បែក​ជើងដូចនេះឡើយ។

លោក ស៊ាវីយ៉េ បងប្រុសលោក ឡូរ៉ង់ បានអះអាងថា រឿងឃាតកម្មនេះ កើតឡើងពីរឿងលុយកាក់ និងការ​ច្រណែន​គុំគួន។ លោកនិយាយថា៖ «ពួកគេហ៊ានដល់ថ្នាក់ ជ្រមុជក្មេងម្នាក់ ឲ្យស្លាប់ឈ្លក់ទឹកទាំងរស់។ នៅ​ថ្ងៃ​​ណា​មួយ ជននោះនឹងត្រូវចាប់ខ្លួន ហើយត្រូវទទួលទោស ពីអ្វីដែលខ្លួនបានប្រព្រឹត្តិ ទៅលើជន​រងគ្រោះ​រាល់​​រូប បើ​ទោះ​ជា​គេ​នៅ​មិន​ទាន់​ដឹង ឲ្យពិតប្រាកដថា ជននោះជានរណា ហើយមានប៉ុន្មាននាក់នោះ​ក៏​ដោយ។»។

លោកបានថ្លែងទៀតថា៖ «នៅថ្ងៃនេះ យើងត្រូវបង្ខំចិត្តទាំងទុក្ខទោស ដើម្បី​រងចាំ»៕