កាលពីថ្ងៃទី១២ ខែមករាកន្លងទៅ នាង ដានៀល ឡាគ្រី (Danielle Lagree) អតីតតារាសម្ដែងក្ដៅសាច់​មួយ​រូប បានជួបរឿងដែលភ័យបំផុត នៅក្នុងជីវិតរបស់នាង៖ គឺយន្ដហោះ ដែលអតីតតារាវ័យ២៧ឆ្នាំរូបនេះ កំពុង​បើក​បរ ដើម្បីការហាត់រៀននោះ បានមានបញ្ហា នៅចំពេលនាងកំពុងបញ្ជា នៅលើអាកាសនាភាគខាងជើង នៃ​ក្រុង​ឡូសអេនជឺឡេស រដ្ឋកាលីហ្វ័នី (ខាងលិចសហរដ្ឋអាមេរិក)។ នៅពេលនោះ នាងបានឮសូរស្នូរ ដ៏ចម្លែកមួយ លាន់​ចេញពីម៉ាស៊ីនយន្ដហោះ ដែលនាងកំពុងបើក។

អតីតតារាកូនជ្រូក ដែលគេស្គាល់ឈ្មោះផ្សេង (ឈ្មោះក្នុងសិល្បៈ) ថាជានាង អាឡិចស៊ីស ហ្វ័ដ (Alexis Ford) នោះ បាននិយាយរៀបរាប់ប្រាប់ទូរទស្សន៍ «CBS Los Angeles» ថា៖ «ខ្ញុំបានប្រាប់ទៅគ្រូបង្រៀនខ្ញុំ ថា​យន្ដហោះ​មានបញ្ហាហើយ។ គាត់ឆ្លើយមកខ្ញុំវិញថា តើខ្ញុំមានបានប៉ះ លើប្រអប់បន្ថែមល្បឿនឬទេ? ខ្ញុំ​បាន​ឆ្លើយ​ទៅ​វិញ ថាអត់មានប៉ះអ្វីទេ។»

បន្ទាប់មកទាំងគ្រូទាំងសិស្ស បានយល់ភ្លាមថា ម៉ាស៊ីនរបស់យន្ដហោះ បានជួបភាពរអាក់រអួលហើយ។ ពី​ចំណុច​នោះ ត្រឡប់មកព្រលានយន្ដហោះវិញ មានចំងាយឆ្ងាយណាស់។ បើអញ្ចឹង តើត្រូវធ្វើយ៉ាងដូចម្ដេច​ទៅ? នាង ដានៀល បានបន្តទៀតថា៖ «យន្ដហោះបានហោះធ្លាក់ មកក្រោមហើយ។ អញ្ចឹង យើងត្រូវស្វែងរក កន្លែង​ណា​មួយ​ភ្លាមៗ ដូចជា ផ្លូវថ្នល់ ឬវាលរាប ដើម្បីចុះចត។»

ទាំងគ្រូទាំងសិស្ស មានបំណងចង់ហោះ ទៅកាន់ទីក្រុងតូចមួយ ឈ្មោះ «Camarillo» នៅជាប់ក្បែរ។ ប៉ុន្តែ​នៅ​ទី​នោះ សណ្ឋានដីមានលក្ខណៈខ្ពស់ទាប ពិបាកនឹងធ្វើឲ្យយន្ដហោះ អាចចុះចតដោយស្រួលណាស់។ អតីត​តារា​សម្ដែង បានពន្យល់ថា៖ «យើងបានគិតថា យើងប្រាកដជា ទៅទាក់នឹងប្រព័ន្ធខ្សែទូរស័ព្ទ ដ៏ច្រើននោះហើយ តែ​សំណាង​ល្អ យន្ដហោះបានហោះររំលង ពីលើបន្តិច»។ ដោយគ្មានជម្រើសទៀត ពួកគេបានសម្រេចចិត្ត ហោះ​សំដៅ ទៅកាន់ថ្នល់ល្បឿនលឿន លេខ២៣ ដែលនៅក្បែរបំផុត ខណៈមានរថយន្ដជាច្រើន កំពុង​ធ្វើ​ចរាចរណ៍​នៅ​លើ​នោះ។

ចំពោះរថយន្ដ ដែលកំពុងបើកលើថ្នល់វិញ បាននាំគ្នាបង្អង់ល្បឿនជាបន្តបន្ទាប់ ក្រោយពីឃើញយន្ដហោះ​មួយ​គ្រឿង​នេះ ចូលមកបើកលើផ្លូវរបស់ផងខ្លួន។ មានតែរថយន្ដមួយប៉ុណ្ណោះ ដែលបានជ្រុល​មក​បើកពីក្រោម​យន្ដហោះ ដែល​ទំនង​ជា​គេចមិនទាន់។ នៅក្នុងហេតុការណ៍នេះ គ្មាននរណាម្នាក់រងរបួសនោះទេ។ តែបើ​និយាយ​ពី​រឿង​ភ័យ​ភិត​វិញ... មិនបាច់និយាយសោះតែម្ដងហើយ៕