បើទោះជាអ្នកស្រី គ្លីនតុន មានប្រជាប្រិយភាពខ្លាំង ជាងបេក្ខជនផ្សេងទៀត ដែលមកពីគណបក្ស​ប្រជា​ធិបតេយ្យ ដូចគ្នាក៏ដោយ ប៉ុន្តែអ្នកស្រីទំនងជាត្រូវអន្ទងចិត្ត​ពលរដ្ឋអាមេរិក នៃនិន្នាការនយោបាយផ្សេង​ទៀត ឲ្យងាកមកគាំទ្រអ្នកស្រី។ ជាពិសេស នៅចំពោះការវាយប្រហារ ដោយមិនសំចៃមាត់ ពីសំណាក់​លោក ដូណាល់ ទ្រម (Donald Trump) បេក្ខជនមួយរូបទៀត ដែលមានការគាំទ្រច្រើនដែរ មកពី​គណបក្ស​សាធារណរដ្ឋ វាធ្វើឲ្យគេយល់ថា នេះជាពេលវេលាសមស្របហើយ ដែលអតីតប្រធានាធិបតីអាមេរិក លោក ប៊ៀល គ្លីនតុន គួរចេញមុខ ដើម្បីគាំទ្រភរិយាលោក។

នៅថ្ងៃចន្ទដើមសប្ដាហ៍នេះ លោក គ្លីនតុន នឹងធ្វើដំណើរមកកាន់ក្រុង «Nashua» ក្នុងរដ្ឋ «New Hampshire» ដើម្បីចូលរួមជាមួយការជួបជុំគ្នា នៅក្នុងសកលវិទ្យាល័យមួយ មុននឹងលោកបន្តដំណើរ​របស់​លោក ទៅកាន់​សាលាក្រុង «Exeter» នៅក្នុងរដ្ឋដដែល។ នេះបើតាមការអះអាង របស់ប្រព័ន្ធ​ផ្សព្វ​ផ្សាយ​ក្នុង​ស្រុក។

គឺនៅក្នុងរដ្ឋ «New Hampshire» នេះហើយ ដែលអ្នកស្រី ហីឡារី គ្លីនតុន បានឈ្នះសម្លេង លើលោក បារ៉ាក់ អូបាម៉ា (Barack Obama) កាលពីដំណើរឆ្ពោះទៅឈរឈ្មោះ ជាប្រធានាធិបតីអាមេរិក កាល​ពី​ឆ្នាំ​២០០៨។ ទីប្រឹក្សាជាច្រើននាក់ របស់អ្នកស្រី គ្លីនតុន បានពន្យល់ប្រាប់អ្នកសារព័ត៌មានថា លោក ប៊ៀល គ្លីនតុន មានការជឿជាក់ លើភរិយារបស់លោក ថានឹងឈ្នះសម្លេង នៅក្នុងរដ្ឋនេះសារជាថ្មីទៀត។

ប៉ុន្តែ​ការចេញមុខរបស់លោក ប៊ៀល គ្លីនតុន មិនបានគេចផុតពីក្រសែភ្នែក របស់គូប្រជែងនៃភរិយាលោក គឺលោក ដូណាល់ ទ្រម នោះឡើយ។ បេក្ខជន ពីគណបក្សសាធារណរដ្ឋរូបនេះ បានធ្វើការវាយប្រហារ លោក គ្លីនតុន កាលពីខែមុនរួចហើយ ថាលោក គ្លីនតុន មានតុល្យភាពដ៏អាក្រក់ ក្នុងបញ្ហាផ្លូវភេទ​ជា​មួយ​ស្ត្រី នាពេលដែលោកអតីតប្រធានាធិបតី នៅកាន់តំណែង។

លោក ទ្រម បានប្រកាសនៅពេលនោះថា៖ «ហ៊ីឡារី យល់ច្រឡំហើយ ប្រសិនបើគាត់គិត ចង់ឲ្យស្វាមី​របស់​គាត់ចេញមុខ ជាមួយនឹងតុល្យភាពដ៏គួរឲ្យភ័យខ្លាច ទាក់ទងនឹងការបៀនបៀនលើស្ត្រីភេទ ខណៈ​ពេល​ដែល​គាត់ខ្លួនឯងផ្ទាល់ (អ្នកស្រី គ្លីនតុន)កំពុងប្រើរូបភាពជាស្ត្រី មកតទល់នឹងខ្ញុំ»។

សូមរំលឹកឡើងវិញដែរថា លោក គ្លីនតុន ធ្លាប់មានរឿងអាស្រូវជាច្រើន ទាក់ទងនឹងស្ត្រី នៅពេលលោក​ជា​អភិបាល ក្រុង «Arkansas» រវាងឆ្នាំ១៩៨៣ មកទល់នឹងឆ្នាំ១៩៩២ និងនៅពេលលោក ជាប្រធានា​ធិបតី​អាមេរិក រវាងពីឆ្នាំ១៩៩៣ មកទល់នឹងឆ្នាំ២០០១។ នៅឆ្នាំ១៩៩៨ សមាជិកសភា មកពីគណបក្ស​សាធារណរដ្ឋ បានព្យាយាមទម្លាក់លោក ពីតំណែងជាប្រធានាធិបតី បន្ទាប់ពីបែកធ្លាយ​រឿង​អាស្រូវ​ផ្លូវភេទ ជាមួយ​កម្មសិក្សាការីមួយរូប នៅសេតវិមាន គឺនាង ម៉ូនីកា ឡេវិនស្គី (Monica Lewinsky)។ ប៉ុន្តែការ​ប៉ុន​ប៉ង​នៅ​ពេល​នោះ មិនទទួលបានលទ្ធផលទេ ហើយលោក គ្លីនតុន នៅតែជាប្រធានាធិបតី ដែលមាន​ប្រជា​ប្រិយភាព នៅក្នុងស្រទាប់ពលរដ្ឋអាមេរិក ទាំងថ្នាក់ទាប និងថ្នាក់កណ្ដាល៕