កម្ពុជា៖ អ្នកការសែតបារាំង Daniel Lainé ជាប់ទោស៧ឆ្នាំក្នុងពន្ធនាគារ
អ្នកសារព័ត៌មានបារាំង លោកដានីញ៉ែល ឡេណេ ត្រូវបានកាត់ទោសអោយជាប់ពន្ធនាគារ ៧ឆ្នាំដោយសាលក្រមមួយ ក្នុងប្រទេសកម្ពុជា កាលពីថ្ងៃអង្គារទី២៩ខែមករាកន្លងទៅនេះ ពីបទ«សញ្ចារកម្ម»។ ជាសំនុំរឿងចោទប្រកាន់ ដែលមានទាក់ទងទៅនឹង ឯកសារវីដេអូមួយ ជាបទយកការណ៍ របស់អ្នកសារព័ត៌មានរូបនេះ តាំងពីជិត១០ឆ្នាំកន្លងមកហើយ។
អាគារសាលាដំបូងរាជធានីភ្នំពេញ ក្នុងទីតាំងថ្មី។
លោក ដានីញ៉ែល ឡេណេ (Daniel Lainé) ដែលអវត្តមានក្នុងសវនាការ ធ្លាប់ទទួលទោសដូចគ្នានេះម្ដងរួចហើយ ក្នុងសំនុំរឿងដដែល កាលពីឆ្នាំ២០១០ តែត្រូវបានលើកយកមក កាត់ទោសសារជាថ្មី ក្នុងថ្ងៃសុក្រទី១១ខែមករាកន្លងមកនេះ ដោយមានវត្ថមានខាងការពារក្ដី របស់អ្នកកាសែតនោះផង។ ចៅក្រមស៊ីន វិសាលបានប្រកាសថា សាលាដំបូងរាជធានីភ្នំពេញ បាន«សម្រេចតំកល់សាលក្រម ឆ្នាំ២០១០នៅទុកជាបានការ»។
សូមអានអត្ថបទមុនរបស់ មនោរម្យព័ងអាំងហ្វូ ដែលធ្វើសេចក្ដីរាយការណ៍ នៅក្រោយពេលការបើកសវនាការ ពីថ្ងៃសុក្រទី១១ខែមករាកន្លងមក។
លោកគង់ សំអុន មេធាវីជនជាតិខ្មែររបស់ជនជាប់ចោទ បានថ្លែងថា«កូនក្ដីរបស់ខ្ញុំមិនពេញចិត្តនឹងសាលក្រមនេះទេ» ដោយលោកបានបញ្ជាក់ថានឹងប្ដឹងឧទ្ទរណ៍បន្តទៅទៀត។ រីឯលោកក្លេម៉ង្ស៍ វិត្ត (Clémence Witt) ជាមេធាវីជនជាតិបារាំង របស់ជនជាប់ចោទ បានបរិហាថា ជា«សាលក្រមយ៉ាងអយុត្តិធម៌ ចេញសម្រេច ដោយរំលោភលើសិទ្ធិការពារក្ដី និងមាត្រាដ្ឋានអន្តរជាតិទូទៅនៃ សវនាការប្រកបដោយគតិយុត្តិ។» លោកមេធាវីបន្ថែមថា «ការសម្រេចចិត្តរបស់តុលាការ បង្ហាញពីការគម្រាម ដែលបានដាក់ទំងន់យ៉ាងធ្ងន់ធ្ងរ ទៅលើសេរីភាពសារពត៌មាន នៅក្នុងប្រទេសកម្ពុជា និងបង្កើនកាន់តែខ្លាំង នូវការចាប់ទោសកំហុសដ៏ធំ ធ្វើអោយរងទុក្ខដល់ ដានីញ៉ែល ឡេណេ។»
ជាប់ក្នុងបញ្ជីក្រហមរបស់ នគរបាលអន្តរជាតិ (អាំងទែប៉ូល Interpol)
តាមការស្នើសុំរបស់ទីក្រុងភ្នំពេញ អ្នកកាសែតបារាំង លោកឡេណេ ត្រូវបានចុះនៅក្នុងបញ្ជីក្រហម របស់នគរបាលអន្តរជាតិ ដែលបាននាំទៅដល់ ការឃាត់ខ្លួនលោក នៅក្នុងប្រទេសមួយ មុននឹងត្រូវគេចាប់បញ្ជូនចេញ។ បន្ទាប់ពីបានត្រឡប់មកដល់ប្រទេសបារាំងវិញ អ្នកសារព័ត៌មានរូបនេះ បានតវ៉ាប្រឆាំង និងបានសុំអោយមានការលើកលែង ពីបញ្ជីក្រហមនេះ៕
------------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី២៩ ខែមករា ឆ្នាំ២០១៣