ចែក​សណ្ដែក​ដី​​នៅ​មុខ​ហាង​លក់​ខោអាវ​ធំៗ​ ដើម្បី​កម្មករ​ខ្មែរ

តាំងពីជាងមួយឆ្នាមកហើយ ដែលកម្មករ នៅក្នុងវិស័យវាយនភ័ណ្ឌកម្ពុជា ទទូចឲ្យមានការតម្លើងប្រាក់ខែ ដល់​១៧៧​ដុល្លា (ឬ១៦៤អ៊ឺរ៉ូ) ក្នុងមួយខែ។ នៅថ្ងៃទី១ ខែមករាខាងមុខនេះ ពួកគេនឹងទទួលបានការតម្លើង ត្រឹមតែ​រវាង​ពី១៣០​ទៅ​១៤០ដុល្លារ​ប៉ុណ្ណោះ ខណៈអ្នកជំនាញ បានវាយតម្លៃថា ប្រាក់ខែដែលអាច ឲ្យមានជីវភាព​រស់នៅ​សមរម្ស មាន​បរិមាណ ចាប់​ពី​៣៨០ដុល្លារ​ឡើង។
Loading...
  • ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី១៥ ធ្នូ២០១៥
  • កែប្រែចុងក្រោយ: December 16, 2015
  • ប្រធានបទ: កម្មករ
  • អត្ថបទ: មានបញ្ហា?
  • មតិ-យោបល់

កាលពីថ្ងៃព្រហស្បត្តិ៍ សប្ដាហ៍មុន សមាគមមួយឈ្មោះ «achACT» ក្នុងប្រទេសប៊ែលហ្សិក និងបណ្ដាញ​យុទ្ធនាការ «លាងសម្អាតសម្លៀកបំពាក់ (ជាភាសាដើម Schone Kleren និងជាភាសាអង់គ្លេស Clean Clothes)» នៅក្នុងប្រទេសហូឡង់ បានធ្វើការបរិហារ ពីស្ថានភាពដែលកម្មករកាត់ដេរ នៅក្នុងទ្វីបអាស៊ី។ ក្រុម​សកម្មជន របស់សមាគមទាំងពីរ បានលើកឡើងយកមកនិយាយ នូវការដួលសន្លប់ និងការក្អួតចង្អោរ ដែល​មាន​លក្ខណៈ​ជា​ក្រុម របស់ក្រុមកម្មករខ្មែរ ក្នុងរយៈពេលចុងក្រោយនេះ នៅក្នុងរោងចក្រជាច្រើន ក្នុង​ប្រទេស​កម្ពុជា។

លោក ហ្សង់ម៉ាក ឆូតដ្រុង (Jean-Marc Caudron) អ្នកទទួលខុសត្រូវ ខាងកិច្ចការបន្ទាន់របស់សមាគម «achACT» បានថ្លែងឲ្យដឹងថា៖ «ដោយសាររដ្ឋាភិបាលកម្ពុជា មិនទទួលខុសត្រូវ លើបញ្ហាទាំងនេះ យើង​គិត​ថា វាគឺជាតួនាទី នៃអ្នកទទួលទិញ ក្នុងវិស័យឧស្សាហកម្ម វាយនភ័ណ្ឌ ដែលត្រូវទៅជជែកពិភាក្សា ជា​មួយ​នឹង​ក្រុម​សហជីព នូវការតម្លើងប្រាក់ខែ»។

នៅក្នុងឱកាស នៃទិវាសិទ្ធិមនុស្សអន្តរជាតិ ក្រុមសកម្មជនប្រមាណជាង៣០នាក់ បានធ្វើយុទ្ធនាការមួយ នៅ​តាមដងផ្លូវ ណូវ (Neuve) កណ្ដាលរាជធានី ប្រ៊ុយសែល ប្រទេសប៊ែលហ្សិក ដោយបានធ្វើការចែក នូវ​សណ្ដែក​ដី និងខិតប័ណ្ណ​ទៅដល់អ្នកដំណើរនានា ដើម្បីបរិហារ ពីប្រាក់ខែដ៏តិចតួចស្ដួចស្ដើង របស់កម្មករ​កាត់​ដេរ នៅប្រទេសកម្ពុជា។ សកម្មភាពទាំងនេះ មានឈ្មោះហៅថា «ធុញទ្រាន់នឹងទទួលបានប្រាក់ខែ ដែល​ទិញ​បាន​តែ​សណ្ដែកដី! (ជាភាសាបារាំង Marre de gagner peanuts!)» ដែលជាការរៀបចំឡើង ដោយ​សមាគម និង​បណ្ដាញ​យុទ្ធនាការខាងលើ។

ក្រុមហ៊ុនតែមួយប៉ុណ្ណោះ ឆ្លើយតប...

នៅចុងបញ្ចប់ នៃការចែក«សណ្ដែកដី» តំណាងមួយរូបបានយកកញ្ចប់សណ្ដែកដី ក៏ដូចជាការទាមទារនានា របស់កម្មករនិយោជិក នៅក្នុងប្រទេសកម្ពុជា ចូលទៅក្នុងទីស្នាក់ការ របស់ក្រុមហ៊ុនសម្លៀកបំពាក់ដ៏ធំមួយ របស់​អ៊ឺរ៉ុប «H&M»។ ប៉ុន្តែអ្នកគ្រប់គ្រង នៅទីនោះ មិនបានជួយសម្រួល ដើម្បីឲ្យមានការជួបពិភាក្សា​គ្នា​នោះ​ទេ។ ក្រុមហ៊ុន «H&M» សុខចិត្តផ្ញើរជាលិខិតមួយ នៅក្នុងសប្ដាហ៍នេះ ត្រឡប់មកក្រុមអ្នកតវ៉ាវិញ ថា​ក្រុមហ៊ុន បានព្រមព្រៀងតាំងពីច្រើនឆ្នាំមកហើយ ជាមួយអង្គការពលកម្មអន្តរជាតិ (ILO) និងថា ក្រុមហ៊ុនកំពុងធ្វើ នូវ​យុទ្ធសាស្ត្រ​ជាសកលមួយ ឈានទៅរកប្រាក់ខែ ដែលអាចរស់បាន របស់កម្មករនិយោជិក។

សម្រាប់លោក ហ្សង់ម៉ាក ឆូតដ្រុង វិញ បានច្រានចោលការលើកឡើងនេះ ដោយបានថ្លែងឡើងថា៖ «ការ​អះអាងខាងលើ មិនបានជួយអ្វី ទៅដល់ស្ថានភាពការងារ និងប្រាក់បៀរវត្សន៍ នៅក្នុងរោងចក្រនោះឡើយ»។ លោកបានបានពន្យល់ឲ្យដឹងថា៖ «យើងចង់ឲ្យមានការផ្ដោតអារម្មណ៍ កាន់តែខ្លាំង ទៅលើការអនុវត្តន៍ ឲ្យ​បាន​ចេញជារូបរាង»។

សមាគមទាំងពីរ ក៏បានធ្វើការទាមទារ ទៅកាន់ក្រុមហ៊ុនសម្លៀកបំពាក់ ធំៗ ដ៏សម្បើមៗ ដូចជា «Zara» «C&A» និង«Levi's»ជាដើម ដែលសុទ្ធសឹងបានទិញ សម្លៀកបំពាក់ពីប្រទេសកម្ពុជាដែរ។ ប៉ុន្តែ​ពីក្នុង​ចំណោម​នោះ មានតែក្រុមហ៊ុន «C&A» មួយប៉ុណ្ណោះ ដែលបានឆ្លើយតប ទៅនឹងការទាមទាររបស់សមាគម ដោយ​បញ្ជាក់ថា នឹងទទួលឲ្យតំណាងសមាគម មកជួបពិភាក្សាជាមួយ នៅក្នុងសប្ដាហ៍ខាងមុខ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...